म. टा. प्रतिनिधी, नाशिक चालकाचे नियंत्रण सुटल्याने भरधाव कार झाडावर धडकून झालेल्या अपघातात चालक जागीच ठार झाला. अभिजित शिंदे असे कारचालकाचे नाव असून, बुधवारी मध्यरात्री अडीचच्या सुमारास हा अपघात घडला. या प्रकरणी गंगापूर पोलिस स्टेशनमध्ये अपघाताची नोंद करण्यात आली आहे. अभिजित संजय शिंदे (वय ३०, रा. सहदेवनगर, गंगापूर रोड) मंगळवारी मध्यरात्री अडीचच्या सुमारास होरायझन स्कूलच्या रस्त्याने सहदेवनगरकडे जात होता. त्या वेळी रस्त्याच्या मध्यभागी असलेले झाड त्याच्या लक्षात आले नाही. त्यामुळे कार थेट झाडावर धडकली. अपघातात अभिजितला जबर मार लागल्याने तो जागीच ठार झाल्याचे प्रत्यक्षदर्शींनी सांगितले आहे. पहाटे चारच्या सुमारास त्याचा भाऊ अक्षय शिंदे याला अपघाताची माहिती मिळाली. त्यानंतर ही बाब उघडकीस आली. अपघाताची माहिती मिळताच गंगापूर पोलिसांनी घटनास्थळी धाव घेत कारमध्ये अडकलेल्या अभिजितला बाहेर काढून सिव्हिल हॉस्पिटलमध्ये दाखल केले. गेल्याच महिन्यात अभिजितचे लग्न ठरले होते. नोव्हेंबरमध्ये त्याचे लग्न होणार होते, असे समजते. मात्र, याबाबत अधिकृत दुजोरा मिळालेला नाही. परदेशात राहणारा अभिजित कुटुंबीयांना भेटण्यासाठी शहरात आला असल्याचेही सांगितले जात आहे. त्याच्या मृत्यूने नातेवाइकांना मोठा धक्का बसला आहे. गंगापूर पोलिस स्टेशनमध्ये बुधवारी सायंकाळपर्यंत तक्रार नोंदविण्याचे काम सुरू होते. सहाय्यक पोलिस निरीक्षक नितीन पवार तपास करीत आहेत.
मोबाइल अॅप डाउनलोड करा आणि राहा अपडेट
