गेट सेट गो... 'सिम्पल स्टेप्स मॅरेथॉन' उत्साहात; बच्चेकंपनीची धमाल म. टा. प्रतिनिधी, नाशिक रविवारच्या सुटीची धमाल आणि प्रत्येकाच्या चेहऱ्यावर दिसणारी जिंकण्याची जिद्द, 'गेट सेट गो' म्हणताच जोशात धाव घेणारे चिमुरडे पाहून खुलणारे पालकांचे चेहरे असा माहोल रविवारी गंगापूररोडवर दिसला. बच्चेकंपनीला उन्हाळ्याच्या सुटीत धमाल, मस्तीसह व्यायामाचे महत्त्व पटावे त्यासाठी 'सिम्पल स्टेप्स मॅरेथॉन'चे आयोजन करण्यात आले होते. 'महाराष्ट्र टाइम्स कल्चर क्लब' हे 'सिम्पल स्टेप्स मॅरेथॉन'चे कल्चरल पार्टनर आहेत. गंगापूर रोडवरील दिव्यदान मैदान येथून या मॅरेथॉनला सकाळी ६.३० वाजता प्रारंभ झाला. पोलिस आयुक्त विश्वास नांगरे-पाटील यांच्या हस्ते मॅरेथॉनला हिरवा झेंडा दाखविण्यात आला. मॅरेथॉनमध्ये सहभागासाठी बच्चेकंपनी सकाळी ६ वाजेपासून मैदानावर जमल्याचे दिसत होते. पाल्यांचा उत्साह वाढविण्यासाठी पालकही मोठ्या उत्साहात असल्याचे वातावरण होते. मॅरेथॉनच्या सुरुवातीला बच्चे कंपनीचा उत्साह अधिक वाढावा म्हणून झुम्बा डान्स करीत वॉर्म-अप करण्यात आला. ही मॅरेथॉन १०० मीटर, १.५ किलोमीटर, ३ किलोमीटर, ५ किलोमीटर आणि ७ किलोमीटर या गटात घेण्यात आली. दिव्यदान मैदानापासून प्रसाद सर्कल, दत्त चौकमार्गे बापू पूल असा मॅरेथॉनचा मार्ग होता. मॅरेथॉनमध्ये सहभागी रनर्सना 'टाइम चीप' लावण्यात आली होती. सहभागाबद्दल प्रत्येक स्पर्धकाला मेडल देण्यात आले. तसेच स्पर्धकांना कल्चर क्लबतर्फे 'ट्रायल पॅक' देण्यात आले. 'मला जिंकायचं म्हणत' चिमुरड्यांनी उत्साहात मॅरेथॉन पूर्ण केली. मॅरेथॉनच्या वेळी पोलिस आयुक्त नांगरे-पाटील यांच्यासमवेत सेल्फी घेण्यात पालक आणि पाल्य दंग झाल्याचे दिसून आले. -- सायकल अन् फुटबॉल स्टन्ट्स मॅरेथॉननंतर बच्चे कंपनीला सुटी एन्जॉय करता यावी म्हणून सायकल आणि फुटबॉलचे स्टन्ट्स दाखविण्यात आले. चैतन्य देशपांडे या विद्यार्थ्याने फुटबॉलचे विविध स्टन्ट्स करत बच्चे कंपनीचे लक्ष वेधले. सायकलिस्ट विद्यार्थ्यांनी सायकलिंगवर अनोखे स्टन्ट्स करीत सर्वांचे लक्ष वेधले. त्यामुळे मॅरेथॉननंतरही बच्चेकंपनीतील उत्साह अधिक असल्याचे जाणवले. -- हे आहेत विजेते १.५ किलोमीटर : मुले - अविनाश पाटील (प्रथम), विश्वजित ठाकूर (द्वितीय), विहान राजपूत (तृतीय) मुली - आरव जैन (प्रथम), आर्याही देव (द्वितीय), शिव सोमय्या (तृतीय) ३ किलोमीटर : मुले - आदित्य मोरे (प्रथम), प्रणम्य येवले (द्वितीय), निनाद ठोंबरे (तृतीय). मुली - मैथिली बभाने (प्रथम), ईश्वरी दरोडे (द्वितीय), तन्वी सोनार (तृतीय) ५ किलोमीटर : मुले - दक्ष खर्डे (प्रथम), ऋग्वेद शेंडे (द्वितीय), यश अहिरे (तृतीय). मुली - स्मिता मोरे (प्रथम), निशी छोरिया (द्वितीय), रशी (तृतीय) ७ किलोमीटर : मुले - शुभम मुळाणे (प्रथम), विजय सोनवणे (द्वितीय), कृष्णा खुले (तृतीय). मुली - वैष्णवी कातुरे (प्रथम), ऋतुजा माने (द्वितीय), तशी दोरजे (तृतीय)
मोबाइल अॅप डाउनलोड करा आणि राहा अपडेट
