म. टा. खास प्रतिनिधी, नाशिक
श्री व्यंकटेश बालाजी संस्थान ट्रस्टतर्फे आयोजित श्री बालाजी संगीत नृत्य सेवे अंतर्गत कलाहोत्र पर्व २ ची सुरूवात नुकतीच करण्यात आली. मागील २ वर्ष चाललेल्या कलाहोत्र 'पर्व १' ला नाशिक मधील विविध संगीत नृत्य संस्था, गुरु, विद्यार्थी यांनी दिलेल्या भरघोस प्रतिसादानंतर 'पर्व २' चे आयोजन करण्यात आले आहे.
संगीत व नृत्याची जुनी परंपरा असलेल्या श्री व्यंकटेश बालाजी मंदिरात गेल्या काही वर्षांपासून मासिक संगीत सेवा हा उपक्रम राबविला जात आहे. ही संकल्पना विस्तृत करत श्री व्यंकटेश बालाजी संस्थांनतर्फे श्री बालाजी संगीत व नृत्य सेवा, कलाहोत्र हा उपक्रम राबवण्यात येत आहे. हा उपक्रम हा नाशिकमधील शास्त्रीय संगीत व नृत्य या कलांमधील विद्यार्थ्यांसाठी एक मंच तयार व्हावा या हेतूने सुरु झालेला असून, शहरातील विविध संगीत व नृत्य संस्थेमध्ये शिकणारे विद्यार्थी यात सहभागी होत असतात. 'कलाहोत्र पर्व २' ची सुरूवात नुकतीच झाली. यात पुष्कराज भागवत यांनी भूपाळी रागातील भजन सादर केले त्यानंतर राग तिलंगमधील वंदना व राग देसमध्ये झुला सादर केला तर आशीष रानडे यांनी चंद्रकंस रागातील विलंबित एकतालातली 'नाथ मोहि अब ली बेर उबारो तुम नाथन के नाथ स्वामी दाता नाम तिहारो' आणि द्रुत तीनतालातील 'पपीहा न बोले डारन पे' ही बंदिश सादर केली.
यावेळी त्यांना हार्मोनियम वर दिव्या रानडे तर तबल्यावर सुजीत काळे यांनी साथ केली. सोनाली करंदीकर यांनी भरतनाट्यम या नृत्यप्रकारात सरस्वती रागातील, रूपक तालातील 'माता सरस्वती देवी हे कौतुकम आणि गीतम सादर केले. दीपा मोनानी बक्षी यांनी कथ्थक नृत्यप्रकारात, मध्य्लायातील तीनतालात परमेलु, तिहाई, घाट, निकास गतभाव माखनलीला, परन तसेच ठुमक चालत रामचंद्र यांचे सादरीकरण केले. अदिती नाडगौडा पानसे यांनी कथ्थक नृत्यप्रकारात झपताल तालातील श्री राम वंदना, विलंबित थाट, अमाद, तत्कार व मध्यलयीतील प्रीमालू आणि गिनती यांचे सादरीकरण केले. ईश्वरी आणि गौरी दसककर यांनी बिहाग रागातील बंदिश दुर्गे महाराणी, तराना आणि धन्य झालो देवा हा अभंग सादर केला. निवेदिता तांबे यांनी कथ्थक नृत्यप्रकारात वंदना- ताल झपताल, थाट, अमाद, तत्कार व अभिसारिका नायिका हा अभिनय सादर केला. कीर्ती भवाळकर यांनी गणेशवंदना श्लोक, तीनताल विलंबलयीत थाट, तत्कार, अमाद मध्यलयीत तुकडा, फर्माईश चक्रधार, गिनती , तसेच अभिनयात ध्यान लागले रामाचे हा अभंग सादर केला तर प्रीतम नाकील यांनी गायन सेवा दिली
रेखाताई नाडगौडा यांनी कथ्थक नृत्य प्रकारात प्रभू को नियम बदलते देखा या भजनावर प्रभू आणि भक्त यांचे नाते विस्तृत केले. उमा निशाणदार यांनी सतार वादन करत एक भजन सादर केले. संजीवनी कुलकर्णी यांनी कथ्थक या नृत्यप्रकारात झुला सादर केला. शिल्पा देशमुख यांनी भरतनाट्यम या नृत्य प्रकारात शिव महिम्नः प्रस्तुत केले.
प्रिया दाते यांनी भरतनाट्यम नृत्य सादर केले. रागिणी कामतीकर यांनी रामाचे भजन सादर केले. अविराज तायडे यांनी राग सोहोनी त्यात रूपक तालातील बंधीश जीयरारे कल नाही पायो तसेच धृत तीन तालातील बंधीश रंग ना डारो श्यामजीया बंदिशीने कार्यक्रमाचा सुखद शेवट केला. दोन्ही दिवस नितीन पवार यांनी तबला, मोहन उपासनी यांनी बासरी, बल्लाळ चव्हाण यांनी तबला, गौरव तांबे यांनी तबला यांनी उत्तम साथ सांगत केली. तरी कलाहोत्र २ मधील सर्व गुरूंच्या कलासेवेस दोन्ही दिवस नाशिककरांचा उस्फुर्त प्रतिसाद लाभला. आता श्री बालाजी संगीत नृत्य सेवेत पुढील महिन्याच्या दुसऱ्या शुक्रवारी म्हणजेच दिनांक १० मे रोजी पंडित जयंत नाईक व शिल्पा देशमुख यांच्या विद्यार्थ्यांचे सादरीकरण होणार आहे.
