म. टा. वृत्तसेवा, निफाड

येथील न्यायालयात तारखेसाठी हजर करण्यात आलेला कैदी पोलिसांच्या हाताला झटका देऊन दुचाकीस्वाराच्या पाठीमागे बसून पळून गेला. निफाड बस स्थानक आवारात ही खळबळजनक घटना घडली आहे . श्रावण सुरेश पिंपळे उर्फ सावण्या(वय २५) असे या कैद्याचे नाव आहे.

नाशिकरोड कारागृहात शिक्षा भोगत असलेल्या श्रावणला तारखेसाठी निफाड येथील न्यायालयात आणण्यात आले होते. त्याला १८ एप्रिल अशी पुढील तारीख मिळाल्यानंतर पोलिस हवालदार एस. यू. शिरसाठ व कॉन्स्टेबल बी. आर. नाथ यांनी नाशिकरोडला नेण्यासाठी बस स्थानकात आणले. पाणी पिण्याच्या बहाण्याने थांबलेला श्रावण ग्लास फेकून आणि पोलिसांच्या हाताला झटका देऊन पळाला. काही अंतरावर एका हेल्मेट घातलेल्या चालकाच्या दुचाकीवर बसून तो फरार झाला .

पोलिसांनी पाठलाग केला पण हा कैदी फरार होण्यात यशस्वी झाला. बस स्थानक परिसरात आलेल्या दुचाकीवरून तो फरार झाल्याने हा पूर्वनियोजित डाव असल्याची चर्चा सुरू झाली आहे. दरम्यान पोलिसांनी नाकाबंदी करीत कैद्यासह फरार होण्यासाठी मदत करणाऱ्या दुचाकीचालकाचाही शोध सुरू केला आहे. श्रावणने अंगात काळ्या रंगाचा शर्ट आणि राखाडी रंगाची पॅन्ट परिधान केलेली आहे. त्याच्यावर जिल्ह्यात तसेच जिल्ह्याबाहेर अनेक जबरी गुन्हे दाखल आहेत. गेल्या दोन वर्षांपासून तो नाशिकरोड कारागृहात न्यायालयीन कोठडीत होता .

म. टा. खास प्रतिनिधी, नाशिक राष्ट्रीय विकास मंडळ, संचलित नववर्ष यात्रा स्वागत समितीतर्फे विविध सांस्कृतिक कार्यक्रमांचे आयोजन करण्यात आले असून, गुरुवारी राजमाता जिजाऊसाहेब यांच्या ४२१ व्या जयंती वर्ष निमित्ताने २५,००० चौरस फुटाची महारांगोळी पाडवा पटांगण, गोदाघाट येथे रेखण्यात आली. अंजनेरी येथील विवेकानंद आश्रमाचे स्वामी अखंडानंद, सिनेट सदस्य रुपाली खैरे, समाजसेविका वृंदा लवाटे, वीर पत्नी रुपाली बच्छाव यांच्या उपस्थितीत गुढी पूजनाने महारांगोळीस प्रारंभ करण्यात आला. यावर्षी आपले सण आपली संस्कृती हा महारांगोळीची विषय असून मानवी जीवन, संस्कृती व अध्यात्म यांचे सामंजस्य महारांगोळीतून दर्शविण्याचा प्रयत्न करण्यात आला आहे. मानवी शरीरातील सप्तधातू हे विविध सात रंगांनी दर्शविण्यात आले आहेत. उत्पत्ती, स्थीती आणि लय यांची दैवते म्हणून ब्रह्मा, विष्णू, महेश यांची मूर्ती ठेवण्यात आली आहे. यासोबत वात-पित्त-कफ हे त्रिदोष, सत्व-रज-तम हे तीन गुण, चतुर्वेद-चतुर्पुरुषार्थ-चतुराश्रम यांचे दिग्दर्शन या रांगोळीतून करण्यात आले असून, या भव्य रांगोळीला समर्पण भावाचे प्रतीक असणाऱ्या कासवाचा आकार देण्यात आला आहे. भारतीय संस्कृतीतील त्यागाचे प्रतीक असलेल्या भगव्या रंगाला भव्य प्रमाणात प्रतिनिधीत्व देण्यात आले आहे. याशिवाय महारांगोळी पूर्वी शहरातून गटनिहाय ज्या रांगोळ्या काढण्यात आल्या होत्या त्यातील चरित्र निर्माण, कौटुंबिक स्नेहभाव, स्वावलंबन, आरोग्यविचार, कृतज्ञता, नारी शक्ती आदी विषयांना सुद्धा या महारांगोळीत महत्त्वाचे स्थान देण्यात आले.

पाणीपुरवठा विभागाच्या अहवालातील धक्कादायक माहिती

..

म. टा. खास प्रतिनिधी, नाशिक

नागरिकांना स्वच्छ आणि शुद्ध पाणीपुरवठा करीत असल्याचा महापालिकेचा दावा फोल ठरला असून, गेल्या ११ महिन्यांमध्ये शहरातील विविध भागांत तब्बल ११४ वेळा दूषित पाणीपुरवठा झाल्याची माहिती महापालिकेच्या पाणीपुरवठा विभागाच्या अहवालातून समोर आली आहे. शहरात गावठाण आणि जुने नाशिक भागात सर्वाधिक ३० वेळा दूषित पाणीपुरवठा झाला आहे. शहरात सप्टेंबरमध्ये सर्वाधिक दूषित पाणीपुरवठा झाल्याचे अहवालात नमूद केले आहे. या दूषित पाणीपुरवठ्यामुळे मात्र नाशिककरांचे आरोग्य धोक्यात असल्याचे समोर आले आहे.

सुमारे वीस लाख लोकसंख्या असेलल्या नाशिक शहराला गंगापूर आणि दारणा धरणातून पाणीपुरवठा केला जातो. महापालिकेच्या सहा जलशुद्धीकरण केंद्रात पाण्यावर प्रक्रिया करून ते शहरातील विविध भागातील सुमारे १०९ जलकुंभांपर्यंत पोहोचवले जाते. या जलकुंभातून सुमारे १८०० किलोमीटर लांबीच्या जलवाहिन्यांद्वारे ते नागरिकांच्या घरोघरी पोहोचविले जाते. नागरिकांना शुद्ध पाणीपुरवठा होतोय की नाही याची पडताळणी पालिकेच्या पाणीपुरवठा विभागाच्या वतीने केली जाते. नागरिकांना दूषित पाणीपुरवठा होऊ नये तसेच, पाण्यासंदर्भात कोणी घातपाती कारवाया करू नये, याची दक्षता पालिकेकडून घेतली जाते. पालिकेकडून दरमहा शहरातील पाण्याचे नमुने तपासले जातात. पाणीपुरवठा विभागातर्फे पंपिंग स्टेशन ते नागरिकांच्या घरापर्यंत पुरविल्या जाणाऱ्या पाण्याची विविध पातळ्यांवर वेळोवेळी तपासणी केली जात असते. या माध्यमातून गेल्या ११ महिन्यांत तब्बल १०,४४१ पाणी नमुन्यांची तपासणी केली गेली. यापैकी ११४ ठिकाणचे पाणी दूषित असल्याचे आढळून आले, तर १० हजार ३,३२६ पाणीपुरवठ्याचे नमुने शुद्ध असल्याचे आढळून आले. क्लोरिनेशनच्या प्रक्रियेत अडथळा निर्माण होणे, व्हॉल्व तसेच जलवाहिनी लिकेज होऊन त्यात सांडपाणी प्रवाहित होणे, जंतूंचा संसर्ग होणे, जलकुभांचे झाकण उघडे राहून त्यात पक्षी मरून पडणे आदी कारणांमुळे दूषित पाणीपुरवठा होत असल्याचा दावा पालिकेने केला आहे.

...

सप्टेंबरमध्ये सर्वाधिक दूषित पाणी

महापालिकेच्या पाणीपुरवठा विभागाने केलेल्या तपासणीत ११४ पैकी सप्टेंबर २०१८ मध्ये सर्वाधिक ४६ पाणीनमुने दूषित असल्याचे आढळून आले. विशेषत: ११४ पैकी सर्वाधिक दूषित ३० नमुने हे जुने नाशिक, रविवार कारंजा, द्वारका परिसरात आढळून आले. या भागातील पाइपलाइन खराब झाल्याने दूषित पाणीपुरवठा होत असल्याचे समोर आले आहे. सातपूरमध्ये सर्वाधिक कमी दूषित पाण्याचे नमुने आढळून आले आहेत.

म. टा. खास प्रतिनिधी, नाशिक

एकमेकांना वाचविण्याच्या प्रयत्नात पती-पत्नीसह पुतण्याचा खाणीत बुडून मृत्यू झाल्याची दुर्दैवी घटना गुरुवारी (ता. ४) सकाळी दहाच्या सुमारास सय्यद पिंप्री येथे घडली. सविता नंदू वराडे (वय ३०), नंदू वराडे (३४) आणि केशव वराडे (२३) अशी बुडून मृत्युमुखी पडलेल्या तिघांची नावे आहेत.

सय्यदपिंप्रीजवळ खाणीत पाणी साचले असून, तिथे सविता कपडे धुण्यासाठी गेल्या. एक चादर पाण्यात थोडी दूर गेली. ती घेण्यासाठी पुढे वाकलेल्या सविता यांचा तोल गेल्याने बुडाल्या. त्याच वेळी सविता यांना वाचविण्यासाठी पती नंदू वराडे यांनी पाण्यात उडी घेतली. मात्र, त्यांना पोहता येत नसल्याने दोघांनी बचावासाठी आरडाओरड केली. हा प्रकार पाहून त्यांचा पुतण्या केशव बचावासाठी पुढे आला. त्यानेही पाण्यात उडी घेतली. मात्र, खोल पाणी आणि चिखल यात केशव फसला. खाणीजवळ सुरू असलेल्या या मृत्युतांडवाची माहिती ग्रामस्थांना समजली. त्यांनी घटनास्थळी धाव घेतली. मात्र, तत्पूर्वीच तिघांचा बुडून मृत्यू झाला. स्थानिक नागरिक आणि बचाव पथकाला तब्बल अडीच तासांच्या शोधमोहिमेनंतर तिघांचे मृतदेह बाहेर काढण्यात यश आले. या प्रकरणी तालुका पोलिस ठाण्यात आकस्मिक मृत्यूची नोंद करण्यात आली असून, सहाय्यक पोलिस निरीक्षक सार्थक नेहते तपास करीत आहेत.

श्वानाच्या पिलास

रॉडने मारहाण

नाशिक : रॉडने मारहाण करीत श्वानाच्या पिलास गंभीर जखमी केल्याप्रकरणी भरत नेरकर (रा. एकदंत अपार्ट, मखमलाबाद) याच्याविरूद्ध प्राणी क्रुरता निवारण कायद्यानुसार गुन्हा दाखल करण्यात आला. या प्रकरणी शरण्या शशिकांत शेट्टी यांनी म्हसरूळ पोलिस ठाण्यात फिर्याद दिली. नेरकर यांनी १ एप्रिल रोजी सायंकाळी सव्वापाच वाजेच्या सुमारास घरासमोर बसलेल्या श्वानाच्या पिलास लोखंडी रॉडने जबर मारहाण करीत जखमी केले. या घटनेची माहिती मिळताच शेट्टी यांनी म्हसरूळ पोलिस ठाणे गाठून फिर्याद दिली. शेट्टी या भटक्या श्वानांच्या पूनर्वसनासाठी काम करतात.

'मटा'संगे शिका डेझर्ट मेकिंग

म. टा. प्रतिनिधी, नाशिक

डेझर्ट हा सर्वांच्याच आवडता प्रकार. लहानांपासून मोठ्यांपर्यंत सर्वांनाच गोड डेझर्ट आकर्षित करत असतात. हल्ली तर परदेशात आवडीचे असलेले डेझर्ट आपल्याकडेही सहजपणे मिळतात. परंतु, असे डेझर्ट घरी बनविण्याची मजा वेगळीच असते. हे ओळखत महाराष्ट्र टाइम्स कल्चर क्लबतर्फे डेझर्ट मेकिंग वर्कशॉपचे आयोजन करण्यात आले आहे. ७ एप्रिल रोजी दुपारी ३ वाजता हॉटेल रॉयल हेरिटेज, शालिमार येथे हे वर्कशॉप होणार आहे. फज ब्राउनी, रेड वेलवेट लावा केक, चिया फ्रुट कस्टर्ड पुडिंग असे विविध प्रकारचे डेझर्ट रितू मेहरा यावेळी शिकविणार आहेत. कल्चर क्लब सदस्यांसाठी १०० रुपये तर इतरांसाठी ४०० रुपये शुल्क आकारण्यात येणार आहे. वर्कशॉपमध्ये सहभागी होण्यासाठी नावनोंदणी करणे गरजेचे असून ९४२२५१३५६९ या क्रमांकावर किंवा महाराष्ट्र टाइम्स, दुसरा मजला, अल्फा स्केअर, डिसुझा कॉलनी, कॉलेज रोड या पत्त्यावर संपर्क दुपारी १ ते ५ वेळेत संपर्क साधावा.

कर्ज नूतनीकरण व वाढीव कर्जासाठी मिळेना सातबारा

...

म. टा. वृत्तसेवा, निफाड

ऑनलाइन सातबारा उतारे आणि नोंदी मिळत नसल्याने जिल्ह्यातील शेतकरीवर्ग हवालदिल झाला आहे. गेल्या आठ ते दहा दिवसांपासून ऑनलाइन प्रक्रियेतील सर्व्हर डाऊन झाल्याने ऑनलाइन नोंदीचे बारा वाजले आहेत.

काही संस्थांमध्ये मार्च एंडची प्रक्रिया अजूनही सुरू आहे. शेतकऱ्यांना आपल्या कर्जाचे नूतनीकरण व नवीन कर्ज घेण्यासाठी सातबारा उतारा व ऑनलाइन नोंदी आवश्यक आहेत. मात्र सर्व्हर डाऊन असल्याचे तलाठी आणि मंडळ अधिकारी यांच्याकडून सांगितले जात आहे. त्यामुळे शेतकरीवर्ग हतबल झाला आहे. महसूल विभागाने लोकसभा निवडणुकीच्या कामाबरोबरोरच मतदान करणाऱ्या शेतकऱ्यांच्या समस्याकडे लक्ष देण्याची गरज असल्याच्या भावना शेतकऱ्यांनी मांडल्या.

शासनाने लोकांना घरच्या घरी उतारे उपलब्ध व्हावे, यासाठी सात वर्षांपूर्वी ऑनलाइन प्रक्रियेला सुरुवात केली. बहुतेक तालुक्यांचे काम पूर्ण झाले आहे. तलाठी, सर्कल या सर्वांनी सातबाराचे रेकॉर्ड संगणकीकृत केले. यात बराच काळ गेला. यामुळे काहीअंशी शेतकऱ्यांचा फायदाही झाला. सद्यस्थितीत सर्व्हर डाऊनमुळे तोटा होत असल्याचे समोर येत आहे.

जिल्ह्यात गेल्या आठ ते दहा दिवसांपासून सर्व्हर डाऊन असल्यामुळे शेतकऱ्यांच्या ऑनलाइन नोंदी होणे तर दूरच पण सातबारा उतारा मिळणेही अवघड होऊन बसले आहे. मार्च महिना नुकताच संपला असून, शेतकऱ्यांना विविध संस्था व बँकाकडून घेतलेले कर्ज नूतनीकरण करावयाचे, तर काही शेतकऱ्यांना नवीन कर्ज घ्यावयाचे आहे. आपल्या शेतीचे नजरगहाण व डिक्लेरेशन केल्याशिवाय कोणतीही बँक जादा कर्ज देत नाही. त्यासाठी ऑनलाइन नोंदीची गरज आहे. अनेक शेतकऱ्यांना वारस नोंद, शेती वाटपाची नोंद, विविध संस्थांचे नाव कमी करण्याच्या नोंदी टाकायची गरज आहे. मात्र सर्व्हर डाऊनमुळे नोंदीचा खेळखंडोबा झाला आहे. या नोंदी मिळवण्यासाठी शेतकरी तलाठ्याकडे चकरा मारून वैतागला आहे.

..

कांदा उत्पादकांनाही फटका

राज्य सरकारने कांदा उत्पादक शेतकऱ्यांना प्रतिक्विंटल २०० रुपये अनुदान जाहीर केले. त्यासाठी तीन वेळा योजनेच्या तारखांत वाढ केली. शेवटीची मुदत ३१ मार्च होती. मात्र सर्व्हर डाऊनमुळे हजारो शेतकऱ्यांना अर्ज भरता आला नाही. त्यामुळे मिळणाऱ्या तुटपुंज्या अनुदानाला मुकावे लागणार आहे. त्यामुळे अनुदानाच्या अर्जासाठी १५ एप्रिल ही मुदत वाढवावी व तेथून पुढे बाजार समित्यांनाकडून जिल्हा निबंधकांना १५ दिवस माहिती पाठवायला द्यावेत, अशी मागणी शेतकऱ्यांनी केली आहे.

निफाड-पिंपळगाव रोडवर अघोषित मेगाब्लॉक

म. टा. वृत्तसेवा, निफाड

निफाड पिंपळगाव रस्त्याचे प्रस्तावित रुंदीकरणाच्या पूर्वतयारीसाठी रस्त्याच्या दुतर्फा असणाऱ्या झाडांची कत्तल सुरू आहे. मात्र ही झाडे तोडताना कोणतीही पूर्वसूचना न दिल्याने तसेच पर्यायी वाहतुकीची व्यवस्था न केल्याने या मार्गावर अघोषित मेगाब्लॉकचा तापदायक अनुभव या मार्गावर प्रवास करणाऱ्यांना येत आहे.

सुरत-शिर्डी मार्गावर सतत वाहतुकीची वर्दळ असते. या मार्गाच्या रुंदीकरणाचे काम सुरू झाले आहे. हे काम करण्यापूर्वी रुंदीकरणात अडसर असणाऱ्या रस्त्याच्या दोन्ही बाजूकडील झाडे जमीनदोस्त केली जात आहेत. या मार्गावरील लिंब, वड, पिंपळ अशी १०० वर्षे वयाची डेरेदार वृक्ष आहेत. ती जमिनीवर कटरच्या सहाय्याने पाडल्यानंतर संपूर्ण रस्ता बंद होतो. तोडलेल्या झाडांच्या संगळ्या फांद्या कापून काढेपर्यंत रस्त्याच्या दुतर्फा वाहनांच्या मोठ्या रांगा लागतात. यामध्ये अर्धा ते पाऊण तास वेळ जातो, अशा तक्रारी प्रवाशांकडून करण्यात येत आहेत. वास्तविक अशी मोठी झाडे तोडायची असतील तर या ठिकाणी तात्पुरती पर्यायी व्यवस्था निर्माण करायला हवी. मात्र संबंधितांकडून अशी कोणतीही व्यवस्था या ठिकाणी दिसत नाही. शिवाय दोन्ही बाजुंनी वाहनचालकांना या बाबतीत असणाऱ्या सूचनाही पाहायला मिळत नाही. रात्री काही झाडांचे मोठमोठे ओंडके रस्त्यावरच असल्याने अनेक छोटे-मोठे अपघात होत आहेत. रस्ता रुंदीकरणाचे काम घेतलेल्या कंपनीने रस्ता सुरक्षेबाबत काळजी घ्यावी अशी मागणी नागरिक करीत आहेत.

दर यंदा निर्यात वाढली; मात्र भाव पडलेलेच

म. टा. वृत्तसेवा, निफाड

यंदा जिल्ह्यावर दुष्काळाचे सावट असले तरी जानेवारी, फेब्रुवारीत सुदैवाने अवकाळी पाऊस न पडल्यामुळे द्राक्ष उत्पादनात कमालीची वाढ झाली आहे. त्यामुळे यंदा भारतातून परदेशात होणारी द्राक्ष निर्यात यंदा वाढली आहे. द्राक्ष हंगामाच्या याच टप्प्यावर गेल्या वर्षी २०१७-१८ मध्ये ८५८१७.४३९ मेट्रिक टन निर्यात झाली होती. तर यावर्षी २०१८-१९ मध्ये १०८८९६.४९० मेट्रिक टन निर्यात झाली. मागील वर्षी ६५४१ इतके कंटेनर द्राक्ष निर्यात झाले होते, तर यंदा ८०५९ कंटेनर निर्यात झाले आहे. म्हणजेच यावर्षी २३०७९ मेट्रिक टन अधिक निर्यात झाली आहे. अजून १५ एप्रिलपर्यंत द्राक्ष निर्यात हंगाम सुरू राहणार आहे.

यावर्षी मात्र निर्यातक्षम द्राक्ष उत्पादकांना जो भाव अपेक्षित होता तो मिळाला नाही. मागील वर्षी १०० रुपयांपासून सुरू झालेले निर्यायक्षम द्राक्ष मार्केट ६० ते ६५ रुपयांपर्यंत टिकून होते. यावर्षी मात्र उत्पादन वाढल्यामुळे अवघा ४८ ते ५० रुपये इतकाच भाव मिळत असल्याचे निर्यातक्षम द्राक्ष उत्पादकांनी सांगितले. सर्वाधिक निर्यात नेदरलँडमध्ये ६३७२६ मेट्रिक टन झाली. तर जर्मनीत १८४३३ मेट्रिक टन निर्यात झाली. आतापर्यंत २० देशांमध्ये १०८८९६.४९० मेट्रिक टन निर्यात झाली.

उत्तर भारतात मागणी वाढली

उत्तर भारतात श्रीराम जन्मोत्सवसह इतर सण उत्सव आणि वाढलेल्या तापमानामुळे द्राक्षाची मागणी वाढली आहे. देशांतर्गत बाजारभाव वाढल्याने निर्यातक्षम द्राक्षाचेही भाव वाढले असले तरी अवघ्या १५ दिवसांत २७ रुपये असलेले देशांतर्गत मार्केट ३५ ते ४० रुपयांपर्यंत पोहचले आहे. दहा दिवसांपूर्वी १० ते १२ रुपये किलो मिळणारे द्राक्षमनी २० रुपयांपर्यंत पोहचले आहेत. त्यामुळे बेदाणाही यंदा महाग असेल तर निर्यातक्षम माल ५० रुपयांपर्यंत गेला आहे.

तापमान वाढल्याने उत्तरेत द्राक्षाची मागणी वाढल्याने सध्या देशांतर्गत बाजारभाव वाढले आहेत. सुरुवातीला थंडी असल्याने आणि एकाच वेळी जास्त उत्पादन आल्याने निर्यातक्षम द्राक्षालाही भाव कमी मिळाले. सध्या निर्यात सावकाश सुरू आहे १५ एप्रिलपर्यंत निर्यात सुरू राहील. -जगणदादा खापरे, अध्यक्ष, द्राक्ष निर्यातदार संघटना

निर्यातक्षम द्राक्ष उत्पादनासाठी येणाऱ्या खर्चाच्या पटीत यावर्षी भाव न मिळाल्याने निर्यातक्षम द्राक्ष उत्पादक समाधानी नाहीत. गेल्या वर्षीच्या तुलनेत २० रुपयांपर्यंत यावर्षी घसरण झाली. निर्यातदारांनी द्राक्ष उत्पादकांचे कष्ट लक्षात घेऊन चांगला दर मिळण्यासाठी प्रयत्न व्हावे.--बाळासाहेब सानप, द्राक्ष उत्पादक

देश निर्यात (मेट्रिक टन)

नेदरलँड - ६३७२६.०२८ (४५७४ कंटेनर)

जर्मनी - १८४३३.२०९ (१३८४ कंटेनर)

यूके - १६७४९.०४९ (१२५७ कंटेनर)

डेन्मार्क - २१५८.४१० (१६८) कंटेनर

फिनलँड-१५०७ (१२१) कंटेनर

लॅट्विया -९१४ (५२ कंटेनर)

लिथुनिया ६३४ (४४ कंटेनर)

फ्रांस ७५९ (५० कंटेनर)

नॉर्वे ५७६ ( ४८ कंटेनर)

बेल्जियम ५५१ (४४ कंटेनर)

स्वित्झर्लंड ४३७ (३६ कंटेनर)

स्वीडन ४३० (३४ कंटेनर)

स्पेन ३९९ (२९ कंटेनर)

आयर्लंड ३४८ (२६ कंटेनर)

ऑस्ट्रिया ३३९ (२५ कंटेनर)

पोर्तुगाल ३१९ (२२ कंटेनर)

इटली ३०४ (२४ कंटेनर)

रोमानिया १२६ (८ कंटेनर)

क्रेज १०१ (८ कंटेनर)

ग्रीस ६३ (४ कंटेनर)

--------------------------------------------------------------

एकूण १०८८९६.४९० मेट्रिक टन आणि ८०५९ कंटेनर

एप्रिलमध्ये पुन्हा ब्रेकची शक्यता

म. टा. खास प्रतिनिधी, नाशिक

सातपूर येथील 'बॉश' या बहुराष्ट्रीय कंपनीत नऊशेहून अधिक ऑन जॉब ट्रेनिंग (ओजीटी) कर्मचाऱ्यांना ब्रेक दिल्यानंतर आता कायमस्वरुपी कर्मचाऱ्यांनाही एप्रिलमध्ये असाच ब्रेक देण्यात येणार असल्याची चर्चा आहे. त्यामुळे कायमस्वरुपी कामगारही धास्तावले आहे. अर्थात, 'पे ऑफ' असल्याने त्यांना आर्थिक फटका बसणार नसला तरी हातात काम मात्र राहणार नाही. नाशिकमध्ये अशाच अनेक मोठ्या कंपन्यातही असाच ब्रेक कामगारांना दिला जाणार असल्याने उद्योग वर्तुळात चिंतेचे वातावरण आहे.

केंद्र सरकारने चारचाकी वाहनांसाठी बीयू सिक्स प्रणाली सक्तीची केल्याने हा परिणाम असल्याचे बोलले जात आहे. मात्र, मंदीचे सावट वाहन विक्रीवर आल्याने कामगारांच्या हातातले काम निसटू लागले आहे. एकीकडे देशभर निवडणुकीत रोजगार दिल्याचा दावा सरकारतर्फे केला जात असतांना बॉश सारख्या कंपन्यामधून रोजगारांची संधी हिरावली गेली आहे. याअगोदर कायमस्वरुपी काही कामगारांना २५ ते ३० मार्चपर्यंत असाच 'पे ऑफ' देण्यात आला होता. त्यामुळे कामगारांची चिंता अधिकच वाढली आहे.

बायू सिक्स प्रणालीमध्ये कारच्या इंजक्टरचे डिझाइन बदलावे लागणार असल्यामुळे बाँशने नवीन तंत्राचा वापर करत नवीन मशिनही आणल्या आहे. या नवीन मशिनवर उत्पादन बदलाने हा ब्रेक असल्याचे कंपनी सांगत असली तरी एकूणच मंदीचा हा फटका आहे. नोटाबंदीनंतर औद्योगिक क्षेत्रात ही मंदीची लाट आली त्यानंतर ती अद्याप सावरली गेली नाही. त्यामुळे हा फटका आता कामगारांना बसू लागला आहे.

निवडणुकीवर परिणाम

ऑन जॉब ट्रेनिंगचे कामगार नाशिक महसूल विभागाचे असल्याने आठ लोकसभा मतदारसंघात त्याचे पडसाद पडण्याची शक्यता आहे. नाशिक, नगर, धुळे, जळगाव व नंदुरबार येथील हे कामगार आहे. त्यामुळे सत्ताधारी भाजपमध्ये सुद्धा चिंतेचे वातावरण आहे. कामगार घरी गेल्याने त्याची चर्चा गावभर होते आणि त्यातून चुकीचा संदेश जातो.

संधी हुकणार

ऑन जॉब ट्रेनिंगचे कामगार हे आयटीआय उत्तीर्ण आहे. त्यांना बॉशने ट्रेनिंग देऊन त्यांना रोजगार दिला आहे. सात वर्षे काम गेल्यानंतर त्यांना कायम होण्याची संधी आहे. पण, त्यांना आता ब्रेक दिल्याने त्यांची संधी हुकणार असल्याचे बोलले जात आहे.

म. टा. खास प्रतिनिधी, नाशिक

दिंडोरी लोकसभा मतदारसंघात सध्या जाऊबाई जोरात अशी चर्चा आता रंगू लागली आहे. भाजपच्या उमेदवार डॉ. भारती पवार यांच्याविरुद्ध त्यांच्या जाऊबाई माजी जिल्हा परिषद अध्यक्षा जयश्री पवार यांनी जोरदार आघाडी उघडल्याने राष्ट्रवादीचे घड्याळही आता धावू लागले आहे. त्यांना पती व जिल्हा परिषद सदस्य नितीन पवार यांचीसुद्धा साद असल्यामुळे पवार घराण्यातील अंतर्गत भांडण आता राजकीय पटलावर आले आहे.

माजी मंत्री दिवंगत ए. टी. पवार यांच्या घराण्यातील जावांमधील भांडण जिल्ह्यात नवीन नाही. जिल्हा परिषद अध्यक्ष निवडणुकीत हे भांडण ए. टी. पवार असतानाच समोर आले होते. त्यावेळी दोन्ही जावा या पदासाठी इच्छुक होत्या. पण, त्यावेळी जयश्री पवार यांचे पारडे जड ठरले व त्यांना जिल्हा परिषदेचे अध्यक्षपद मिळाले. त्यानंतर २०१४ मध्ये झालेल्या दिंडोरी लोकसभा मतदारसंघात राष्ट्रवादीने नरहरी झिरवाळ यांच्याऐवजी पवार घराण्यातून उमेदवारी देण्याचा निर्णय घेतला. त्यावेळी या जावांचे भांडण पुन्हा समोर आले. त्यानंतर राष्ट्रवादीने डॉ. भारती पवार यांना संधी दिली. २०१९ मध्येही डॉ. भारती पवार यांना तिकीट देण्याचे राष्ट्रवादीने जवळपास निश्चित करून त्यांना प्रदेश उपाध्यक्ष केले. पण, घरातील भांडण पुन्हा समोर आल्यामुळे त्यांचा पत्ता कट झाला. त्यानंतर शिवसेनेतून आलेल्या माजी आमदार धनराज महाले यांना संधी मिळाली.

--

शेवटी 'कमळा'चा आसरा

राष्ट्रवादीतून संधी हुकल्यामुळे डॉ. भारती पवार यांनी 'कमळ' हातात घेत पुन्हा चेकमेट दिला. पण, यावेळी त्यांच्याबरोबर घरातील त्यांचे दीर व जाव मात्र राष्ट्रवादीत राहिल्यामुळे आता पक्षीय पातळीवर हे भांडण समोर दिसू लागले आहे. त्यात दोन जावा एकमेकांच्या विरोधातही समोर आल्या आहेत.

म. टा. खास प्रतिनिधी, नाशिक

स्व. शिवसेनाप्रमुख बाळासाहेब ठाकरे यांनी स्थापन केलेल्या कार्टुनिस्‍ट्स कंबाईन या संस्थेचे वार्षिक व्यंगचित्रकार संमेलन व प्रदर्शन नाशिकच्या कुसुमाग्रज स्मारकात १३ व १४ एप्रिल रोजी होणार आहे. याच कार्यक्रमात प्रसिद्ध व्यंगचित्रकार ज्ञानेश सोनार यांना जीवनगौरव पुरस्‍काराने सन्‍मानित करण्‍यात येणार आहे. या पुरस्‍काराचे वितरण माजी उपमुख्यमंत्री छगन भुजबळ यांच्‍या हस्ते होणार आहे.

व्यंगचित्र प्रदर्शनाचे उद्घाटन शनिवारी (दि. १३) सकाळी साडेदहा वाजता होईल. त्‍यानंतर ११ वाजता व्‍यंगचित्रकार ज्ञानेश सोनार यांना जीवनगौरव पुरस्कार वितरण सोहळा आणि त्यानंतर त्‍यांची मुलाखत घेतली जाणार आहे. प्रथम सत्रात प्रसिद्ध व्यंगचित्रकार चारुहास पंडित व प्रशांत कुलकर्णी यांचे मार्गदर्शन होईल. 'आपले व्यंगचित्र आपल्या समोर' हा कार्यक्रम सादर होईल. रसिकांना आपले व्यंगचित्र काढण्याची संधी मिळेल. संमेलनात रविवारी (दि. १४) घनश्याम देशमुख, विनय चानेकर, वैजनाथ दुलंगे हे व्यंगचित्र व कथाचित्रे रंगसंगती या विषयावर मार्गदर्शन करतील. संमेलनात परिसंवाद होतील तसेच नवोदित व्यंगचित्रकारांना मार्गदर्शन करण्यात येईल.

माजी अध्यक्ष विवेक मेहेत्रे व माजी कार्यकारणी सदस्यांचाही सत्कार करण्यात येणार असल्याची माहिती अध्यक्ष संजय मिस्त्री आणि कार्टूनिस्‍ट्स कंबाईनचे कार्यकारणी सदस्य अनंत दराडे, योगेंद्र भगत, राजीव गायकवाड, अतुल मुळ्ये यांनी दिली. नाशिककरांनी या संमेलनाचा लाभ घ्यावा, असे आवाहन कार्टूनिस्‍ट्स कंबाईनचे माजी उपाध्यक्ष रवींद्र बाळापूरे आणि इतरांनी केले आहे.

७० जणांच्या व्यंगचित्रांचा सहभाग

प्रदर्शनात देशभरातील ७० हून अधिक व्यंगचित्रकार सहभागी होणार आहेत. दिवंगत व्यंगचित्रकारांचीही व्यंगचित्रे या प्रदर्शनात असतील. त्यात प्रामुख्याने बाळासाहेब ठाकरे, श्रीकांत ठाकरे, आर. के. लक्ष्मण यांच्यासह इतर लोकप्रिय व्यंगचित्रकारांचा समावेश आहे. या वर्षी प्रथमच 'निवडणूक व दहशतवाद' या दिलेल्या विषयावर व्यंगचित्रे प्रदर्शनात मांडली जाणार आहेत.

म. टा. वृत्तसेवा, नाशिकरोड

नाशिकरोडच्या प्रभाग २० मध्ये आधारकार्ड सेंटरमध्ये अर्ज उपलब्ध करण्याची मागणी मनविसेतर्फे नाशिकरोड प्रमुख नितीन धानापुणे, शशी चौधरी, सागर दाणी, गुड्डू शेख, प्रशांत गायकवाड, स्वप्निल विभांडिक, बाजारीव मते आदींनी केली आहे.

प्रभाग २० मधील ताराराणी सभागृहात आधारकार्ड सेंटर आहे. विविध कामांसाठी आधारकार्ड गरजेचे असल्याने ते काढण्यासाठी नागरिकांची गर्दी असते. सकाळी दहा ते सायंकाळी अशी या सेंटरची वेळ आहे. नवीन आधारकार्ड काढणे, जुने कार्ड अपडेट करणे, चुका दुरुस्त करून घेणे आदी कामे येथे केली जातात. मात्र, नागरिक जेव्हा आधारकार्ड काढायला जातात, तेव्हा त्यांना त्याच्या अर्जासाठी अटल ज्ञानसंकुलात जाण्यास सांगितले जाते. सेंटरपासून ज्ञानसंकुल थोडे दूर आहे. तेथे गेल्यावर अनेक चौकशा केल्यानंतर अर्ज दिला जातो. तो घेऊन आधारकार्ड सेंटरमध्ये येईपर्यंत नंबर गेलेला असतो, गर्दी वाढलेली असते. अर्जात चुक असेल तर नव्या अर्जासाठी भरउन्हात महिला व ज्येष्ठ नागरिकांना पुन्हा पायपीट करावी लागते. ताराराणी सभागृहात सुरक्षा रक्षक व प्रिंटर आहे. तेथेच अर्ज उपलब्ध केल्यास नागरिकांची मोठी सोय होईल, त्यांची उन्हातील पायपीट थांबेल, अशी मागणी निवेदनात करण्यात आली आहे.