निवडणूक, दुष्काळ पाहणी दौऱ्यात जिल्हाधिकाऱ्यांचा सूचना
टीम मटा
सध्या लोकसभा निवडणूक आणि दुष्काळनिवारण असे दोन कामे प्राशासकिय अधिकाऱ्यांना प्राधान्याने करायची आहेत. प्रत्येक शासकीय विभाग प्रमुखांसह सर्वच कर्मचाऱ्यांनी आदर्श आचारसंहितेचे काटेकोर अंमलबजावणी करावी. मात्र आचारसंहिता, निवडणूक कामांचा बागुलबुवा न करता दुष्काळी परिस्थितीत पाणीटंचाई, चाराटंचाईकडे गांभीर्याने लक्ष द्या, त्यावर तातडीने उपाययोजना करा, अशा शब्दात जिल्हाधिकारी सुरज मांढरे यांनी शुक्रवारी निफाड, नांदगाव, येवला आणि सिन्नर येथे शासकीय अधिकाऱ्यांना सूचना केल्या.
टँकरच्या प्रस्तावांना देणार प्राधान्य
मनमाड : दुष्काळ व टंचाईग्रस्त नांदगाव तालुक्यात पाण्याच्या टँकरबाबत प्रस्ताव आल्यास ते तातडीने जिल्हा प्रशासनाकडे पाठवावेत. त्यांना तातडीने मंजुरी दिली जाईल. तालुक्यातील चाराटंचाई निवारणासाठी तहसील, पंचायत समिती प्रशासनाने सजग राहावे. पाणी व चाराप्रश्नी कोणतीही हयगय किंवा चालढकल करू नये, अशा सूचना जिल्हाधिकारी सुरज मांढरे यांनी नांदगाव येथे अधिकाऱ्यांना दिल्या.
जिल्हाधिकारी मांढरे शुक्रवारी सकाळी नांदगाव दौऱ्यात तहसील कार्यालय येथे बोलावलेल्या आढावा बैठकीत बोलत होते. नांदगाव तालुक्यात पाणी व चाराटंचाईचा प्रश्न तीव्र आहे. याबाबत तालुका प्रशासनाने जागरूक राहून टंचाई निवारणासाठी तातडीने उपाययोजना कराव्यात, असे मांढरे यांनी सांगितले. तालुकास्तरीय दुष्काळ आढावा बैठकीत जिल्हाधिकाऱ्यांनी तालुक्यातील दुष्काळ स्थिती जाणून घेत उपाय योजनांबाबत अधिकाऱ्यांना मार्गदर्शन केले. या वेळी नांदगाव तालुक्यात २२ गावे, १७१ वाड्या तहानलेल्या आहेत. या ठिकाणी ३१ टँकरने
पाणीपुरवठा होत असल्याची माहिती तहसीलदार मनोज देशमुख यांनी दिली. तालुक्यातील जनावरांची संख्येचा विचार करता एप्रिलमध्ये चारा टंचाईची समस्या आजच्या पेक्षा मोठ्या प्रमाणात जाणवेल, असे चित्र असल्याने त्या दृष्टीने पावले उचलण्याची गरज असल्याचे बैठकीत स्पष्ट करण्यात आले. तालुक्यात १६ विंधन विहिरींचे काम पूर्ण झाले असल्याचे प्रशासनातर्फे सांगण्यात आले. यावेळी मालेगावचे अप्पर जिल्हाधिकारी लक्ष्मण राऊत, उपजिल्हाधिकारी व निवडणूक अधिकारी पल्लवी निर्मल, तहसीलदार मनोज देशमुख, गटविकास अधिकारी सूर्यवंशी उपस्थित होते.
निवडणूक कामांची तपासणी
जिल्हाधिकारी सूरज मांढरे यांनी दुष्काळ स्थितीबरोबरच आगामी निवडणूक कामांचाही आढावा घेतला. निवडणुकीतील नवे बदल सर्वांनी समजावून घ्यावे व निवडणूक कायद्याची पुस्तके वाचून काम करावे, असे आवाहन त्यांनी केले. यावेळी उपजिल्हाधिकारी व निवडणूक अधिकारी पल्लवी निर्मल, सहाय्यक अधिकारी तहसीलदार मनोज देशमुख यांनी लोकसभा निवडणूक प्रशिक्षण वर्ग, नांदगाव विधानसभा मतदार संघात करण्यात आलेली तयारी, एकूण मतदान केंद्रे, निवडणूक कर्मचारी संख्या याबाबत जिल्हाधिकाऱ्यांना माहिती दिली.
000
आचारसंहितेचा अभ्यास करा
येवला : लोकसभा निवडणुकीसाठी प्रत्येक शासकीय विभाग प्रमुखांसह यंत्रणेतील सर्वच कर्मचाऱ्यांनी आदर्श आचारसंहितेची अभ्यासपूर्ण व काटेकोर अंमलबजावणी करावी. मात्र आचारसंहिता, निवडणूक कामांचा बागुलबुवा करत बसू नका. दुष्काळी परिस्थितीमधील पाणीटंचाई, चाराटंचाई यासारख्या टंचाई परिस्थितीकडे गांभीर्याने लक्ष द्या, त्यावर तातडीने उपाययोजना करा, अशा शब्दात जिल्हाधिकारी सुरज मांढरे यांनी येवल्यातील विविध शासकीय विभागांच्या अधिकाऱ्यांना केल्या.
येवला तहसील कार्यालयातील तहसीलदारांच्या दालनात दीड तास तालुक्यातील विविध शासकीय विभागांच्या प्रमुखांची विशेष बैठक घेतली. लोकसभा निवडणुकीच्या दृष्टीने येथील यंत्रणेकडून आढावा घेतला. तसेच दुष्काळी परिस्थितीच्या दृष्टीने तालुका प्रशासनाने केलेल्या उपाययोजनेची माहिती घेतली. काही ठिकाणी ही आदर्श आचारसंहिता म्हणजे नेमके काय हेच माहीत नसते याकडे जिल्हाधिकाऱ्यांनी लक्ष वेधले. त्यामुळे प्रत्येक अधिकाऱ्याने प्रथम आचारसंहितेचा अभ्यास करावा, असे त्यांनी सांगितले. निवडणूक असली तरी दुष्काळी परिस्थितीतील टंचाईसह इतर महत्त्वाच्या प्रश्नांकडे दुर्लक्ष करता येणार नाही. आचारसंहितेच्या कारणाखाली उपाययोजनांना अडथळा आणू नये. परिस्थितीचा गांभीर्याने विचार करून उपाययोजनांसाठी पाठपुरावा सुरू ठेवा, जेणेकरून जिल्हास्तरावरून तातडीने उपाययोजना करता येतील, असे मांढरे यांनी उपस्थित अधिकाऱ्यांना सुचित केले. यावेळी प्रांताधिकारी राजेंद्र पाटील, येवला तहसीलदार रोहीदास वारुळे, निवासी नायब तहसीलदार राजेंद्र राऊत, नायब तहसीलदार प्रकाश बुरुंगळे, नगरपालिका मुख्याधिकारी संगीता नांदुरकर आदी उपस्थित होते.
नागरिकांशी केली चर्चा
तहसील कार्यालयातील आढावा बैठकीनंतर जिल्हाधिकारी मांढरे यांनी येवला तहसीलच्या प्रशासकीय इमारतीतील रेकॉर्ड रूम, पुरवठा विभागाचा कक्ष, निवडणूक शाखा कक्ष, मतपेट्या ठेवण्यासाठीचा स्ट्राँग रूम यासह नागरिकांना सेवा देणारा तहसीलच्या सेतू कक्ष याठिकाणी प्रत्यक्ष पाहणी केली. त्यानंतर शासकीय कागदपत्रांसाठी आलेल्या नागरिकांशी संवाद साधला.
00
मालेगावी घेतला आढावा
मालेगाव : लोकसभा निवडणुका व तालुक्यातील दुष्काळ पार्श्वभूमीवर नवनियुक्त जिल्हाधिकारी सुरज मांढरे यांनी मंगळवारी प्रथमच मालेगावी भेट दिली. त्यांनी दुष्काळी उपायोजनांचा आढावा घेतांना पाणीपुरवठा टँकरची मागणी असलेले प्रस्ताव तातडीने मंजूर करण्याच्या सूचना प्रशासनास दिल्या. यासह लोकसभा निवडणुकांच्या पार्श्वभूमीवर मालेगाव बाह्य व मालेगाव मध्य या दोघी मतदार संघातील तयारीचा देखील आढावा यावेळी बैठकीत घेण्यात आला.
000
निफाडमध्ये मतदार यादीची पाहणी
निफाड : येथील उपविभागीय कार्यालय व तहसील कार्यालयाला जिल्हाधिकाऱ्यांनी शुक्रवारी भेट दिली. छोटेखानी आढावा बैठक घेऊन सूचना व मार्गदर्शन केले. तहसील कार्यालयाच्या निवडणूक शाखेत मतदार यादी, प्रशिक्षण वर्ग आदी महत्त्वाची माहिती घेतली. यानंतर प्रांताधिकारी अर्चना पठारे यांच्या दालनात आढावा बैठक घेतली. प्रांताधिकारी अर्चना पठारे, तहसीलदार दीपक पाटील, उपविभागीय पोलिस अधिकारी माधव पडिले, मुख्याधिकारी संगीता नांदूरकर उपस्थित होते.
