म. टा. प्रतिनिधी, नाशिक विकास नियंत्रण नियमावलीत दत्तक नाशिकवर अन्याय केल्याने ही बाब विरोधकांकडून आक्रमकपणे निवडणुकीत मांडली जाण्याची चिन्हे आहेत. या मुद्द्यावरून युतीच्या उमेदवाराला खिंडीत गाठण्याचा प्रयत्न होणार असल्याने लोकसभा निवडणुकीत स्थानिक मुद्दा प्रभावी ठरण्याची चिन्हे आहेत. त्यामुळे मतदार कोणती भूमिका घेणार हे पाहणे औत्सुक्याचे ठरणार आहे. कपाट प्रश्नामुळे नाशिकमधील असंख्य बांधकाम प्रकल्पांना पूर्णत्वाचा दाखला मिळालेला नाही. विविध कारणांमुळे अनेक इमारती पूर्णत्वाच्या दाखल्याच्या प्रतीक्षेत आहेत. रेडिरेकनरचे वाढलेले दर, बांधकाम परवानग्या मिळण्यात येणाऱ्या अडचणी यामुळे बांधकाम व्यावसायिकांचे कंबरडे मोडले आहे. घरांच्या किमती अजूनही सामान्यांच्या तितक्याशा आवाक्यात नसल्याने शहरातील बांधकाम व्यावसायिक अडचणीत सापडले आहेत. शहरासाठी दोन वर्षांपूर्वी विकास आराखड्याबरोबरच नवीन जाचक बांधकाम नियंत्रण नियमावली मंजूर करण्यात आल्याने व्यावसायिकांच्या अडचणीत भरच पडली. त्यामध्ये बदल व्हावा यासाठी बांधकाम व्यावसायिकांकडून मंत्रालयात पाठपुरावा सुरू होता. सर्व शहरांसाठी नवीन नियम करण्याच्या नावाखाली बांधकाम व्यवसायापुढे नवीनच आव्हान उभे ठाकले आहे. पार्किंगसाठी अधिकाधिक जागा सोडण्याची अट नव्या नियमावलीत घालण्यात आल्याने चटई क्षेत्र कमी होणार आहे. परिणामी सदनिकांची संख्याही कमी होणार असून, खर्च मात्र कमी होणार नसल्याने त्याचा फटका आमच्यासह घर खरेदी करू इच्छिणाऱ्या ग्राहकांनाही बसणार असल्याचे या व्यावसायिकांचे म्हणणे आहे. -- साइड मार्जिन व पार्किंग नॉर्म्सबाबत केवळ नाशिकवरच अन्याय झाला आहे. एकत्रित बांधकाम विकास नियंत्रण नियमावली नगरविकासने तयार केली खरी, परंतु त्यात नाशिक वगळून असा उल्लेख का, हे कोडे आहे. या निर्णयामुळे नाशिक गावठाणचा भाग विकासापासून दूर राहील. 'सर्वांसाठी माफक दरात घरे' ही केंद्राची संकल्पना शहरात पूर्णच होऊ शकणार नाही. -छगन भुजबळ, माजी उपमुख्यमंत्री -- लहान रस्त्यांवर अधिक व मोठ्या रस्त्यांवर कमी एफएसआय ही चूक नगरविकास खात्याच्या प्रशासनाने मान्य केली असून, त्यात सुधारणा केली जाणार आहे. नवीन नियमावली नाशिकवर काहीअंशी अन्यायकारक आहे. मात्र, राज्यातील सर्व पालिकांसाठी समान नियमावली झाल्यास बांधकाम परवानग्यांत सुलभता येऊन शहराच्या विकासाला चालना मिळेल. -प्रदीप काळे, आर्किटेक्ट -- एका बाजूला दत्तक म्हणून फसवी घोषणा करायची आणि दुसऱ्या बाजूला क्रूर बापसुद्धा लाजेल असे अत्याचार करायचे, असा उद्योग गेली साडेचार वर्षे नाशिकच्या बाबतीत सुरू आहेत. नाशिकला वगळून संपूर्ण महाराष्ट्रासाठी एक नियमावली हे काय गौडबंगाल आहे? नाशिकचे बांधकाम क्षेत्र आणि पर्यायाने संपूर्ण अर्थकारणच उद्ध्वस्त करण्याचा कुटिल डाव सुरू आहे. -नितीन शुक्ल, आम आदमी पक्ष
मोबाइल अॅप डाउनलोड करा आणि राहा अपडेट