म. टा. प्रतिनिधी, नाशिक
फ्रंटसीट प्रवासी वाहतुकीविरुद्ध कारवाई सुरू असताना रिक्षा चालकासह मालकाने वाहतूक पोलिसांना धक्काबुक्की केली. ही घटना वर्दळीच्या सीबीएस चौकात घडली. या प्रकरणी सरकारवाडा पोलिस ठाण्यात दोघांविरुद्ध शासकीय कामात अडथळा आणल्याप्रकरणी गुन्हा दाखल करण्यात आला.
स्वप्निल सुरेश गुरव (३० रा. कार्बनाका, सातपूर) आणि गजानन प्रकाश दुधाडे (२१ रा. श्रमिकनगर, सातपूर) अशी अनुक्रमे रिक्षाचालक आणि मालकाची नावे आहेत. शहर वाहतूक शाखेचे कर्मचारी द्वारका यादव व सोमनाथ गायकवाड हे सीबीएस चौकात सेवा बजावत असताना ही घटना घडली. सीबीएस बस स्टॅण्ड परिसरात एमएच १५, ईएच ०५८६ या ऑटो रिक्षावर पोलिस फ्रंटसीट कारवाई करीत असताना हा वाद झाला. चालकाशेजारी बसलेल्या स्वप्निल गुरव याने आपण रिक्षामालक असून, तुम्ही काही करू शकत नाही, असा आरडाओरड करीत पोलिस कर्मचारी यादव यांच्या अंगावर धावून जात धक्काबुक्की केली. या घटनेत हवालदार यादव यांच्या मदतीला शिपाई गायकवाड गेले असता चालक दुधाडे याने गायकवाड यांच्याशी हुज्जत घालत धक्काबुक्की केली. या घटनेत दोन्ही पोलिस कर्मचाऱ्यांचे गणवेश फाटले.
नोट प्रेसमध्ये हाणामारी
वर्कशॉप विभागातील टाइम ऑफिसजवळ टोकन बोर्डावर दोन टोकन घेऊन लावत असताना तेथील कर्मचाऱ्याने विरोध केला असता त्यास मारहाण करण्यात आली. ही घटना ६ मार्च रोजी दुपारी पावणेचार वाजेच्या सुमारास आयएसपी नोटप्रेस येथे घडली. या प्रकरणी भास्कर रंगनाथ कोलमकर यांनी दिलेल्या फिर्यादीनुसार नाशिकरोड पोलिस ठाण्यात एकनाथ बाळू टिळे याच्याविरूद्ध सरकारी कामात अडथळा आणल्याप्रकरणी गुन्हा दाखल करण्यात आला आहे. घटनेचा पुढील तपास सहाय्यक पोलिस निरीक्षक के. एल. सोनोणे करीत आहेत.
मंदिराचा कळस चोरला
मंदिरावरील पितळी धातूचा कळस चोरट्यांनी चोरून नेल्याची घटना खडकाळी भागात घडली. या प्रकरणी भद्रकाली पोलिस ठाण्यात गुन्हा दाखल करण्यात आला.
सुभाष भिकाजी नवसे (रा.पंचशिलनगर,नाशिक) यांनी या प्रकरणी तक्रार दिली. खडकाळी सिग्नल परिसरातील रॉयल हेरिटेज हॉटेल मार्गावर असलेल्या संकटमोचन हनुमान मंदिराचा सुमारे तीन हजार रुपये किमतीचा कळस गुरुवारी रात्री चोरट्यांनी चोरून नेला. अधिक तपास लभडे करीत आहेत.
घरात घुसून महिलेचा विनयभंग
चावी ठेवण्यासाठी घरात आलेल्या शेजाऱ्याने महिलेचा विनयभंग केल्याची घटना अंबड लिंक रोडवरील रामकृष्ण नगर भागात घडली. पोलिसांनी संशयितास अटक केली. या प्रकरणी अंबड पोलिस ठाण्यात विनयभंगाचा गुन्हा दाखल करण्यात आला.
नरेश बनवारी पाल (रा. रामकृष्णनगर) असे अटक केलेल्या संशयिताचे नाव आहे. २० वर्षांच्या पीडित विवाहितेने या प्रकरणी तक्रार दिली. गुरुवारी महिला आपल्या घरात एकटी असल्याची संधी साधत संशयिताने घराची चावी ठेवण्याचा बहाणा करून महिलेचे घर गाठले. यावेळी तुझा नवरा दारूड्या आहे. त्याचे बाहेर प्रेमसंबंध असल्याने तुझ्यावर प्रेम करीत नाही. त्याला सोडून माझ्याशी लग्न कर, असे म्हणून विनयभंग केला. अधिक तपास सहाय्यक निरीक्षक घोडके करीत आहेत.
गोडावून फोडून सिमेंटची चोरी
गोडावूनचे कुलूप तोडून चोरट्यांनी सिमेंटची चोरी केल्याची घटना मालधक्का भागात घडली. या प्रकरणी नाशिकरोड पोलिसात गुन्हा दाखल करण्यात आला.
सचिन ओमप्रकाश सोमाणी (रा. तरण तलावाजवळ, नाशिकरोड) यांनी या प्रकरणी तक्रार दिली. सचिन सोमानी यांचे सिमेंट व्यावसायिक असून, त्यांचे मालधक्का भागातील जियाउद्दीन डेपोत कोरोमंडल नावाचे सिमेंटचे गोडावून आहे. बुधवारी रात्री अज्ञात चोरट्यांनी गोडावूनचे कुलूप तोडून ५५ हजार ३६० रुपये किमतीच्या १७३ सिमेंटच्या गोणी चोरून नेल्या. अधिक तपास सहाय्यक निरीक्षक शेलकर करीत आहेत.
अल्टो मार्केट भागात जुगारी गजाआड
महामार्गावरील भगतसिंग नगर वसाहतीस लागून असलेल्या अल्टो मार्केट भागात उघड्यावर जुगार खेळणाऱ्या चौघांना पोलिसांनी अटक केली. संशयितांच्या ताब्यातून रोख रकमेसह जुगाराचे साहित्य हस्तगत करण्यात आले. या प्रकरणी इंदिरानगर पोलिस ठाण्यात गुन्हा दाखल करण्यात आला. अल्टो मार्केटच्या भिंतीच्या आडोशाला काही युवक जुगार खेळत असल्याची माहिती पोलिसांना मिळाली होती. त्यानुसार शुक्रवारी दुपारी पोलिसांनी छापा टाकला असता दीपक मुर्तडक व त्याचे तीन साथीदार 'टाइम जनता, टाइम ओपन' नावाचा मटका जुगार खेळताना मिळून आले. संशयितांच्या ताब्यातून रोकड व जुगाराचे साहित्य हस्तगत करण्यात आले. अधिक तपास सहाय्यक पोलिस उपनिरीक्षक पाळदे करीत आहेत.