हिमालयाकडून शुष्क आणि शीत वारे मध्य व दक्षिण भारताकडे वाहत असल्याने राज्याच्या तपमानावर त्याचा मोठा परिणाम झाला आहे. त्यामुळे यंदाच्या हंगामातील राज्यातील सर्वांत नीचांकी तापमान निफाडमध्ये १.८ अंश सेल्सिअसपर्यंत घसरले होते, तर नाशिकमध्ये ५.७ अंश सेल्सिअस एवढी झाली आहे. एकाच दिवसात सात ते आठ अंशांनी हे तापमान घसरल्याने नाशिककर चांगलेच गारठले आहेत, तर निफाडमध्ये दवबिंदूही गोठल्याचे चित्र होते. राज्यात आलेली शीतलहर आगामी दोन दिवस कायम राहणार असल्याने उत्तर महाराष्ट्रात थंडीचा कडाका आणखी वाढण्याचा अंदाज हवामान विभागाने वर्तविला आहे.
१.८ अंश सेल्सिअस इतक्या नीचांकी तापमानाची नोंद जिल्ह्यात निफाडच्या कुंदेवाडी कृषी संशोधन केंद्रात झाल्यानंतर गुरुवारीही नाशिककरांची हुडहुडी कायम राहिली. शहरात गुरुवारी तापमानाची नोंद ५.७ अंश इतकी घसरली आहे. गेल्या दोन दशकांतील नीचांकी तापमानात यंदाही जिल्ह्याची नोंद झाली आहे. यामुळे द्राक्ष पिकांबाबत शेतकऱ्यांमध्ये चिंता व्यक्त करण्यात येत आहे. काही दिवसांपासून राज्यभरात वाढणाऱ्या थंडीच्या कडाक्यात नाशिकचे घसरते तापमानही चर्चेत आहे.
कडाक्याची थंडी
राज्यात थंडीची लाट असून, शुक्रवार आणि शनिवार असे दोन्ही दिवस उत्तर महाराष्ट्रात तपमानाचा पारा लक्षणीय घसरण्याचा अंदाज हवामान विभागाने वर्तविला आहे. त्यामुळे नाशिकमध्ये २०१२ मध्ये नोंदविलेला २.७ अंशसेल्सिअसचा विक्रम यंदा मोडीत निघणार का, याची उत्सुकता नाशिककरांना आहे. निफाडमधील घसरत्या तापमानामुळे पारा शून्य अंशांच्या खाली जाणार का, असा प्रश्न उपस्थित होत आहे.
गेल्या काही वर्षांतील जिल्ह्यातील नीचांकी तापमान
- २०१८ : १.८ अंश सेल्सिअस
- २०१७ : ५.८ अंश सेल्सिअस
- २०१६ : ५.५ अंश सेल्सिअस
-२०१५ : ५.४ अंश सेल्सिअस
-२०१४ : ६.१ अंश सेल्सिअस
-२०१३ : ४.४ अंश सेल्सिअस
-२०१२ : २.७ अंश सेल्सिअस
- २०११ : ४.४ अंश सेल्सिअस
-२०१२ : २.७ अंश सेल्सिअस
-२०११ : ४.४ अंश सेल्सिअस
- २०१० : ५.४ अंश सेल्सिअस
निफाड @ १.८
निफाड : निफाड येथील गहू संशोधन केंद्रात बुधवारी (ता. २६) ११ अंश सेल्सिअस इतकी नीचांकी तापमानाची नोंद झाली. तापमानाचा पारा अवघ्या १२ तासांत १० अंशांनी घसरल्याने निफाड तालुक्याला हुडहुडी भरली आहे. या हंगामात ६ अंश सेल्सिअसपर्यंत तापमान घसरले होते. त्यानंतर तापमान ८, ९, १०, ११ अंशांपर्यंत गेल्याचे पाहायला मिळाले. मात्र, गुरुवारी सकाळी सात वाजता राज्यातील सर्वांत नीचांकी तापमानाची नोंद झाल्याने द्राक्ष उत्पादकांचे धाबे दणाणले आहेत. थंडीपासून द्राक्षबागांना ऊब मिळावी यासाठी द्राक्षबागांमध्ये शेकोटी केल्याचे चित्र काही भागात होते, तर काही ठिकाणी जुन्या साड्या आणि शेडनेट लावून थंडीपासून बचावाचा प्रयत्न करताना द्राक्ष उत्पादक दिसत होते. विशेष म्हणजे गोदाकाठच्या भागांत उसाच्या पाचटावर दवबिंदू गोठल्याचे चित्र होते. २०१२ मध्ये गहू संशोधन केंद्रात 0 अंश सेल्सिअस तापमानाची नोंद झाली होती. त्यानंतर ४ अंश सेल्सिअसपर्यंत तापमान घसरले होते. यंदा १.८ अंश सेल्सिअसइतके तापमान घसरल्याची नोंद झाल्याचे गहू संशोधन केंद्राचे वेधशाळा निरीक्षक रमेश मानकर यांनी सांगितले.
ज्या द्राक्षांमध्ये पाणी उतरले आहे, अशा द्राक्षांना तडे जाण्याची भीती आहे. द्राक्षमण्यांची फुगवन क्षमता थांबण्याचीही भीती आहे. भुरी रोगाच्या भीतीने फवारणी खर्च वाढेल.
- बाळासाहेब सानप, द्राक्ष उत्पादक
फोटोओळ
कसबे-सुकेणे येथील ओझर रस्त्यावरील किशोर शेवकर यांच्या पुदिना पिकावर गोठलेले दवबिंदू.
मोबाइल अॅप डाउनलोड करा आणि राहा अपडेट
