म. टा. खास प्रतिनिधी, नाशिक
विश्वास ज्ञान प्रबोधिनी अॅन्ड रिसर्च इन्स्टिट्युट यांची निर्मिती असलेल्या 'विसर्जन' या नाटकाचे अश्वमेध थिएटर्स आणि सपान नाशिक या संस्थेतर्फे महाकवी कालिदास कलामंदिरात सादरीकरण करण्यात आले.
जगणं सुरु होण्याच्या उंबरठ्यावर मरण कवटाळू पहाणारा वैफल्यग्रस्त तरुण शेतकरी आनंद, लौकिकार्थान जगणं संपत आलेलं असतानाही ते सुरू होण्याची प्रदीर्घ प्रतीक्षा करीत बसलेली आजी, आणि जगाला जगणं समजवून देण्याच्या गदारोळात हरवलेल्या थोरल्या भावाला अनंत काळ शोधत रहाणं, हेच अनादी जगणं घेऊन प्रवासत रहाणारा रंगा या तिघांच्या सुख दु:खाचा धांडोळा घेणारे 'विसर्जन' हे दोन अंकी प्रायोगिक नाटक सादर झाले.
या कथेत असलेल्या आनंदचे आई बापाचे छत्र हरवलेलं असते. त्याची आजी मात्र जिवंत असते. आजीचा नवरा व आनंदचा आजोबा हा देखील वारीत परागंदा झालेला असतो. त्याची आठवण म्हणून आजीने एक मंदिर बांधलेले असते; मात्र या मंदिराचा गाभारा रिकामा ठेवलेला असतो. परागंदा झालेल्या नवऱ्याला शोधायचे आणि येताना विठ्ठलाची मूर्ती घेऊन यायची व मंदिरात तिची स्थापना करायची ही आजीची इच्छा असते. याच वेळी रंगा नावाचा वारकरी त्याच्या भावाचा शोध घेण्यासाठी वारीत निघालेला असतो. धावत येत तो आनंदला आजीकडे घेऊन येतो पुन्हा एकदा आनंद जगण्याच्या लढाईत ढकलला जातो. त्यानंतर रंगा निघून जातो. 'स्व' विर्सजित झाल्याशिवाय 'गाभारे' भरत नसतात, म्हणूनच ही एक डोहातील आकाशशोधाची गोष्ट आहे, असे सूत्रधार म्हणतो.
नाटकाचे लेखन दत्ता पाटील व दिग्दर्शन सचिन शिंदे यांचे होते. नेपथ्य लक्ष्मण कोकणे, शेखर सरोदे, प्रकाशयोजना राहुल गायकवाड, संगीत संयोजन रोहीत सरोदे, राजेंद्र उगले, गीत दत्ता पाटील, राजेंद्र उगले, रंगभूषा माणिक कानडे वेशभूषा चेतन बर्वे, उर्वराज गायकवाड, पार्श्व संवाद प्राजक्त देशमुख, प्रशांत साठे, निर्मती प्रमुख विश्वास ठाकूर, सुत्रधार विनायक रानडे, सहाय्य प्रणव प्रभाकर, राजेश भुसारे, हेमंत महाजन, गिरीश गर्गे यांचे होते.
नाटकात आनंद-धनंजय गोसावी, आजी-दिप्ती चंद्रात्रे, रंगा-निलेश सूर्यवंशी, कार्तिकेय कंट्रोजवार, चेतन बर्वे, एकता आढाव, पूजा पूरकर, दामिनी जाधव, अंकिता साळूंखे, प्रतिक गोवर्धने, प्रतिक शर्मा, सुरज बोडाइ, अर्थव लाखलगावकर, प्रतिक कुलकर्णी, विनायक अमृतकर यांनी भूमिका केल्या. गायन वादनाची साथ राजेंद्र उगले, अरुण इंगळे, दत्ता अलगट, शुभम लांड़गे, अपूर्व इंगळे यांनी केली.
