म. टा. प्रतिनिधी, नाशिक
फ्लॅटच्या खरेदीचे व करारनाम्याचे पैसे घेऊन ते परस्पर तिसऱ्याच व्यक्‍तीला विक्री करून २० लाखांची फसवणूक करणाऱ्या दोघांविरुद्ध सातपूर पोलिस स्टेशनमध्ये गुन्हा दाखल करण्यात आला आहे. संदीप सुदाम भालके (रा. भालके फार्म, टाकळी रोड, तपोवन) आणि पंकज रामगीर गोसावी (रा. मनोकामना बंगला, कृष्णानगर, अंबड) अशी दोघा संशयितांची नावे आहेत. या प्रकरणी जितेश रमेश वैश्य (रा. नाईस, १५/१६, सातपूर एमआयडीसी) यांनी फिर्याद दिली आहे. संशयित संदीप भालके याची पाथर्डी फाटा भागात फ्लॅटबाबत स्कीम सुरू होती. या स्कीममध्ये वैश्य यांनी फ्लॅट घेतले होते. संशयित भालके व पंकज गोसावी यांनी जितेश वैश्य यांच्याकडून रोख व चेक स्वरूपात २० लाख रुपये घेतले. दरम्यान, संशयित भालके व गोसावी याने १ मे २०१५ ते ३० एप्रिल २०१८ या कालावधीत वैश्य यांच्याकडून पैसे घेऊन फ्लॅटचा करारनामा केला. मात्र, असे असतानाही त्यांना हे फ्लॅट न देता परस्पर तिसऱ्याच व्यक्‍तीला या फ्लॅटची विक्री केली. या इमारतीचे बांधकामही पूर्ण झालेले नसल्याचे वैश्य यांनी फिर्यादीत म्हटले आहे. याबाबत सहायक पोलिस निरीक्षक एस. एस. वऱ्हाडे पुढील तपास करीत आहेत.
--
दारू दुकानात एकावर कटरने हल्ला
आमच्यात बोलू नको, असे सांगितल्याने संतप्त झालेल्या एकाने खिशातील धारदार कटर काढून दुसऱ्यावर हल्ला केल्याची घटना चित्रकुट परिसरातील देशी दारू दुकानात घडली. या घटनेत पेठरोड भागातील युवक जखमी झाला असून, त्याच्यावर खासगी हॉस्पिटलमध्ये उपचार सुरू आहेत. या प्रकरणी पंचवटी पोलिस स्टेशनमध्ये गुन्हा दाखल करण्यात आला. अशोक बाबुराव चव्हाण (३६ रा. फुलेनगर, पेठरोड) असे जखमी युवकाचे नाव आहे. चव्हाण आणि त्याचा मित्र शिवाजी शिंदे शुक्रवारी सायंकाळी चित्रकुट परिसरातील देशी दारू दुकानात मद्यसेवन करत असताना ही घटना घडली. मोर्चा संदर्भात गप्पा मारत असताना संशयित जितेंद्र जाधव याने टिप्पणी केली. त्यावर तू आमच्यात बोलू नकोस असे अशोकने म्हटले. यामुळे संतप्त झालेल्या जितेंद्र जाधव याने खिशातील धारदार कटर काढून चव्हाणच्या गळ्यावर वार केला. या घटनेत चव्हाण जखमी झाला असून, त्याच्यावर खासगी हॉस्पिटलमध्ये उपचार सुरू आहेत. घटनेचा अधिक तपास सहाय्यक निरीक्षक वाघ करीत आहेत.
--
रिक्षा प्रवासात पर्सवर डल्ला
सातपूरच्या अशोकनगर ते शहरातील ठक्‍कर बझारदरम्यान रिक्षातून प्रवास करणाऱ्या विवाहितेची हॅण्ड पर्स अनोळखी महिलांनी चोरी केली. पर्समध्ये तब्बल ६२ हजारांचा मुद्देमाल होता. याबाबत सरकारवाडा पोलिस स्टेशनमध्ये चोरीचा गुन्हा दाखल करण्यात आला.
या प्रकरणी आप्पासाहेब विलास दिघे (श्रीगणेश मंगलमूर्ती अपार्ट. अशोकनगर, सातपूर) यांनी फिर्याद दिली आहे. गुरूवारी (दि. २४) दिघे यांच्यासह त्याचे कुटुंबियाने अशोकनगर ते ठक्‍कर बझार बस स्टॅण्ड असा रिक्षा प्रवास केला. याचदरम्यान रिक्षात बसलेल्या ३० ते ३२ वयोगटातील दोन महिलांनी आप्पासाहेब दिघे यांच्या पत्नीच्या हॅण्ड पर्समधून ३० हजार रुपये किमतीचा दीड तोळा वजनाचा नेकलेस, २० हजार रुपयांची सोन्याची पोत, १० हजार रुपयांच्या अर्धा तोळ्याच्या दोन अंगठ्या व बाळ्या, दोन हजार रुपयांची एक ग्रॅम वजनाची पोत असा ६२ हजार रुपयांचा मुद्देमाल चोरून नेला. याबाबत पोलिस हवालदार ए. आर. राठोड तपास करीत आहेत.
--
दुचाकीस्वार युवक ठार
पाथर्डी फाटा येथील शिवाजी पुतळ्यासमोर भरधाव ट्रकने प्लॅटिना दुचाकीला जोरदार धडक दिल्याने या अपघातात २४ वर्षांचा चालक ठार झाला. याबाबत अंबड पोलिस स्टेशनमध्ये गुन्हा दाखल करण्यात आला. गोकुळ दिलीप संगमनेरे (रा. मु. पो. खेरवाडी, ता. निफाड) असे अपघातात मृत्यू झालेल्या चालकाचे नाव असून, दुचाकीवरील आणखी एक २२ वर्षांचा युवक तरुण जखमी आहे. शुक्रवारी (दि. २४) दुपारी साडेतीन वाजता आग्रा रोडवरील पाथर्डी फाटा येथे असलेल्या शिवाजी पुतळ्याजवळील उजव्या पुलावरून केदू संतू पवार (रा. मु. पो. सय्यद पिंप्री, ता. जि. नाशिक) व गोकुळ हे दोघे दुचाकीवरून (एमएच १५ जीसी ६६०४) नाशिककडून मुंबईच्या दिशेने जात होते. याच वेळी भरधाव ट्रकने दुचाकीला जोरदार धडक दिली. यामुळे दुचाकी डिव्हायडरवर जाऊन आदळली. दुचाकीवरील केदू पवार याच्या डोक्याला व पायाला गंभीर दुखापत झाली. गोकुळ संगमनेरे यालाही गंभीर दुखापत झाल्याने त्याचा मृत्यू झाला. या घटनेनंतर संशयित ट्रकचालक पसार झाला आहे. घटनेचा पुढील तपास पोलिस उपनिरीक्षक म्हात्रे करीत आहेत.
--
उपचारादरम्यान जखमीचा मृत्यू
अज्ञात भरधाव वाहनाने दिलेल्या धडकेत गंभीर जखमी झालेल्या पादचाऱ्याचा उपचारादरम्यान मृत्यू झाला. तपोवन रोडवरील गोविंद हॉटेलच्या जवळ १५ ऑगस्ट रोजी हा अपघात झाला होता. चंद्रकांत रामभाऊ आहेर (६०, पोद्दार शाळेसमोर, तपोवन लिंक रोड) असे अपघातात मृत्यू झालेल्या व्यक्तीचे नाव आहे. घटनेच्या दिवशी चंद्रकांत आहेर हे तपोवन रोडवरील गोविंद हॉटेलच्या समोर असलेल्या चेतना हॉस्पिटलच्या बाजूने रस्त्याने पायी जात असताना अज्ञात वाहनाने त्यांना जोरदार धडक दिली. आहेर यांच्या डोक्याला गंभीर दुखापत झाल्याने त्यांना तत्काळ हॉस्पिटलमध्ये दाखल करण्यात आले. मात्र, उपचार सुरू असताना त्यांचा गुरूवारी मृत्यू झाला. याबाबत प्रकाश सुभाष पाटील (रा. हिरावाडी, पंचवटी) यांनी फिर्याद दिली असून, पुढील तपास पोलिस उपनिरीक्षक कासर्ले करीत आहेत.
--
चोरट्यांनी दानपेट्या फोडल्या
पुणे रोडवरील बोधलेनगर व डीजीपीनगर येथील दोन मंदिरांतील दानपेट्या फोडून चोरट्यांनी १३ हजारांचा मुद्देमाल चोरून नेला. याबाबत उपनगर पोलिस स्टेशनमध्ये गुन्हा दाखल करण्यात आला. बोधलेनगर येथील साईशिवनगरजवळ असलेल्या द्वारकामाई साई मंदिरातील स्टीलचा डबा फोडून चोरट्यांनी ८०० रुपये व २०० रुपयांची पितळी थाळी चोरून नेली. तर याचनंतर चोरट्यांनी डीजीपीनगरच्या टागोरनगरमधील साईबाबा मंदिरातील दानपेटी फोडून सहा हजारांची रक्कम व सहा हजार रुपयांची दानपेटी असा १२ हजार रुपयांचा मुद्देमाल चोरून नेला आहे. मंदिरातील या दोन्ही चोऱ्यांप्रकरणी उपनगर पोलिस स्टेशनमध्ये गुन्हा दाखल करण्यात आला आहे. याबाबत प्रकाश आवारे (रा. द्वारकामाई साई मंदिर, बोधलेनगर, नाशिक) यांनी फिर्याद दिली असून, पुढील तपास पोलिस हवालदार गोडसे करीत आहेत.
पंचवटीतील तडीपारास अटक
तडीपार असतानाही शहरात आलेल्या तडीपारास पोलिसांनी अटक केली. श्यामसिंग महावीरसिंग परदेशी (४१, रा. लक्ष्मीनारायण सोसायटी, लामखेडे मळा, पंचवटी) असे संशयिताचे नाव आहे. गंभीर गुन्हे दाखल असल्याने परदेशीला काही महिन्यांपूर्वी शहर व जिल्ह्यातून तडीपार करण्यात आले होते. मात्र, तो शहरात आल्याची माहिती पोलिसांना मिळाली होती. त्यानुसार पोलिसांनी पंचवटी परिसरातील परदेशीच्या घरी सापळा रचून त्यास ताब्यात घेतले. पंचवटी पोलिसांनी शुक्रवारी (दि.२४) पहाटे ही कारवाई केली. पोलिस शिपाई काशीनाथ मांदळे यांनी दिलेल्या फिर्यादीनुसार पंचवटी पोलिसांनी गुन्हा दाखल केला असून, पुढील तपास पोलिस हवालदार ए. डी. सोनवणे करीत आहेत.
0000
