म. टा. प्रतिनिधी, नाशिक दहावा मैल ते ओझर विमानतळ या रस्त्याची दुरवस्था झाल्याने त्याचा मोठा त्रास विमान प्रवाशांना सहन करावा लागत आहे. त्यामुळे या रस्त्याचे काम तातडीने करावे, असे साकडे 'निमा'च्या पदाधिकाऱ्यांनी सार्वजनिक बांधकाम विभागाला घातले आहे. या मार्गावर ठिकठिकाणी विमानतळाचे दिशादर्शक फलक लावावेत, अशी मागणीदेखील त्यांनी केली आहे. 'निमा'चे उपाध्यक्ष शशिकांत जाधव, नितीन वागस्कर, 'निमा'च्या पायाभूत सुविधा समितीचे अध्यक्ष मनीष रावल यांच्या शिष्टमंडळाने सार्वजनिक बांधकाम विभागाचे मुख्य अभियंता सिद्धार्थ तांबे आणि अधीक्षक अभियंता रणजित हांडे यांची भेट घेतली, तसेच त्यांना आपल्या मागण्यांचे निवेदन सादर केले. विमानतळाकडे जाणाऱ्या मार्गांवर दिशादर्शक फलकांचा अभाव असल्यामुळे बऱ्याचदा विमानतळाकडे जाताना अनेक अडचणींचा सामना करावा लागतो. किमान २५ फलक शहरात येणाऱ्या विविध प्रदर्शनी भागात चौकांमध्ये आणि ठिकाणांवर बसविण्याची व्यवस्था व्हावी, अशी मागणी शिष्टमंडळाने केली आहे. विमानसेवेला प्रतिसाद लाभण्यासाठी विमानसेवेचा प्रचार व जनजागृती आवश्यक असल्याचे रावल यांनी यावेळी सांगितले. विमानतळावरून होणाऱ्या विमान उड्डाणांचे वेळापत्रक शहरातील किमान दहा ठिकाणी बसविण्यात यावे, विमानतळाकडे जाणाऱ्या रस्त्याचे सौंदर्यीकरण व्हावे, आग्रारोड ते विमानतळापर्यंतच्या रस्त्याच्या चौपदरीकरणाचे काम लवकरात लवकर पूर्ण करावे, अशी मागणी यावेळी करण्यात आली. दिशादर्शक फलकांचे आणि विमानतळाकडे जाणाऱ्या मार्गाचे काम लवकरात लवकर पूर्ण होऊन सुशोभीकरण करण्यात येईल, अशी ग्वाही मुख्य अभियंता तांबे आणि अधीक्षक अभियंता हांडे यांनी शिष्टमंडळाला दिली.
मोबाइल अॅप डाउनलोड करा आणि राहा अपडेट
