सहाही विभागांत होणार कामांना सुरुवात म. टा. खास प्रतिनिधी, नाशिक विधान परिषद निवडणुकीची आचारसंहिता संपताच प्रशासनाने बजेटच्या अंमलबजावणीवर जोर दिला आहे. पहिल्या टप्प्यात नववसाहतींमध्ये पाणीपुरवठा सुरळीत करण्यासाठीच्या कामाला मंजुरी दिल्यानंतर आता दुसऱ्या टप्प्यात शहरातील मलवाहिकांचे जाळे टाकण्यास प्राधान्य देण्यास पालिकेने सुरुवात केली आहे. शहरात नव्याने मलवाहिका टाकण्यासाठी महापालिकेने ११० कोटींची कामे करण्यास सुरुवात केली असून, त्यासाठीच्या निविदा प्रसिद्ध केल्या आहेत. महापालिकेच्या वतीने गेल्या आठवड्यात नववसाहतींमधील पाणीपुरवठा सुरळीत करण्यासाठी नवीन पाइपलाइन टाकण्याच्या कामाला मंजुरी दिली होती. शहरातील सहा विभागांतील पाणीपुरवठा यंत्रणा सुधारण्यासाठी पुढाकार घेतला असतानाच आता मलवाहिकांच्या कामांनाही प्राधान्य दिले जात आहे. महापालिकेच्या बजेटमध्ये तरतूद केल्याप्रमाणे ही कामे होणार असून, शहराच्या सहा विभागांमध्ये नऊ कामांचा समावेश आहे. आयुक्त तुकाराम मुंढे यांनी बजेटमध्ये सादर करताना ज्या भागात ड्रेनेज व पाणीपुरवठ्याच्या कामांना प्राधान्य देण्याचे जाहीर केले होते. त्यानुसार आचारसंहिता संपुष्टात येताच कामांना वेग आला आहे. नववसाहती, दलित व आदिवासी भागात ड्रेनेज लाइन टाकल्या जाणार आहेत. त्यासाठी ११० कोटी रुपये खर्च केले जाणार आहेत. त्यासाठी महापालिकेच्या आरोग्य व यांत्रिकी विभागाने शनिवारी निविदाप्रक्रिया सुरू केली आहे. या निविदांना देकार येताच कामांनाही सुरुवात केली जाणार आहे. विशेष म्हणजे ही कामे बजेटमध्ये मंजूर असल्याने स्थायी आणि महासभेत हे विषय ठेवण्यात आलेले नाहीत. त्यामुळे या कामांना लगेच गती मिळणार आहे.
मोबाइल अॅप डाउनलोड करा आणि राहा अपडेट
