म. टा. प्रतिनिधी, नाशिक त्र्यंबकनाका ते सीबीएस या एकाच बाजूच्या मार्गावरून दुहेरी वाहतूक सुरू ठेवण्याचा प्रयोग बुधवारी सकाळी शहर वाहतूक पोलिसांकडून करण्यात आला. परंतु, या ठिकाणी प्रचंड वाहतूक कोंडी होत असल्याचे निदर्शनास आल्याने तूर्तास या निर्णयाची अंमलबजावणी लांबणीवर टाकण्याच्या निष्कर्षापर्यंत पोलिस आले आहेत. मेहेर सिग्नल ते सीबीएस चौक या रस्त्याला स्मार्ट करण्याचे काम प्रशासनाच्या वतीने हाती घेण्यात आले आहे. त्यामुळे सध्या सीबीएस ते मेहेर चौक सिग्नल याच मार्गावरून दुहेरी वाहतूक सुरू आहे. त्र्यंबक नाक्यापर्यंतचा रस्ता स्मार्ट करावयाचा असल्याने याही रस्त्याचे खोदकाम करण्याचे प्रशासनाच्या विचाराधीन होते. यासाठी पोलिसांनी सीबीएस ते त्र्यंबक नाका हा रस्ता बंद करण्याचा प्रयोग राबविण्याचा निर्णय घेतला. सकाळी ११ ते दुपारी १ अशा दोन तासांसाठी हा रस्ता बंद करण्यात येणार होता. त्यानुसार सकाळी ११ वाजता बॅरिकेडींगद्वारे हा रस्ता बंद करण्यात आला. त्र्यंबकनाका ते सीबीएस या मार्गावर दुहेरी वाहतूक सुरू करण्यात आली. परंतु, या मार्गावर वाहतुकीची प्रचंड कोंडी होत असल्याने कोंडी होऊ लागली. त्यामुळे अवघ्या तासाभरातच हा प्रयोग गुंडाळून दोन्ही रस्त्यांवरून वाहतूक पूर्ववत सुरू करण्याचा निर्णय पोलिसांनी घेतला. येथील एकेरी मार्गावरून दुहेरी वाहतूक सुरू करणे तूर्तास तरी शक्य नसल्याची माहिती वाहतूक विभागाचे सहायक पोलिस आयुक्त डॉ. अजय देवरे यांनी दिली. त्यामुळे पर्यायी मार्गांचा विचार होईपर्यंत पूर्वीप्रमाणेच वाहतूक व्यवस्था सुरू ठेवण्यात येणार असल्याचे देवरे यांनी सांगितले.
मोबाइल अॅप डाउनलोड करा आणि राहा अपडेट
