म. टा. वृत्तसेवा, धुळे
राज्य सरकारच्या बदली धोरणामुळे नंदुरबार जिल्ह्यातील तब्बल ४० टक्के शाळा महिला शिक्षिकांविना राहणार असल्याचे वृत्त ‘मटा’मध्ये प्रकाशित करण्यात आले. त्यानंतर तातडीने जिल्हाधिकारी डॉ. मल्लिनाथ कलशेट्टी यांनी जिल्हा परिषद मुख्य कार्यकारी अधिकाऱ्यांना चौकशीचे आदेश दिले. मात्र, जिल्ह्यातील शहादा, तळोदा, अक्कलकुवा आणि धडगाव या तालुक्यातील काही गावांमध्ये एसटी जात नसल्याचे कारण दाखवत महिला शिक्षकांची नियुक्ती केली जात नसल्याची माहिती सूत्रांनी दिली आहे.
नंदुरबार जिल्ह्यातील या प्रकरणात धुळे विभाग नियंत्रकांच्या सांगण्यानुसार धुळे व नंदुरबार जिल्ह्यातील सर्व तालुक्यातील गावांतील प्रवाशांना एसटी नियमित सेवा देत आहे. तर शिक्षक व प्रशासनाकडून तोरणमाळ, कुडाशी व काकडदे या गावांना एसटी जात नसल्याचे सांगण्यात आले आहे. यामुळे जिल्हा परिषदेतील शिक्षकांच्या बदल्यांमध्ये अर्थपूर्ण व्यवहार होत असल्यानेच बदल्या सोयीनुसार केल्याची बाब समोर येत आहे.
राज्यभरातील सुमारे तीन लाख शिक्षकांच्या बदल्या करण्यासाठी ऑनलाइन बदली प्रक्रिया ग्रामविकास विभागाने राबविली. यात शासन निर्णयानुसार जिल्हा परिषदेच्या शिक्षण विभागाने काही लाभार्थींच्या सोयीचे अर्थ लावून बदली प्रक्रिया पार पाडली. हे प्रकरण मंत्रालयापर्यंत गेल्यानंतरही जिल्हा परिषद प्रशासन आपल्या निर्णयावर ठाम आहे. तर शिक्षकांच्या शिष्टमंडळास आश्वासन देत बोळवण करण्यात आली. असंतोष असतानाही नंदुरबार जिल्ह्यातील १७६ शिक्षकांमध्ये शंभरावर महिलांना नंदुरबार वगळून इतर तालुक्यांत नियुक्ती दिली जाणार आहे.
अधिकाऱ्यांवर कारवाईचे संकेत
एकंदरीतच जिल्हा परिषदेच्या शिक्षण विभागातील अधिकाऱ्यांनी काही लोकांना हाताशी धरून केलेल्या या प्रकारामुळे शेकडो शिक्षकांना त्रास होत आहे. ज्या गावांच्या शाळेजवळ एसटी थांबते. अशा गावातील महिलांना प्रतिकूल करण्याचा घाट नंदुरबार जिल्हा परिषदेत रचला गेला. यामुळे जिल्हा परिषदेच्या मुख्य कार्यकारी अधिकाऱ्यांसह परिविक्षाधीन उपमुख्य कार्यकारी अधिकारी अडचणीत येण्याची शक्यता आहे. या प्रकरणी ग्रामविकास विभागाचे सचिव असीम गुप्ता यांनी संबंधित अधिकाऱ्यांवर कारवाईचे संकेत दिले आहेत.
नंदुरबार जिल्ह्यातील सर्व तालुक्यातील तोरणमाळ, कुडाशी, काकडदे यासह सर्व ठिकाणी दररोज प्रवाशांच्या सेवेसाठी बस सुरू आहेत. काही ठिकाणी मुक्कामी बस असल्याने नागरिकांना आपल्या गावाहून सकाळी शहरात दाखल होता येते.
मनीषा सपकाळ, विभाग नियंत्रक, धुळे
दररोज सकाळपासून ते सायंकाळपर्यत सुरळीत बसफेऱ्या सुरू असून, प्रवाशांचा प्रतिसाददेखील चांगला आहे. तोरणमाळला दररोज सहा बस सेवेसाठी आहेत. प्रवाशांच्या मागणीवरून जास्त बसफेऱ्यांचाही आमचा प्रयत्न असतो.
नीलेश गावित, आगारप्रमुख, नंदुरबार
मोबाइल अॅप डाउनलोड करा आणि राहा अपडेट
