प्रतिकुल परिस्थितीवर मात करीत ७८ टक्के गुणांची कमाई म. टा. वृत्तसेवा, सटाणा राज्य उच्च माध्यमिक शालांत परीक्षा अर्थात बारावीच्या परीक्षेत सटाणा येथील मविप्र संचलित जिजामाता गर्ल्स हायस्कूलच्या हेमांगी रमेश महाजन हिने अत्यंत प्रतिकुल परिस्थितीत आणि लोकांची धुणीभांडी करून ७८.३० टक्के गुण मिळविले. केंद्रात प्रथम येण्याचा मान पटकाविल्याने तिचे सर्वत्र कौतुक होत आहे. सटाणा येथील कॅप्टन अनिल पवार चौकात भाडेत्त्वाने खोलीत वास्तव्यास असलेली हेमांगी अत्यंत प्रतिकुल परिस्थितीत शिक्षण घेत आहे. वडील रमेश हे येथील एका हॉटेलमध्ये वेटरचे काम करीत होते. मात्र, दुर्धर आजाराने त्यांचा २०१० मध्ये मृत्यू झाला. घरातील कर्तबगार मनुष्य गेल्याने संसाराचा गाडा चालविणे कठीण झाले. दोन मुले व एक मुलगी यांचे पालन पोषण करणे अवघड असल्याने आई पुष्पा महाजन यांनी लोकांची धुणीभांडी करण्याचे काम सुरू केले. हेमांगी परिस्थितीची जाणीव असल्याने दहावी, अकरावी व बारावी शिक्षण घेत असतांना दुसऱ्यांचे पाठ्यपुस्तके घेऊन व आईसोबत धुणीभांडीची कामे करून अभ्यासावरील आपले लक्ष ढळू दिले नाही. दहावी व अकरावीत मिळालेले गुण व घरातील परिस्थितीची जाणीव शाळेतील सर्वच शिक्षकांसह विद्यार्थीनींनाही असल्याने एकत्र येत त्यांनी हेमांगीला आर्थिक मदतीचा हात दिला. शालेय पाठ्यपुस्तकांपासून तर अपेक्षित व प्रश्नसंच तिला पुरविले. महाविद्यालयात हेमांगी सह तिची मैत्रीण रुपाली सोनवणे या दोघा अभ्यासासाठी स्वतंत्र खोली देण्यात येत होती. आता निकाल लागल्यानंतर भविष्यात सटाणा कॉलेजमध्ये कला शाखेत प्रवेश घेऊन एमपीएससी अथवा यूपीएससीसारख्या स्पर्धा परीक्षांकडे जाण्याचा तिची इच्छा आहे. उत्कृष्ट व प्रशासनातील कर्तव्यदक्ष अधिकारी होण्याचे हेमांगीचे स्वप्न आहे. छंदाचे पैसे घरकामासाठी घरात आईला आर्थिक मदतीसाठी हेमांगी शिवणकाम व मेहंदीचे छंद जोपासून त्यातून मिळेल ते पैसे घरकामासाठी वापरत होती. सकाळी कॉलेजातून आल्यानंतर आईसोबत धुणीभांडी करणे, शिवणकाम व मेहंदी असे कामे करून घरातील आर्थिक भार उचलण्यात हेमांगी कुठेही कमी पडली नाही. असे असताना तिने दररोज चार ते पाच तास अभ्यासाठी दिले.
मोबाइल अॅप डाउनलोड करा आणि राहा अपडेट