जिल्ह्यात शंभर टक्के मतदान
विधान परिषद निवडणूक
टीम मटा
नाशिक स्थानिक स्वराज्य संस्था विधान परिषदेच्या एका जागेसाठी शांततेत मतदान पार पडले. मालेगाव, बागलाण, येवला, कळवण, निफाड, इगतपुरी, नांदगाव, चांदवडसह सर्व तालुक्यांत १०० टक्के मतदान झाले. कुठेही अनूचित प्रकार घडला नाही. आता २४ तारखेला होणाऱ्या मतमोजणीकडे जिल्हावासीयांचे लक्ष लागले आहे.
मालेगाव :
मालेगाव : नाशिक स्थानिक स्वराज्य संस्था विधान परिषदेसाठी येथील मतदान केंद्रावर सोमवारी मतदान प्रक्रिया शांततेत पार पडली. सर्वच ९७ मतदारांनी आपला मतदानाचा हक्क बजावल्याने १०० टक्के मतदान झाले. भाजपने राष्ट्रवादीला पाठिंबा दिल्याने या निवडणुकीत चांगलीच चुरस पहायला मिळाली. येथील तहसीलदार कार्यालयात मतदान केंद्र होते. केंद्राध्यक्ष म्हणून मनपा आयुक्त संगीता धायगुडे यांनी काम पाहिले. सकाळी ९.३० वाजेच्या सुमारास काँग्रेसचे महापौर रशीद शेख आपल्या सर्व २८ नगरसेवकांसह मतदानकेंद्रावर दाखल होत मतदानाचा हक्क बजावला. पहिल्या दोन तासात ९७ पैकी २४ इतके मतदान झाले होते. दुपारपर्यंत सर्व मतदारांनी मतदानाचा हक्क बजावला. अप्पर पोलिस अधीक्षक हर्ष पोद्दार यांनी केंद्रावर भेट देऊन पाहणी केली.
----
निफाड :
निफाड : येथील तहसील कार्यालयात मतदान झाले. सर्वप्रथम राष्ट्रवादी काँग्रेसच्या निफाड नगरपंचायतीच्या नगरसेवक व जिल्हा परिषद सदस्यांनी मतदान केले. शिवसेनेचे नगराध्यक्ष मुकुंद होळकर यांच्यासह नगरसेवक व जिल्हा परिषद सदस्य, पंचायत समिती सभापती राजेश पाटील यांनी दुपारी दोनच्या सुमारास मतदान केले. यानंतर भाजप, बसप व काँग्रेसच्या नगरसेवकांनी मतदान केले. दुपारी पावणेचार वाजता सर्व २९ मतदारांनी मतदान केल्याने १०० टक्के मतदान झाल्याचे जाहीर करण्यात आले.
---
इगतपुरी :
घोटी : इगतपुरी तालुक्यात सर्व २७ मतदारांनी मतदानाचा हक्क बजावला. दुपारी १२ वाजेनंतर मतदारांनी टप्प्याटप्प्याने येऊन मतदान केले. इगतपुरी तालुक्यात एकूण २७ मतदार होते. त्यात इगतपुरी नगराध्यक्षासह २१ नगरसेवक, पाच जिल्हा परिषद सदस्य, एक पंचायत समिती सभापती असे मतदार होते. त्यात १५ पुरुष, तर १२ महिला मतदार होते. जिल्हा परिषद उपाध्यक्षा नयना गावित, माजी आमदार काशीनाथ मेंगाळ यांच्या पत्नी सुशीला मेंगाळ, जिल्हा परिषद राष्ट्रवादीचे गटनेते उदय जाधव, नगरसेवक नईमखान आदींनी मतदानाचा हक्क बजावला.
---
कळवण :
कळवण : कळवण तालुक्यातही सर्व २४ मतदारांनी मतदानाचा हक्क बजावल्याने मतदानाची टक्केवारी १०० ठरली. कळवण नगरपंचायतीच्या निर्मितीनंतर प्रथमच मतदानाचा हक्क मिळालेल्या दोन स्वीकृतसह १९ नगरसेवक, चार जिल्हा परिषद सदस्य, तर एक पंचायत समितीच्या सभापती महिलेने मतदानाचा हक्क बजावला. मतदारांमध्ये २४ पैकी २० आघाडीचे, एक शिवसेनेचा व ३ भाजपचे मतदार आहेत. कळवणच्या प्रशासकीय इमारतीत तहसीलदार कार्यालयात मतदान प्रक्रिया शांततेत पार पडली. दुपारी १ ते २ :३० पर्यंत सर्वांनी मतदान केले. प्रशासकीय इमारतीच्या बाहेर काँग्रेस-राष्ट्रवादी आघाडीसह शिवसेनेचे प्रमुख पदाधिकारी व कार्यकर्ते तळ ठोकून होते.
----
बागलाण :
सटाणा : बागलाणमधून १०० टक्के शांततेत मतदान झाल्याची माहिती बागलाणचे तहसीलदार जितेंद्र कुवर यांनी दिली. तहसीलदारांच्या दालनात सकाळी आठ वाजता मतदान प्रकियेस सुरुवात झाली. यामध्ये सटाणा नगरपरिषदेचे २४ नगरसेवक, ७ जिल्हा परिषद सदस्य व पंचायत समिती सभापती मिळून ३२ मतदान असलेल्या मतदारांमध्ये १३ पुरुष व १९ महिलांनी मतदानाचा हक्क बजावला. सर्वप्रमथ स्विकृत नगरसेवक मनोहर देवरे यांनी मतदान केले, तर शेवटचे मतदान भाजपचे नगरसेवक मुन्ना शेख यांनी ३.३० वाजता केले. यावेळी सनपा मुख्याधिकारी हेमलता डगळे, सहाय्यक गटविकास अधिकारी महेंद्र कोर यांनी मतदान अधिकारी म्हणून कामकाज बघितले.
--
नांदगाव व चांदवड
मनमाड : नांदगाव व चांदवड तालुका तहसील येथे सोमवारी मतदान प्रक्रिया शांततेत पार पडली. चांदवड व नांदगावमध्ये १०० टक्के मतदान झाले. नांदगाव व मनमाड पालिका या दोन्ही ठिकाणच्या नगरसेवकांचे मतदान असल्याने एकूण मतदार संख्या ६० होती. चांदवडमध्ये २४ मतदार होते. दुपारनंतर मतदानाचा जोर वाढला. नांदगावमध्ये काँग्रेस, राष्ट्रवादीने सकाळ सत्रात, तर शिवसेना-भाजप सदस्यांनी दुपार सत्रात मतदान केले. नांदगाव येथे तहसीलदार योगेश जमधाडे, मुख्याधिकारी व्ही. बी. दातीर यांनी निवडणूक अधिकारी म्हणून कामकाज पाहिले. चांदवडमध्ये संथगतीने मतदान झाले. मात्र सर्व २४ मतदारांनी हक्क बजावल्याने चुरस दिसून आली. तहसीलदार शरद मंडलीक, नायब तहसीलदार रुपेश सुराणा यांनी निवडणूक अधिकारी म्हणून कामकाज पाहिले.
--
येवला
येवला : येवला तहसील कार्यालयातील मतदान केंद्रावर अगदी शांततेत मतदान पार पडले. दुपारी ३ वाजून ४० मिनिटांनी शेवटचे मतदान झाले. नगरपालिकेच्या सर्व २८ नगरसेवक मतदारांसह तालुक्यातील ५ जिल्हा परिषद सदस्य व एक पंचायत समिती सभापती अशा एकूण ३४ मतदारांनी येवला तहसील कार्यालयातील मतदान केंद्रावर आपला मतदानाचा हक्क बजावला. प्रमोद सस्कर यांनी ३.४० च्या सुमारास शेवटचे मतदान केले. येवला तहसीलदार नरेशकुमार बहिरम यांनी केंद्राध्यक्ष, तर पालिका मुख्याधिकारी संगीता नांदूरकर-शहाणे, पंचायत समिती सहाय्यक गटविकास अधिकारी अन्सार शेख व तहसीलचे संतोष तरटे यांनी मतदान अधिकारी म्हणून काम पाहिले.