म. टा. प्रतिनिधी, नाशिक राज्यात विक्रीस बंदी असलेल्या आणि केंद्रशासित दमन, दादरा, नगर-हवेली येथे निर्मित होणारा मद्यसाठा सीमावर्ती भागात दडवून दोन टप्प्यांत जिल्ह्यात वितरित होत असल्याची बाब समोर आली आहे. राज्य उत्पादन शुल्क विभागास चकवा देण्यासाठी तस्कर वेगवेगळ्या क्लृप्त्या वापरतात. त्याचाच हा एक भाग आहे. सुरगाणा तालुक्यातील केळीपाडा येथील कारवाईतून ही बाब समोर आली असून, येथील एका डोंगराच्या पायथ्याशी गवताच्या गंजी खाली लपवून ठेवलेला लाखो रुपयांचा मद्यसाठा एक्साइज विभागाच्या हाती लागला आहे. राज्य उत्पादन शुल्क विभागाच्या कळवण भरारी पथकाचे दुय्यम निरीक्षक प्रकाश अहिरराव यांना मिळालेल्या माहितीवरून ही कारवाई करण्यात आली. कर चुकवून आर्थिक लाभ उचलण्यासाठी परवानाधारक आणि बेकायदा विक्रेते मोठ्या प्रमाणात बेकायदा मद्याची विक्री करतात. यासाठी शेजारील केंद्रशासित प्रदेशांमधून तस्करी केली जाते. कारवाई टाळण्यासाठी तस्कर महाराष्ट्राच्या सीमावर्ती भागात मद्यसाठा आणून ठेवतात. आवश्यकतेनुसार नाशिकसह इतर ठिकाणी मद्यपुरवठा केला जातो. या माहितीच्या आधारे कळवण भरारी पथकाने केळीपाडा सुरगाणा तालुक्यातील पांगारणे शिवारात छापा मारला असता तब्बल एक लाख नऊ हजार ५६० रूपयांचा मद्यसाठा डोंगराच्या पायथ्याशी असलेल्या गवताच्या गंजीत लपविलेला आढळला. यात ३१२ बाटल्यांच्या ३६ बॉक्सचा समावेश आहे. हा मद्यसाठा जेस्सू किसन कणसे या शेतकऱ्याच्या शेतात आढळला असून, या गुन्ह्यात त्याचा सहभाग आहे किंवा नाही याबाबत पथक तपास करीत आहे. ही कारवाई दुय्यम निरीक्षक अहिरराव यांच्या नेतृत्वाखाली सहाय्यक दुय्यम निरीक्षक मनोहर गरूड, जवान संतोष कडलग, पांडुरंग वाईकर, अवधूत पाटील, वंदना मरकड आदींच्या पथकाने केली.
मोबाइल अॅप डाउनलोड करा आणि राहा अपडेट
