म. टा. प्रतिनिधी, नाशिक महापालिकेच्या प्रभाग क्रमांक १३ 'क'च्या पोटनिवडणुकीत महाराष्ट्र नवनिर्माण सेनेच्या अॅड. वैशाली मनोज भोसले यांनी दणदणीत विजय संपादित केला. दोन हजार ३२२ मतांची आघाडी घेत त्यांनी शिवसेना आणि भाजपच्या प्रतिस्पर्धी उमेदवारांना धूळ चारली. शिवसेनेच्या डॉ. स्नेहल संजय चव्हाण आणि भाजपच्या विजया हरीश लोणारी यांना पराभवाची चव चाखावी लागली. काँग्रेस, राष्ट्रवादीच्या पाठिंब्यामुळे मनसेचे इंजिन सुसाट सुटल्याचे मतमोजणीवेळी पाहावयास मिळाले. मनसेच्या नगरसेविका सुरेखा भोसले यांच्या निधनामुळे रिक्त झालेल्या जागेसाठी शुक्रवारी पोटनिवडणूक घेण्यात आली. या निवडणुकीत उणेपुरे ३९ टक्के मतदान झाले होते. कमी मतदानाचा फायदा नेमका कोणाला होणार याबाबतची उत्सुकता शिगेला पोहोचली होती. गंगापूररोडवरील शिवसत्य मंडळाच्या सभागृहात शनिवारी सकाळी दहा वाजता मतमोजणीला सुरुवात झाली. पहिल्या फेरीत शिवसेनेच्या उमेदवार डॉ. चव्हाण यांना ६९५, तर अॅड. भोसले यांना ३७३ मते मिळाली. डॉ. चव्हाण यांनी पहिल्या फेरीत ३२२ मतांनी आघाडी घेतली. तिसऱ्या आणि सातव्या फेरीत भाजपच्या उमेदवार विजया लोणारी यांनी आघाडी घेतली. परंतु, एकूण ११ पैकी आठ फेऱ्यांमध्ये मनसेचे इंजिन मतांची आघाडी घेत सुसाट सुटल्याचे पाहावयास मिळाले. एकूण १८ हजार ७५४ मतांपैकी ७,४५३ मते मिळवून अॅड. भोसले यांनी मनसेचा गड राखला. डॉ. चव्हाण यांना ५,१३१ मतांवर समाधान मानावे लागले. महापालिकेत सत्तेवर असलेल्या भाजपच्या विजया लोणारी ४,८१० मते मिळवून तिसऱ्या क्रमांकावर राहिल्या. निवडणुकीच्या रिंगणात एकूण आठ उमेदवार होते. त्यापैकी ज्योती पाटील (डोके) यांना ४४२, रंजना पवार यांना ४३९, समीना पठाण यांना १५५ मतांवर समाधान मानावे लागले. शमीना खान यांना ४०, तर अवंतिका घोडके यांना अवघी ३४ मते मिळाली. आसू आणि हसू... निवडणूक निर्णय अधिकारी रोहिदास बहिरम यांनी अॅड. वैशाली भोसले यांच्या विजयाची घोषणा करताच मनसेच्या कार्यकर्त्यांनी एकच जल्लोष केला. महाराष्ट्र नवनिर्माण सेना, तसेच राज ठाकरे यांच्या विजयाच्या घोषणा देण्यात आल्या. दिवंगत नगरसेविका सुरेखा भोसले यांच्या आठवणी दाटून आल्याने अॅड. वैशाली भोसले आणि त्यांच्या कुटुंबीयांना अश्रू अनावर झाले होते. अॅड. भोसले यांच्या गळ्यात विजयाची माळ पडल्याने आनंदित झालेले कार्यकर्ते, तर सुरेखा भोसले यांच्या आठवणीने त्यांच्या कुटुंबीयांच्या डोळ्यात तरळेलेली आसवे असे दृश्य मतमोजणी केंद्राच्या बाहेर पाहावयास मिळाले. मनसे, आघाडीच्या पदाधिकाऱ्यांची गर्दी मतमोजणीवेळी मनसेच्या उमेदवार अॅड. वैशाली भोसले यांनी आघाडी घेताच मनसेसह राष्ट्रवादी आणि काँग्रेसच्या पदाधिकाऱ्यांनी मतमोजणी केंद्राच्या बाहेर गर्दी केली. मनसेचे माजी आमदार नितीन भोसले, माजी महापौर अशोक मुर्तडक, विद्यमान शहराध्यक्ष अनिल मटाले, माजी शहराध्यक्ष राहुल ढिकले, डॉ. प्रदीप पवार, काँग्रेसचे शाहू खैरे, शहराध्यक्ष शरद आहेर, नगरसेविका हेमलता पाटील, वत्सला खैरे, राष्ट्रवादीचे शहराध्यक्ष रंजन ठाकरे, नगरसेवक गजानन शेलार आदींनी अॅड. भोसले यांना शुभेच्छा दिल्या. २५० मतदारांनी नाकारले उमेदवार या पोटनिवडणुकीतही मतदारांना 'नोटा'चा पर्याय वापरण्याची मुभा होती. आठपैकी एकाही उमेदवाराला मतदान देण्याची इच्छा नसलेल्या मतदारांनी वरीलपैकी एकही नाही अर्थात, 'नोटा'चा पर्याय वापरला. विशेष म्हणजे समीना पठाण, शमीना खान आणि अवंतिका घोडके या तीन उमेदवारांना मिळालेल्या एकूण मतांपेक्षाही 'नोटा' वापरणाऱ्यांची संख्या अधिक असल्याचे पाहावयास मिळाले. पाच उमेदवारांचे डिपॉजिट जप्त या निवडणुकीत दारूण पराभव झाल्याने आठपैकी पाच उमेदवारांचे डिपॉजिट जप्त झाले. विजयी उमेदवाराला प्राप्त एकूण मतांच्या १० टक्के मते मिळवू न शकणाऱ्या उमेदवारांचे डिपॉजिट जप्त केले जाते. ७०० हूनही कमी मते मिळालेल्या ज्योती पाटील, रंजना पवार, समीना पठाण, शमीना खान आणि अवंतिका घोडके यांचे डिपॉजिट जप्त झाले. कडेकोट पोलिस बंदोबस्त मतमोजणी सुरू झाली तेव्हापासून मतमोजणी केंद्रात आणि बाहेरही तणावाचे वातावरण होते. यावेळी अनुचित प्रकार घडू नये याकरिता कडेकोट पोलिस बंदोबस्त ठेवण्यात आला होता. सहाय्यक पोलिस आयुक्त डॉ. राजू भुजबळ यांच्यासह गंगापूर, पंचवटी, आडगाव पोलिस स्टेशनचे अधिकारी आणि कर्मचारी असा ५० हून अधिक पोलिसांचा बंदोबस्त मतदान केंद्राच्या आवारात तैनात होता. किरकोळ वादावादीचे प्रकार वगळता एकूणच मतमोजणी प्रक्रिया शांततेत पार पडली. मतमोजणीसाठी ६ टेबल लावण्यात आले होते. मोजणीसाठी ८ पर्यवेक्षक नेमण्यात आले होते. १६ सहाय्यक मतमोजणी अधिकाऱ्यांनी या मतमोजणीवर लक्ष ठेवले. रोहिदास बहिरम यांनी निवडणूक निर्णय अधिकारी म्हणून काम पाहिले. -- मतदारांनी मला विजयी करून सुरेखा भोसलेंना श्रद्धांजली वाहिली आहे. काझी गढीच्या संरक्षक भिंतीच्या प्रश्नासह जुने नाशिक भागातील अनेक समस्या मार्गी लागाव्यात यासाठी त्या पाठपुरावा करीत होत्या. त्यांचे प्रभागाच्या विकासाचे अपूर्ण राहिलेले स्वप्न पूर्ण करण्याचा प्रयत्न मी करणार आहे. -अॅड. वैशाली भोसले, नवनिर्वाचित नगरसेविका -- प्रभागातील मतदारांनी सुरेखा भोसले यांना ही मतदानरुपी आदरांजली वाहिली आहे. या पोटनिवडणुकीत मनसेने विजयाची गुढी उभारली असून, राज ठाकरे यांनी दिलेल्या मोदीमुक्त भारताची सुरुवात नाशिकमधून करण्यात आली आहे. काँग्रेस, राष्ट्रवादी आणि मनसे एकत्र आल्यामुळेच जातीयवादी शक्तींचा पराभव झाला. -नितीन भोसले, माजी आमदार
मोबाइल अॅप डाउनलोड करा आणि राहा अपडेट
