नाशिक ग्रामीण पोलिस दलातर्फे आयोजित 'रन फॉर युनिटी' ला प्रतिसाद
म. टा. वृत्तसेवा, मालेगाव
'आओ सब दौड ले, दिल को दिलसे जोड ले' असा नारा देत रविवारी (दि. ११) हजारो मालेगावकर 'रन फॉर युनिटी मालेगाव मॅरेथॉन २०१८' मध्ये धावले.
नाशिक ग्रामीण पोलिस दल व शांतता समितीच्या वतीने या मॅरेथॉनचे आयोजन करण्यात आले होते. याला मालेगावकरांनी भरघोस प्रतिसाद दिला. भल्या पहाटे शहरातील अबालवृद्धांनी मॅरेथॉनमध्ये धावत एकतेचा संदेश दिला. शहरात प्रथमच अशा भव्य मॅरेथॉनचे आयोजन करण्यात आले होते. यासाठी येथील पोलिस दल तसेच विविध सामाजिक संस्थांच्या वतीने जोरदार तयारी करण्यात आली होती. शहरवासीयांनी उत्स्फूर्त प्रतिसाद दिल्याने ५ हजारांहून अधिक स्पर्धकांनी नोंदणी केली होती. स्पर्धकांचा उत्साह वाढवण्यासाठी शनिवारी (दि. १०) सायंकाळी 'आओ और गावो' हा गीतगायन कार्यक्रमदेखील घेण्यात आला.
तीन, पाच व दहा किमी. अशा तीन गटांत ही मॅरेथॉन आयोजित करण्यात आली होती. शहरातील एकात्मता चौक पोलिस परेड मैदानपासून मॅरेथॉनला प्रारंभ झाला. प्रारंभी दहानंतर पाच व तीन किमीची मॅरेथॉनला फ्लॅग दाखवण्यात आला. ग्रामविकास राज्यमंत्री दादा भुसे, जिल्हा पोलिस प्रमुख संजय दराडे, अप्पर पोलिस अधीक्षक हर्ष पोद्दार, पोलिस उपअधीक्षक गजानन राजमाने, अजित हगवणे, आर्यन मॅन सुमेध वाव्हळ आदी मान्यवरांनी मॅरेथॉनला फ्लॅग दाखवत शुभारंभ केला.
मान्यवरांनी धरला ठेका
शहरातील एकात्मता चौकापासून मोसमपूल, शिवाजी पुतळा, नवीन बसस्थानक, फरान हॉस्पिटल ते परत एकात्मता चौक अशा मार्गाने स्पर्धक उत्साहाने धावले. स्पर्धकांचा उत्साह वाढवण्यासाठी जागोगाजी ढोलताशा पथक, देशभक्तीपर गीते वाजविण्यात येत होती. तसेच विविध सामाजिक संस्थाकडून पाणी, ज्यूस, चॉकलेट आदींचे स्टॉल लावण्यात आले होते. विविध गटांत धावण्यासाठी स्पर्धकांमध्ये चढाओढ पाहायला मिळाली. अनेकांनी पहिल्यांदाच मॅरेथॉनमध्ये धावण्याचा अनुभव घेतल्याने थकले तरीदेखील एकतेसाठी धावायचे आहे, असा उत्साह स्पर्धकामध्ये दिसून येत होता. या वेळी जिल्हाधिकारी बी. राधाकृष्णनदेखील उपस्थित राहिले. नाशिक ग्रामीण पोलिस दलाच्या वतीने शहराच्या एकात्मतेसाठी आयोजित केलेल्या मॅरेथॉन स्तुत्य उपक्रम असून, शहरवासियांनी दिलाला प्रतिसाद कौतुकास्पद असल्याचे त्यांनी सांगितले. यावेळी व्यासपीठावर उपस्थित मान्यवरांनी गाण्यांवर ठेका धरला तर विजेत्यांना बक्षीस वितरण करण्यात आले.
'आय एम फिनिशर!'साठी गर्दी
मॅरेथॉनच्या समारोपप्रसंगी पोलिस परेड मैदानावर शहरातील विविध कलावंतानी आपले नृत्य , गायन सादर करून सहभागी झालेल्यांना प्रोत्साहित केले. आपण धावलो...आणि शर्यत पूर्ण केली याचा आनंद अनेकांच्या चेहऱ्यावर ओसंडत होता. सहभागी झालेल्या प्रत्येकाला मेडल देण्यात आल्याने 'आय एम फिनिशर' या पॉडेमवर सेल्फी घेण्यासाठी अनेकांनी गर्दी केली होती. भल्या पहाटे 'रन फॉर युनिटी'साठी शहरातील विविध मान्यवरदेखील धावले. यात ग्रामविकास राज्यमंत्री दादा भुसे यांच्यासह पोलिस उपअधीक्षक राजमाने, अजित हगवणे, प्रांताधिकारी अजय मोरे, तहसीलदार ज्योती देवरे आदींसह विविध क्षेत्रातील मान्यवरांनी सहभागी होत उत्साह दाखवला.
ज्येष्ठ नागरिकांनी वेधले लक्ष
या मॅरेथॉनमध्ये ज्येष्ठ नागरिक गटात ८२ वर्षीय बी. के. देवरे हे सर्वाधिक वयस्कर धावपटू होते. तसेच अण्णा कापडणीस (वय ७०) यांनी ज्येष्ठ नागरिक गटात १० किमी मॅरेथॉनमध्ये प्रथम क्रमांक पटकावला. यासह वैशाली शेलार, डॉ. असिफा शेख, अफरोज शेख, मालेगावचा आंतरराष्ट्रीय धावपटू भिकू खैरनार यांनी लक्ष वेधून घेतले. मुस्लिम महिलांचादेखील सहभाग लक्षणीय ठरला.
मॅरेथॉनचा निकाल पुढीलप्रमाणे...
..दहा किलोमीटर..
(३६ ते ४५ वयोगट, पुरुष) - भिक्कू खैरनार (प्रथम), डॉ. विनीत देवरे (द्वितीय), पंकज पहाडे ( तृतीय)
(३६ ते ४५ वयोगट, महिला) - वैशाली शेलार (प्रथम), निरुपमा कासलीवाल (द्वितीय), स्वाती वाघ (तृतीय)
...........................................
(४६ ते ५५ वयोगट, पुरुष) - राजेश दुग्गड(प्रथम), रवी शेलार(द्वितीय), संजय पवार(तृतीय)
(४६ ते ५५ वयोगट, महिला) - डॉ. गिता तेलरांधे (प्रथम), अर्चना डावरे (द्वितीय)
...........................................
(१८ ते २५ वयोगट, पुरुष) - हिमांशू बोरसे (प्रथम), देव पठारे (द्वितीय), अमोल महाले (तृतीय)
(१८ ते २५ वयोगट, महिला) - योगिता वाघ (प्रथम), श्रद्धा पवार(द्वितीय), सरवद्या पवार(तृतीय)
...........................................
(२६ ते ३५ वयोगट, पुरुष) - विनोद पगारे (प्रथम), शफीक शेख (द्वितीय)
(२६ ते ३५ वयोगट, महिला) - वैष्णवी राऊत (प्रथम)
...........................................
खुला गट - काशिनाथ कापडणीस (प्रथम), डॉ. विलास बागडे (द्वितीय), दादाजी भारती (तृतीय)
...........................................
पाच किलोमीटर (खुला गट, पुरुष) - मोहन शिंदे(प्रथम), द्वारकादास तापडिया (द्वितीय), शिरीष कलंत्री (तृतीय)
पाच किलोमीटर (खुला गट, महिला) - साक्षी जोहरे (प्रथम), हिराबाई आहिरे (द्वितीय), दीप्ती चिंधडे (तृतीय)
...........................................
(४६ ते ५५ वयोगट, पुरुष) - मुकेश भोये - (प्रथम), सुधाकर महाजन(द्वितीय), नरेंद्र परदेशी(तृतीय)
(४६ ते ५५ वयोगट, महिला) - दीपाली मगर (प्रथम), अंजू लोढा (द्वितीय), माधवी ओस्तवाल(तृतीय)
...........................................
(३६ ते ४५ वयोगट, पुरुष) - हरिभाऊ खैरनार (प्रथम), उत्तम मानकर (द्वितीय), बाळासाहेब जगताप(तृतीय)
(३६ ते ४५ वयोगट, महिला) - डॉ. रोहिणी पाटील(प्रथम), वैशाली खैरनार(द्वितीय)
...........................................
(२६ ते ३५ वयोगट, पुरुष) - सचिन हिरे (प्रथम), पंकज चित्ते (द्वितीय), सोमेश महाजन (तृतीय)
(२६ ते ३५ वयोगट, महिला) - परेना बाहेती (प्रथम), मधू ओस्तवाल(द्वितीय)
...........................................
तीन किलोमीटर - (पुरुष) - मोहिर मौलिक (प्रथम), गोविंद शर्मा (द्वितीय), दीपक वाघ (तृतीय), वेदांत शिरसाठ (चतुर्थ), मानव सोनवणे (पाचवा)
तीन किलोमीटर - (महिला) - नंदिनी पवार (प्रथम), ऋतविका मंडाले (तृतीय), जयश्री देवकर (चतुर्थ)
मोबाइल अॅप डाउनलोड करा आणि राहा अपडेट