'राजे, तुम्ही पुन्हा जन्माला या', 'शिवजन्माने शिवनेरीवर भगवा झेंडा फडकला', 'आम्ही शिवाचे सैनिक वेडे, करू जिवाचे रान' यासारख्या गीतांसह छत्रपतींच्या पराक्रमी अलौकिक कीर्तीचे गुणगान गाणारी अनेक उत्साहवर्धक गीते...अश्वारूढ शिवराय अन् मावळे, जागोजागी मर्दानी कसरतींचे प्रदर्शन आणि शिवरायांचा जयघोष करत शिवप्रेमी उत्साहात रविवारी (दि. ४) मोठ्या संख्येने सहभागी झाले होते.
तरुणाईसह मान्यवर,जागोजागी डौलाने फडकणारे भगवे ध्वज...अशा उत्साहपूर्ण भगवेमय वातावरणात शानदार मिरवणुकीने येवलेकरांनी रविवारी हिंदवी स्वराज्याचे संस्थापक छत्रपती शिवाजी महाराज यांना मानाचा मुजरा केला. शिवसेनेच्या वतीने दरवर्षीप्रमाणे यंदाही तिथीप्रमाणे छत्रपती शिवाजी महाराज यांची जयंती रविवारी (दि. ४) अगदी मोठ्या उत्साहात साजरी केली गेली. येवला शहरातून दिमाखदार मिरवणूक सर्वांचेच लक्ष वेधून घेतले. शिवसेनेचे संपर्कप्रमुख भाऊ चौधरी, ग्रामीण जिल्हाप्रमुख भाऊलाल तांबडे यांच्या हस्ते शिवरायांच्या पुतळ्याचे पूजन झाले. याप्रसंगी उपजिल्हाप्रमुख नीलेश चव्हाण, वाल्मिक गोरे, जिल्हा बँकेचे माजी अध्यक्ष नरेंद्र दराडे, संचालक किशोर दराडे, संभाजी पवार, नगराध्यक्ष बंडू क्षीरसागर,उ पनगराध्यक्ष सुरज पटणी, शहरप्रमुख राजेंद्र लोणारी आदी उपस्थित होते. शनी पटांगणाजवळील शिवसेनेच्या मध्यवर्ती कार्यालयापासून सकाळी साडेअकराच्या सुमारास मिरवणुकीस प्रारंभ झाला. शिवसेनेच्या वतीने पहाटे सहा वाजेच्या सुमारास टिळक मैदानातील छत्रपती शिवरायांच्या पुतळ्यास तालुकाप्रमुख झुंजारराव देशमुख यांच्या हस्ते सपत्नीक अभिषेक करण्यात आला.
अन् आजीबाईंनी धरला ठेका
शिवजयंती निमित्त रविवारी येवल्यात निघालेली मिरवणूक अनेकांना आकर्षून जातानाच या मिरवणुकीने एका वयोवृद्ध आजीबाईंनादेखील भुरळ घातली. शिवरायांचे गुणगान गाणारे हे गीत ऐकून जवळून जाणाऱ्या वयाची पंच्याऐंशी ओलांडलेल्या आजीबाईंनी ठेका धरला. आजीबाईंचा हा मूड मिरवणुकीत सहभागी झालेल्या सर्वांचे लक्ष वेधून घेतानाच दाददेखील मिळवून गेला.
निफाडलाही शिवजयंती
निफाड : छत्रपती शिवाजी महाराजांची जयंती रविवारी (दि. ४) निफाड येथे शिवसेनेच्या वतीने तिथीनुसार साजरी करण्यात आली. शांतीनगर चौफुली येथे शिवाजी महारांजाची प्रतिमा व भव्य डिजिटल बोर्ड लावण्यात आला होता. या निमित्ताने दिंडोरी लोकसभेचे संपर्कप्रमुख भाऊसाहेब चौधरी यांच्या हस्ते शिवपुतळ्याचे पूजन करून पुष्पहार घातला. याप्रसंगी जिल्हाप्रमुख भाऊलाल तांबडे, तालुकाप्रमुख सुधीर कराड, जिल्हा परिषद सदस्य बाळासाहेब क्षीरसागर, सोमनाथ पानगव्हाणे, इरफानभाई सैयद, संजय कुंदे आदी उपस्थित होते.
मोबाइल अॅप डाउनलोड करा आणि राहा अपडेट