जिल्हाभरात कुसुमाग्रज यांच्या जयंतीनिमित्त मराठी भाषा गौरव दिन उत्साहात साजरा करण्यात आला. यानिमित्त ग्रंथदिंडी, वकृत्व स्पर्धा, निबंध स्पर्धा, सामूहिक वाचन उपक्रम, अभिमान गीताचे समूह गायन आदी उपक्रम राबवत मराठीचा जागर करण्यात आला.
मालेगावात विविध उपक्रम
मालेगाव : येथील शाह विद्यालयात कुसुमाग्रज यांच्या जयंतीनिमित्त मराठी भाषा गौरव दिन उत्साहात साजरा करण्यात आला. प्राचार्य संजय बेलन हे कार्यक्रमाच्या अध्यक्षस्थानी होते. पर्यवेक्षक ए. डी. तावडे, के. पी. मुसळे, एन. के. गायकवाड, एस. पी. बेलन, व्ही. पी. आर्विकर हे व्यासपीठावर उपस्थित होते. या निमित्ताने प्रारंभी ग्रंथदिंडीचे आयोजन करण्यात आले. विद्यार्थ्यांनी पारंपरिक मराठी वेशभूषा परिधान केली होती. यानंतर सभागृहात मराठी अभिमान गीताचे समूह गायन करण्यात आले. यावेळी निबंध, अक्षरलेखन स्पर्धा, वाचन उपक्रम राबविण्यात आले. पी. एस. पाटील यांनी सूत्रसंचालन केले.
उज्ज्वल प्राथमिक विद्यालय
संगमेश्वर भागातील उज्ज्वल प्राथमिक विद्यालयातील चिमुरडे विद्यार्थी व शिक्षकांनी ग्रंथदिंडी काढून नागरिकांचे लक्ष वेधून घेतले. मराठी वेशभूषा परिधान करून हातात घोषवाक्य घेत विद्यार्थ्यांनी मराठीचा जयघोष केला. मुख्याध्यापिका अर्चना गरुड यांनी अध्यक्षस्थान भूषविले. संस्थेचे सचिव रईस शेख प्रमुख पाहुणे म्हणून उपस्थित होते. मराठी अभिमान गीताचे समूह गायन करण्यात आले.
काकाणी वाचनालय
प. बा. काकाणी नगर वाचनालय येथे संदर्भ ग्रंथ व कोष वाङ्मय प्रदर्शनाचे उद्घाटन वाचनालयाचे अध्यक्ष ग्रंथमित्र अजय शाह यांच्या हस्ते करण्यात आले. या प्रदर्शनात मराठी विश्वकोष, महाराष्ट्र सांस्कृतिक कोष, वृत्तपत्रीय परिभाषा कोष, ज्ञानकोष, भूगोल कोष, शब्दकोष, चरित्र कोष, देविकोष, शासकीय पदनाम कोष, ऐतिहासिक शब्दकोष असे विविध प्रकारचे कोष, वाङ्मय, पुस्तके व ग्रंथ वाचकांसाठी विनामूल्य उपलब्ध करून देण्यात आली आहेत. हे ग्रंथप्रदर्शन काकाणी वाचनालयात रसिकवाचक व अभ्यासकांसाठी दोन दिवस विनामूल्य खुले राहील, असे आयोजकांनी कळविले आहे.
व्ही. जे. हायस्कूल
मनमाड : मराठी राजभाषा दिनानिमित्त विद्यार्थ्यांना मराठी भाषेची आवड निर्माण व्हावी, यासाठी विद्यार्थ्यांचे स्वरचित काव्यवाचन घेण्यात आले. मयंक वाघ, सुहास सूर्यवंशी, ओम परदेशी यांच्या काव्यवाचनाने उपस्थितांची वाहवा मिळवली. कवी बापू गोविंद यांनी ज्ञानपीठ पुरस्कारासंबंधी माहिती दिली. सुरुवातीला कुसुमाग्रजांच्या प्रतिमेचे पूजन मुख्याध्यापक नरेंद्र ठाकरे, उपमुख्याध्यापक संजय पवार यांच्या हस्ते करण्यात आले.
मनमाड वाचनालय
मनमाड : मनमाड सार्वजनिक वाचनालयात कवी कुसुमाग्रज यांच्या जयंतीनिमित्त व स्वा. सावरकर यांच्या पुण्यतिथीनिमित्त संयुक्त कार्यक्रमाचे आयोजन करण्यात आले होते. मराठी राजभाषा दिनानिमित्त शालेय विद्यार्थ्यांना वाचनालयात वाचनासाठी खास निमंत्रित करण्यात आले होते. छत्रे न्यू इंग्लिश स्कूल व मरेमा विद्यालयमधील सुमारे ५० विद्यार्थ्यांनी सलग तीन तास आपल्या आवडीची पुस्तके निवडून सामूहिक वाचनाचा उपक्रम राबविला. सर्वप्रथम इंडियन हायस्कूलची विद्यार्थिनी नूपूर आहेर व छत्रे न्यू इंग्लिश स्कूलची विद्यार्थिनी संजीवनी मोरे यांच्या हस्ते कवी कुसूमाग्रज व स्वा. सावरकर यांच्या प्रतिमेस पुष्पहार अर्पण करून कार्यक्रमाला सुरुवात करण्यात आली. यावेळी वाचनालयाचे अध्यक्ष नितीन पांडे, सचिव कल्पेश बेदमुथा, माजी अध्यक्ष प्रदीप गुजराथी आदी उपस्थित होते.
बेज विद्यालय
कळवण : मराठा विद्या प्रसारक समाज संचलित महात्मा फुले माध्यमिक व उच्च माध्यमिक विद्यालय बेज येथे आयोजित मराठी राजभाषा दिनाचा कार्यक्रम उत्साहात झाला. प्राचार्य पी. एम. बागूल अध्यक्षस्थानी होते. प्रमुख अतिथी म्हणून अभिनवचे मुख्याध्यापक भिमराव रौंदळ उपस्थित होते. यावेळी विलास शेवाळे, जीवन बागूल, दीपक कापडणीस, प्रभाकर पवार आदी उपस्थित होते. कैलास हिरे यांनी सूत्रसंचालन केले.
दिंडोरीत गौरव दिन
दिंडोरी : येथील मविप्र महाविद्यालयात वि. वा. शिरवाडकर यांच्या जयंती निमित्त मराठी राजभाषा गौरव दिन कार्यक्रम उत्साहात झाला. कार्यक्रमाची सुरुवात प्रतिमापूजनाने झाली. देवीदास शिंदे यांनी प्रास्ताविक केले. यावेळी आर. आर. झोमन, एन. के. नवले, सुधीर मुरकुटे, बलराम कांबळे, डॉ. ज्योती पवार उपस्थित होते.
कुसुमाग्रज विद्यालय
निफाड : निफाड तालुक्याचे भूमिपुत्र असलेल्या तात्यासाहेब शिरवाडकर तथा कविवर्य कुसुमाग्रज यांच्यामुळे शिरवाडे गावाचे नाव सातासमुद्रापार गेले आहे. त्याचा अभिमान बाळगून शिक्षणक्षेत्रात गावाने नावलौकिक मिळवावा, असे आवाहन निफाड पंचायत समितीचे सभापती पंडित आहेर यांनी केले.
मविप्रच्या कविवर्य कुसुमाग्रज माध्यमिक व उच्च माध्यमिक विद्यालयात मराठी राजभाषा दिनानिमित्त आयोजित कार्यक्रमात आहेर बोलत होते. यावेळी येथे असणाऱ्या कुसुमाग्रज ग्रंथालयात राज्यसेवा व लोकसेवा आयोगाचे अभ्यासपुस्तके स्वखर्चाने देणार असल्याचे आहेर म्हणाले. यावेळी कविवर्य कुसुमाग्रजांच्या प्रतिमेचे पूजन सभापती आहेर, मविप्र सभापती माणिकराव बोरस्ते, संचालक प्रल्हाद गडाख, उत्तम भालेराव, उपजिल्हाधिकारी पाटील, गटशिक्षणाधिकारी सरोज जगताप, वैशाली झनकर, मुख्याध्यापक व्ही. आर. थोरात यांनी केले
रानवड विद्यालय
निफाड : रानवड कारखाना येथील क. का. वाघ विद्यालयात मराठी राजभाषा दिन साजरा करण्यात आला. यावेळी कवि ऐश्वर्य पाटेकर, प्राचार्य विकास शिरसाट, प्राचार्य पगार, पर्यवेक्षक ढोमसे उपस्थित होते. मराठी भाषा गौरव दिनानिमित्त विद्यालयात वक्तृत्व स्पर्धा आयोजित करण्यात आली. यावेळी मराठी भाषा काल आणि आज व कविवर्य कुसुमाग्रज या विषयावर मार्गदर्शन केले.
सटाणा नगरपालिका
सटाणा : येथील नगरपालिकेच्या सार्वजनिक वाचनालयात मराठी भाषा गौरव दिवस साजरा करण्यात आला. यावेळी वाचनालयाचे सभापती शमा अरीफ मन्सुरी, माजी उपनगराध्यक्षा निर्मला भदाणे, नगराध्यक्ष सुनील मोरे, गटनेते राकेश खैरनार, बांधकाम सभापती सुनीता मोरकर, उपसभापती शमिम शफीक मुल्ला, नगरसेविका भारती सूर्यवंशी, डॉ. विद्या सोनवणे, सोनाली बैताडे, संगीता देवरे, नगरसेवक बाळू बागूल, मुख्याधिकारी हेमलता डगळे, दीपक नंदाळे आदी उपस्थित होते.
मोबाइल अॅप डाउनलोड करा आणि राहा अपडेट
