म. टा. वृत्तसेवा, त्र्यंबकेश्वर
त्र्यंबकेश्वरच्या अन्नपूर्णा मंदिराच्या प्राणप्रतिष्ठा सोहळ्यास भव्य कलशयात्रेने रविवारी (दि. १८) शुभारंभ झाला. हा सोहळा दि. २८ फेब्रुवारीपर्यंत चालणार असून, त्यानिमित्त लक्षचंडी महायज्चे आयोजन करण्यात आले आहे. यामध्ये दि. २१ फेब्रुवारी रोजी प्राणप्रतिष्ठा सोहळा होणार आहे.
त्र्यंबकेश्वर येथील निलगिरी पर्वतावर साकारत असलेल्या माँ अन्नपूर्णाच्या भव्य मंदिराच्या प्राणप्रतिष्ठा व लक्षचंडी महायज्ञ सोहळ्यास रविवारी, कलश शोभायात्रेद्वारा प्रारंभ झाला. सकाळी ९ वाजता नीलपर्वतापासून सुरू झालेली ही यात्रा त्र्यंबकेश्वर मधील रस्त्यांवर वाजतगाजत कुशावर्तापर्यंत गेली. यात्रेत सिद्धपीठ श्री अन्नपूर्णा आश्रम चॅरिटेबल ट्रस्टचे महामंडलेश्वर स्वामी विश्वेश्वरानंद गिरी महाराज, महामंडलेश्वर स्वामी सच्चिनानंद गिरी, लक्ष्यचंडी आचार्य कल्याणनंद आचार्य कल्याणदत्त शास्त्री, प्राणप्रतिष्ठा आचार्य बाळासाहेब दीक्षित यांच्यासह देशभरातून आलेले भाविक, १०० यजमान जोडपी व नागरिक सहभागी झाले होते. आज (दि. १९) सकाळी ८ वाजेपासून अरणीमंथनद्वारा अग्नि प्रज्वलित करून लक्षचंडी महायज्ञाची सुरुवात होईल.
जोतिर्लिंग मंदिराचा कलश व मॉ अन्नपूर्णाचे दर्शन असा अदभूत योग मिळणाऱ्या नील पर्वतावर हे मंदिर ३ एकरच्या विस्तीर्ण परिसरात उभारण्यात आले असून, शिवलिंग व अन्नपूर्णा मंदिर एकच ठिकाणी असलेले हे देशातील दुसरेच ठिकाण आहे. वस्तूकलेचा अद्वितीय नमुना असलेले हे मंदिर पूर्णता: संगमरवर मध्ये साकारले आहे. या मंदिरात अन्नपूर्णा देवीची मूर्तीसह सरस्वती देवी व महाकालीची मूर्तीही पंचधातूमध्ये साकारल्या आहेत. दि. २१ रोजी होणाऱ्या प्राणप्रतिष्ठा सोहळ्यास लोकसभा अध्यक्ष सुमित्रा महाजन, मुख्यमंत्री देवेंद्र फडणवीस, पालकमंत्री गिरीश महाजन, सार्वजनिक उपक्रम मंत्री एकनाथ शिंदे व जलसंधारण मंत्री राम शिंदे यांची प्रमुख उपस्थिती राहणार असल्याची माहिती समितीद्वारे देण्यात आली. भाविकांनी महाप्रसादाचा लाभ घ्यावा, असे आवाहनही समितीतर्फे करण्यात आले आहे.
मोबाइल अॅप डाउनलोड करा आणि राहा अपडेट
