म. टा. वृत्तसेवा, दिंडोरी/निफाड
शिवसेना-भाजप युतीचे भांडण हे फक्त सत्तेच्या वाटणीसाठी असून, शिवसेना ही पूर्वीची शिवसेना राहिली नसून, ती भिवसेना झाली आहे. जनतेला 'अच्छे दिन'चे स्वप्न दाखवून फसविणाऱ्या फसवणीस सरकारला धडा शिकविण्यासाठी सज्ज व्हा, असे आवाहन विधान परिषदेतील विरोधी पक्षनेते धनंजय मुंडे यांनी केले.
दिंडोरी, निफाड व कळवण येथे शिवसेना-भाजप युती सरकारच्या विरोधात राष्ट्रवादी काँग्रेसतर्फे हल्लाबोल आंदोलन करण्यात आले. यावेळी राष्ट्रवादीच्या नेत्यांनी राज्य सरकारवर जोरदार हल्लाबोल केला. मुंडे पुढे म्हणाले, की लोकसभेपूर्वी गुजरात मॉडेल व 'अच्छे दिन'चे स्वप्न दाखवून केंद्रात सत्ता मिळवली. पंधरा लाख बँक खात्यावर देण्याचे आश्वासन दिले. जनधन खाते उघडायला लावले पण बँक खात्यात दमडीही आली नाही. सातबारा उतारा कोरा, वीज वीजबिल माफ, शेतमालाला भाव आदी आश्वासने देत फडणवीस सरकार सत्तेत आले, पण त्यांनी सर्वांची फसवणूक केली. आता त्यांना त्यांची जागा दाखवण्याची वेळ आली आहे, असे मुंडे यांनी सांगितले. यावेळी राष्ट्रवादी प्रदेशाध्यक्ष सुनील तटकरे, खासदार सुप्रिया सुळे, ज्येष्ठ नेते जयंत पाटील आदी उपस्थित होते.
नरेंद्र मोदींविरोधात देशातील जनता जात असल्याचे पाहता लोकसभेच्या मुदतपूर्व निवडणूक होण्याची चिन्हे आहेत. हे 'थापाडे सरकार' असल्याचा घणाघात करीत या सरकारला खाली खेचण्यासाठी आतापासूनच कामाला लागावे, असे आवाहन जयंत पाटील यांनी केले.
पाणी पळवू देणार नाही
मांजरपाडा वळण योजना प्रकल्प आम्ही सुरू केला, पण शिवसेना-भाजप युती सरकारने ते काम बंद पाडले. हे पाणी महाराष्ट्रातील जनतेला देण्याऐवजी गुजरातला देण्याचा घाट घातला आहे. पण, हे पाणी आम्ही गुजरातला कदापि जाऊ देणार नाही, असे राष्ट्रवादीचे प्रदेशाध्यक्ष सुनील तटकरे यांनी सांगितले. तसेच, शेतकऱ्यांना सरसकट कर्जमाफी मिळत नाही तोपर्यंत हे आंदोलन सुरूच राहील, असेही त्यांनी स्पष्ट केले.
शिवसेना-भाजप युती सरकारने जनतेचा भ्रमनिरास केला आहे. फक्त घोषणांचा पाऊस पाडणाऱ्या या सरकारला खाली खेचा. सर्वसामान्यांना तुम्ही 'डिजिटल इंडिया'ची स्वप्न दाखवतात. तो जर उपाशी असेल तर तुमचा डिजिटल इंडिया काय कामाचा. न्याय मिळत नाही म्हणून लोकांना मंत्रालयात जाऊन आत्महत्या करण्याची वेळ येत असेल तरी अशी सत्ता आम्हाला नको. मराठी शाळा बंद केल्या तर मंत्र्यांना घराबाहेर पडू देणार नाही.
- सुप्रिया सुळे, खासदार
मोबाइल अॅप डाउनलोड करा आणि राहा अपडेट
