पारंपरिक पद्धतीने मिरवणूक काढत शिवजयंती साजरी न करता यंदा शिवजन्मोत्सव सोहळा होणार असल्याची माहिती शिवजन्मोत्सव सोहळा समितीचे अध्यक्ष सुनील बागूल यांनी पत्रकार परिषदेत दिली. महाराष्ट्रात प्रथमच अशा प्रकारचा सोहळा होणार असून, राज्यात पथदर्शी सोहळा ठरेल, असे मत या वेळी त्यांनी व्यक्त केले. या सोहळ्यात ४० फूट उंचीचे होर्डिंग व ६१ फुटी भगव्या ध्वजाचे आकर्षण असेल.
शिवजयंती सोहळा समितीतर्फे हॉटेल एमराल्ड पार्कमध्ये पत्रकार परिषद झाली. त्या वेळी बागूल यांनी सोहळ्याची माहिती दिली. या सोहळ्यानिमित्त जिल्ह्यातील प्रत्येक तालुक्यात अशा प्रकारचा सोहळा होणार असून, त्याचे नियोजन करण्यात आले आहे. शिवप्रेमींनी १९ फेब्रुवारी रोजी अनंत कान्हेरे मैदानावर सकाळी ९ उपस्थित राहावे, असे आवाहन करण्यात आले आहे. सुरुवातीला जिजाऊ वंदन, शिववंदन होऊन शिवगर्जना होणार आहे. त्यानंतर १० वाजता गोल्फ क्लब येथून पालखी सोहळ्याला सुरुवात होईल. ही पालखी खडकाळी सिग्नल, शालिमार, गाडगे महाराज पुतळा, मेनरोड, रविवार कारंजा, होळकर पूल, मालेगाव स्टॅँड, पंचवटी कारंजामार्गे पालखी रामकुंडाकडे अभिषेक करण्यासाठी जाणार आहे. या सोहळ्यात ढोल पथक, लेझीम पथक, चित्ररथ सहभागी होणार आहे. सोहळ्यात जिल्ह्यातून लाखो शिवप्रेमी सहभागी होतील, असा दावा व्यक्त करण्यात येत आहे.
छत्रपती शिवाजी महाराजांच्या जीवनावर आधारित विविध चित्ररथ सहभागी होणार आहेत. हे सर्व चित्ररथ ऐतिहासिक घटनेवर आधारित असतील. या सोहळ्यात डीजे वाजवण्यात येणार नसून, पारंपरिक वाद्यांचा वापर केला जाणार आहे. ज्याप्रमाणे जिल्ह्यात नियोजन करण्यात आले आहे, त्याचप्रमाणे तालुका स्तरावरदेखील कार्यक्रम होणार आहेत. सकल मराठा बहुजन समाजाच्या वतीने हा कार्यक्रम होईल. अनंत कान्हेरे मैदानावर १०० फूट लांब व ४० फूट उंच अशा मापाचे होर्डिंग लावण्यात येणार आहे. त्याचप्रमाणे ६१ फूट उंचीचा भगवा ध्वज आकर्षणाचा केंद्रबिंदू ठरणार आहे. या मिरवणुकीत घोडदळ व पायदळ असेल. त्याचप्रमाणे आदिवासी भागातून आलेली नृत्यपथकेदेखील यात सहभागी होतील. शाळा, महाविद्यालये, सामाजिक संस्था, सार्वजनिक मंडळे, सर्व पक्ष सहभागी होतील. या सोहळ्यासाठी ईदगाह मैदानावर पार्किंगची व्यवस्था करण्यात आली आहे.
रात्री बाराला जल्लोष
सीबीएस येथील छत्रपती शिवाजी महाराजांच्या पुतळ्याला १८ तारखेच्या रात्री १२ वाजता अभिवादन करण्यात येणार आहे. नागरिकांनी आपल्या घरावर भगवा ध्वज उभारावा, रोषणाई करावी, सडा-रांगोळी काढून शिवप्रतिमेची पूजा करून घरात गोडधोडच जेवण करावे, असे आवाहन सोहळा समितीच्या वतीने करण्यात आले आहे.
मोबाइल अॅप डाउनलोड करा आणि राहा अपडेट
