फेब्रुवारी महिना सुरू होताच तरुणाईला वेध लागतात ते १४ तारखेच्या व्हॅलेंटाइन डेचे. आपल्या प्रिय व्यक्तीला गिफ्ट्स, गुलाबाचे फूल देऊन प्रेम व्यक्त करण्याचा हा दिवस तरुणाईसाठी मोठ्या आकर्षणाचा असल्याने त्यादृष्टीने बाजारपेठाही सज्ज होत असतात. यंदाही तरुणाईला आकर्षित करतील असे गिफ्ट्स, ग्रीटिंग कार्ड्स, की-चेन्स, चॉकलेट्स, चॉकलेट बुके आदींनी बाजारपेठ सजली असून, हटके गिफ्ट्स घेण्याला तरुणाईकडून पसंती दिली जात आहे.
व्हॅलेंटाइन वीकचा प्रारंभ रोझ डेपासून झाला असून, व्हॅलेंटाइन डेपर्यंत हा वीक सेलिब्रेट केला जाणार आहे. प्रेम व्यक्त करण्यासाठी हक्काचा दिवस म्हणजे व्हॅलेंटाइन डे असे मानले जाते. अनेक जण प्रेम व्यक्त करण्यासाठी या स्पेशल डेची वाट बघत असतात. या दिवसाच्या आठवडाभरापूर्वीपासूनच व्हॅलेंटाइन वीकच्या माध्यमातून प्रेमाचा रंग तरुणाईवर चढत असतो. यंदादेखील हा उत्साह दिसून येत असून, कॉलेजियन्समध्ये याचा उत्साह अधिक आहे. रोझ डेने या वीकला सुरुवात झाल्यानंतर शहरातील तरुणांनी आपल्या प्रिय व्यक्तीला गुलाबपुष्प देत या दिवसाच्या शुभेच्छा दिल्या. गुरुवारी प्रपोज डे सेलिब्रेट करताना अनेक दिवसांपासून मनात ठेवलेल्या भावनांना शब्दांद्वारे वाट मोकळी करून देण्यात आली.
वीक डेज् असे...
शुक्रवार (दि. ९) चॉकलेट डे, शनिवार (दि. १०) टेडी डे, रविवार (दि. ११) प्रॉमिस डे, सोमवार (दि. १२) हग डे, मंगळवार (दि. १३) किस डे आणि बुधवारी (दि. १४ फेब्रुवारी) व्हॅलेंटाइन डे याप्रमाणे हा वीक सेलिब्रेट केला जाणार आहे.
चॉकलेट बुकेंची चलती
व्हॅलेंटाइन वीकअंतर्गत आज, शुक्रवारी (दि. ९) चॉकलेट डे सेलिब्रेट केला जाणार आहे. त्याच्या पूर्वसंध्येलाच आकर्षक पॅकिंगमधील चॉकलेटत्ची तरुणांकडून खरेदी केली जात होती. यात विशेषत: चॉकलेट बुके या प्रकाराला चांगली मागणी असल्याचे दिसून आले. हार्ट, टेडी शेपमधील चॉकलेट्सचा बुके विकत घेण्याला पसंती दिली जात होती.
मोबाइल अॅप डाउनलोड करा आणि राहा अपडेट
