तपोवनातील निर्मोही आखाड्यात आलेल्या दोन चोरट्यांनी चार मोबाइल लंपास केले. ही घटना २ फेब्रुवारी रोजी रात्री साडेनऊच्या सुमारास घडली. या प्रकरणी आडगाव पोलिस स्टेशनमध्ये गुन्हा नोंदवण्यात आला आहे. या प्रकरणी ललितकुमार सतीशप्रसाद दुवेदी (वय २८, भारत सेवाश्रम, तपोवन) यांनी दिलेल्या तक्रारीनुसार, तपोवनातील निर्मोही आखाड्यात भाविकांची दर्शनासाठी नेहमी वर्दळ असते. दोन फेब्रुवारी रोजी या ठिकाणी एमएच १५/एफएल २०७२ या वाहनावर आलेल्या दोघांनी दोन सॅमसंग आणि दोन लावा कंपनीचे असे एकूण चार मोबाइल लंपास केले. या प्रकरणी दोन जणांविरुद्ध आडगाव पोलिस स्टेशनमध्ये गुन्हा दाखल करण्यात आला आहे. पीएसआय धनश्री पाटील तपास करीत आहेत.
सायबर कॅफे फोडले
दिंडोरी रोडवरील बाणगंगा सोसायटीतील गाळा क्रमांक ११ मधील साईकृष्ण सायबर कॅफे फोडून चोरट्यांनी ५२ हजार रुपयांचा मुद्देमाल लंपास केला. ही घटना ३ फेब्रुवारीस पहाटेच्या सुमारास झाली. या प्रकरणी बाळकृष्ण पुंडलीक पवार (वय ५२, किशोर सूर्यवंशी मार्ग, म्हसरूळ) यांनी फिर्याद दिली आहे. चोरट्यांनी मध्यरात्री ते पहाटेच्या सुमारास दुकान फोडून आत प्रवेश केला. दुकानातील एक अॅसुस कंपनीचा सीपीयू, सीसीटीव्ही डीव्हीआर मशीन, सीसीटीव्ही कॅमेरा, रोख रक्कम, तसेच एचपी कंपनीचा एक लॅपटॉप असा मुद्देमाल लंपास केला. दुकान फोडल्याची घटना सकाळच्या सुमारास उघडकीस आली. या प्रकरणी म्हसरूळ पोलिस स्टेशनमध्ये गुन्हा नोंदवण्यात आला असून, पीएसआय व्होंडे तपास करीत आहेत.
कारच्या धडकेत तरुणाचा मृत्यू
भरधाव कारने दिलेल्या धडकेत मोहन चंद्रभान कदम (वय २५, रा. भरविहीर बुद्रुक, ता. इगतपुरी) याचा मृत्यू झाला. ही घटना पाथर्डी- अंबड रोडवरील जनता स्वीट दुकानासमोर शनिवारी (दि. ३) पहाटे पावणेचारच्या सुमारास घडली. अंबड गावातील गोंधळाचा कार्यक्रम आटोपून मोहन भाऊ प्रवीण खंडेराव कदम (वय २८, रा. पाटीलनगर, त्रिमूर्ती चौक, सिडको) याच्या दुचाकीवर (एमएच १५/बीएफ ४०८५) घराकडे परतत असताना अपघात झाला. जनता स्वीटसमोर पाथर्डी फाट्याकडून भरधाव कारने (एमएच ०४/जीयू ५४३७) समोरून धडक दिली. यात दुचाकीस्वार मोहनच्या डोक्यासह इतर शरीरावर गंभीर दुखापत झाली. त्यातच त्याचा मृत्यू झाला. मोहनचा भाऊदेखील गंभीर जखमी झाला. या प्रकरणी प्रवीणच्या फिर्यादीनुसार, अंबड पोलिसांनी कारचालक राजेश रमेश खैरनार (वय ४६, रा. उत्तमनगर, एकता चौक, सिडको) याच्या विरोधात गुन्हा दाखल केला असून, संशयित कारचालकास पोलिसांनी अटक केली आहे. सहाय्यक पोलिस निरीक्षक खडके तपास करीत आहेत.
जुगार अड्ड्यांवर छापे
शहर पोलिसांनी वेगवेगळ्या ठिकाणी सुरू असलेल्या चार जुगार अड्ड्यांवर छापे टाकले. या ठिकाणाहून रोकड, जुगाराचे साहित्य जप्त करण्यासह संशयितांना अटक करण्यात आली आहे. अंबड पोलिसांनी शुक्रवारी (दि. २) रात्री केलेल्या कारवाईत किरण संजय जाधव (वय २७, रा. हरिओम रो हाऊस ४, साईग्राम, अंबड) या संशयितासह आणखी सहा जणांना अटक केली. अंबड लिंक रोडवरील एन. एम. एंटरप्राइजेस या दुकानाच्या पत्र्याच्या शेडमध्ये संशयित पत्त्यावर जुगार खेळत होते. अंबड पोलिसांनी रात्री सव्वाअकराच्या सुमारास येथे कारवाई करून रोकड आणि जुगाराचे साहित्य असा २० हजार ७८० रुपयांचा मुद्देमाल जप्त केला. या प्रकरणी अंबड पोलिसांनी गुन्हा नोंदवला असून, हवालदार मल्ले तपास करीत आहेत. नाशिकरोड पोलिसांनी सामनगावरोडवरील एकलहरा गेट परिसरातील मोकळ्या जागेत मटका खेळणाऱ्या दोन जणांना शनिवारी मध्यरात्री दोनच्या सुमारास अटक केली. दीपक रामा धोत्रे आणि एकनाथ बाबूराव बोरोडे (दोघे रा. एकलहरा गेट, सामनगाव रोड) अशी मटका खेळणाऱ्या आरोपींची नावे आहेत. नाशिकरोड पोलिसांनी संशयितांविरोधात जुगार प्रतिबंधक अधिनियमानुसार गुन्हा दाखल केला असून, सहाय्यक पोलिस उपनिरीक्षक दळवी तपास करीत आहेत. दरम्यान, सातपूर पोलिसांनी कार्बन नाका, भाजी मार्केट, सातपूर या ठिकाणी शनिवारी दुपारच्या सुमारास कारवाई करीत संजय रामलाल बागूल (४५, द्वारकामाई अपार्टमेंट, धर्माजी कॉलनी, शिवाजीनगर, सातपूर) याला अटक केली. कल्याण नावाचा मटका खेळताना, तसेच खेळवताना बागूल पोलिसांच्या हाती लागला होता. पोलिस शिपाई कासार तपास करीत आहेत.
गावठी कट्टा बाळगणाऱ्या दोघांना अटक
गावठी कट्टा बाळगणाऱ्या चेतन आनंदा ठमके (वय १९, रा. नवजीवन डे स्कूल, त्रिमूर्ती चौक, सिडको) आणि पंकज विनोद आहेर (वय १८, रा. शिवशक्ती चौक, साईबाबा मंदिरासमोर, त्रिमूर्ती चौक, सिडको) या दोघांना सरकारवाडा पोलिसांनी अटक केली. व्ही. एन. नाईक कॉलेजच्या भिंतीजवळ शनिवारी दुपारी अडीचच्या सुमारास ही कारवाई करण्यात आली. या प्रकरणी सरकारवाडा पोलिस स्टेशनमध्ये गुन्हा दाखल करण्यात आला. सहाय्यक पोलिस उपनिरीक्षक भालेराव यांनी दिलेल्या फिर्यादीनुसार, सरकारवाडा पोलिस स्टेशनमध्ये गुन्हा दाखल करण्यात आला आहे. सहाय्यक पोलिस निरीक्षक सारिका आहिरराव तपास करीत आहेत.
मोबाइल अॅप डाउनलोड करा आणि राहा अपडेट
