समाजातील गरजूंपर्यंत सरकारी योजनांची माहिती पोहोचायला हवी. न्यायालयांनी त्यासाठी योगदान देण्याचे निर्देश सुप्रीम कोर्टाने दिले आहेत. जिल्हा विधी सेवा प्राधिकरणाने आयोजित केलेल्या मेळाव्याच्या माध्यमातून विविध शासकीय विभागांची माहिती एकाच ठिकाणी उपलब्ध झाली असून, त्याचा लाभ तळागाळातील घटकांना मिळेल, असे प्रतिपादन प्रमुख जिल्हा व सत्र न्यायाधीश सूर्यकांत शिंदे यांनी केले.
विधी सेवा शिबिर आणि शासकीय योजनांच्या मेळाव्याच्या उद्घाटनप्रसंगी मंगळवारी ते बोलत होते. कार्यक्रमास महापालिका आयुक्त अभिषेक कृष्णा, पोलिस आयुक्त डॉ. रवींद्रकुमार सिंगल, सिव्हिल सर्जन डॉ. सुरेश जगदाळे, जिल्हा बार असोशिएशनचे अध्यक्ष अॅड. नितीन ठाकरे, जिल्हा व सत्र न्यायाधीश यू. एम. नंदेश्वर, मुख्य न्यायदंडाधिकारी एस. टी. डोके, जिल्हा विधी सेवा प्राधिकरणाचे सचिव एस. एम. बुक्के, जिल्हा सरकारी वकील अजय मिसर आदी उपस्थित होते.
सरकार राबवीत असलेल्या योजनांची माहिती सर्वांपर्यंत पोहोचविण्यासाठी सरकारी अधिकारी, तसेच कर्मचाऱ्यांनी सर्वसामान्यांच्या अडचणी समजावून घ्याव्यात, तसेच त्यांना त्याबाबत मार्गदर्शन करावे. आजच्या कार्यक्रमामधून एकाच ठिकाणी तीसपेक्षा अधिक योजनांची माहिती मिळत असल्यामुळे त्याचा उपयोग नक्कीच होईल, असा विश्वास न्यायाधीश शिंदे यांनी व्यक्त केला. दरम्यान, ग्रामीण भागातील गरिबांना त्यांच्यासाठी असलेल्या योजनांची माहिती कोठे मिळेल हे माहिती नसल्यामुळे प्रयत्न करूनदेखील ती मिळत नाही. माहितीच मिळत नसल्याने त्यांना योजनांपासून वंचित राहावे लागते. मेळाव्याच्या आयोजनाचा नक्कीच फायदा होईल, तसेच ही माहिती अनेकांपर्यंत पोहोचविण्यासाठी सतत प्रयत्न व्हावेत, असे मत पोलिस आयुक्त डॉ. रवींद्रकुमार सिंगल यांनी व्यक्त केले.
नागरिकांनी घेतली माहिती
जिल्हा विधी सेवा प्राधिकरणाच्या वतीने बी. डी. भालेकर मैदान, महाकवी कालिदास कलामंदिरजवळ येथे हा मेळावा झाला. सकाळी १० ते दुपारी ४ वाजेपर्यंत दोन हजारांहून अधिक नागरिकांनी येथे भेट देऊन विविध योजनांची माहिती घेतली. शासकीय विभागांनी २९ स्टॉल्स उभारले होते. यामध्ये पोलिस आयुक्तालय, महिला व बालकल्याण विभाग, जिल्हा परिषद, महापालिकेचे शिक्षण विभाग, आरोग्य विभाग, कृषी विभाग, प्रधानमंत्री आवास योजना, कौशल्य विकास विभाग, जिल्हा अधीक्षक डाकघर (टपाल विभाग), जिल्हा पोलिस अधीक्षक, पशुसंवर्धन विभाग आदी विभागांचा समावेश होता.
यांना मिळाला लाभ
दोन मुलींनंतर कुटुंब नियोजनाची शस्त्रक्रिया करणाऱ्या प्रिया संदीप अढांगळे यांचा जिल्हा आरोग्य अधिकारी डॉ. सुशील वाकचौरे, तसेच प्राधिकरणाचे सचिव बुक्के यांच्या हस्ते सत्कार करण्यात आला. सावित्रीबाई फुले कल्याण योजनेंतर्गत प्रिया अढांगळे यांना, तसेच त्यांच्या मुलींना चार हजार रुपयांचा लाभ देण्यात आला. महापालिकेच्या वैद्यकीय विभागाच्या जननी सुरक्षा योजनेंतर्गत लता पगारे यांनाही योजनेचा प्रत्यक्ष लाभ देण्यात आला. जलसंपदा विभागातर्फे पालखेड पाटबंधारे विभागातील लाभ क्षेत्राचा दाखला दिंडोरी तालुक्यातील करंजवण येथील विकास देशमुख यांना देण्यात आला. यावेळी एक्झिक्युटिव्ह इंजिनीअर राघवेंद्र भाट उपस्थित होते. दिवसभरात हजारो नागरिकांनी या स्टॉल्सला भेटी देऊन योजनाची माहिती जाणून घेतली.
मोबाइल अॅप डाउनलोड करा आणि राहा अपडेट
