कॉलेजची धावपळ, अभ्यास व परीक्षेचा तणाव यामुळे आपण आरोग्याकडे दुर्लक्ष करतो. तसेच, जंक तसेच फास्ट फूड, कोल्ड्रिंक्स याच्या सेवनाचाही आपल्या आरोग्यावर परिणाम होतो. अशा प्रकारच्या जीवनशैलीमुळे महिलांचे आरोग्य बिघडत आहे. त्यामुळे हे सर्व टाळायला हवे, असा सल्ला बाल स्वास्थ्य कार्यक्रम वैद्यकीय अधिकारी डॉ. दीपाली देसले-सावंत यांनी दिला.
‘महाराष्ट्र टाइम्स’च्या ‘वाट स्वच्छ आरोग्याची’ या मोहिमेअंतर्गत गंगापूर रोडवरील जेआयटी इंजिनीअरिंग कॉलेजच्या सेमिनारमध्ये ‘महिलांचे आरोग्य’ या विषयावर सेमिनार आयोजित करण्यात आले. याप्रसंगी त्या बोलत होत्या. जेआयटी इंजिनीअरिंग कॉलेजच्या सेमिनार हॉलमध्ये हे सेमिनार पार पडले. डॉ. देसले यांनी म्हणाल्या की, महिलांच्या आरोग्याचा विचार करताना मासिक पाळी ही महत्त्वाची नैसर्गिक बाब आहे. मात्र, त्यावर खुलेपणाने बोलले जात नाही. आता यावर बोलण्याची वेळ आली आहे. मासिक पाळी आपण टाळू किंवा लपवू शकत नाही. जन्माला येणाऱ्या जीवासाठी गर्भाशयाची रचना असते. मासिक पाळीला वयाच्या चौदाव्या किंवा पंधराव्या वर्षी सुरुवात होते. मासिक पाळी दरम्यान शरीराला नको असलेला अशुद्ध घटक या काळात बाहेर पडतात. मात्र, या नैसर्गिक बाबीला अंधश्रद्धाही निगडीत आहेत. पाळीच्या काळात महिलेला विश्रांती मिळावी, हा हेतू पूर्वी होता. पण, अनेक अनिष्ट प्रथांनी अनेक संभ्रम निर्माण केले आहेत, असे त्या म्हणाल्या. प्राचार्य डॉ. एम. व्ही. भटकर यांनी डॉ. सावंत यांचे पुष्पगुच्छ व स्मृतिचिन्ह देऊन स्वागत केले. ‘मटा’ने याविषयी घेतलेल्या पुढाकाराचे कौतुक केले. सूत्रसंचलन नम्रता चव्हाण हिने केले. आभार प्रा. गीतांजली मोहोळे यांनी मानले. यावेळी प्रा. स्वाती थेटे, प्रा. चैताली बागूल, प्रा. मनीषा शेलार, प्रा. मुग्धा गोकर्ण, प्रा. विशाखा भदाणे, प्रा. भाग्यश्री पाटील, निकीता खैरनार उपस्थित होत्या.
जाहिराती चुकीच्या
गर्भाशयाची नीट वाढ न झाल्यामुळे सुरुवातीला मासिक पाळीत अनियमितता आढळते; मात्र, काही दिवसांत नियमित होते. यामुळे घाबरुन जाण्याच कारण नाही. परंतु, पाळी अनियमित राहिल्यास डॉक्टरांचा सल्ला घेणे आवश्यक आहे. शरीरातील हार्मोन्स पाळीवर नियंत्रण ठेवतात. मासिक पाळीदरम्यान आपण काहीही करू शकतो, अशा जाहिराती दाखविल्या जातात. त्या अतिशयोक्तीपूर्ण आहेत. या दिवसांत बाजारात मिळणारे केमिकलयुक्त पॅड न वापरता पर्यावरणपूरक पॅडचा वापर करा. वापरुन झाल्यावर त्याची योग्य विल्हेवाट लावा. गोळ्या घेऊन मासिक पाळी लांबविणे किंवा घडवून आणणे अनैसर्गिक आहे. त्याचा आरोग्यावर विपरीत परिणाम होतो, असे डॉ. देसले-सावंत यांनी स्पष्ट केले.
व्यायाम करा, फिट रहा
जॉब, फॅमिली, कॉलेज या धावपळीत ताण-तणाव वाढून आपल्या शरीरावर परिणाम होतो. यासाठी रोज व्यायाम करा, नीट आहार घ्या आणि टेन्शन फ्री रहा. रोज गायीच्या तुपाचे आणि दुधाचे सेवन करा. आठवड्यातून एकदा अभ्यंगस्नान करा. यामुळे अंगातील वात शमण्यास मदत होईल. त्याचबरोबर या विषयावर पालक आणि मुलांचा खुलेपणाने संवाद होणे आवश्यक आहे. तेव्हाच मासिक पाळीसंदर्भातील गैरसमज दूर होतील, असे त्यांनी सांगितले.
सेमिनारनंतर गराडा
सेमिनार संपल्यावर विद्यार्थिनींनी मासिक पाळी व आरोग्यासंदर्भातील अनेक प्रश्न डॉ. देसले-सावंत यांना विचारले. त्यांनीदेखील या सर्व प्रश्नांना सोप्या पद्धतीने उत्तर देऊन विद्यार्थिनींच्या मनातील गैरसमज दूर केले. सेमिनार संपल्यानंतर विद्यार्थिनींनी डॉ. देसले-सावंत यांना अक्षरशः गराडाच घातला आणि शंकांचे निरसन करून घेतले. सेमिनार संपल्यानंतरही तब्बल तासभर हॉलच्या बाहेर हा संवाद सुरू होता.
सेमिनारच्या माध्यमातून आम्हाला अनेक गोष्टी माहीत झाल्या. याविषयी प्रथमतःच एवढ्या खुलेपणाने बोलले गेले. ही नक्कीच चांगली गोष्ट आहे.
- दीप्ती शिंदे, विद्यार्थिनी
सेमिनार खूपच चांगले झाले. आम्हीदेखील घरी कधी या विषयावर बोललो नव्हतो. मात्र, आम्हाला आज याचे महत्त्व कळले. त्याचबरोबर आमच्या शंकांचे निरसनही झाले.
- रुक्सार सय्यद, विद्यार्थिनी
महिलांच्या आरोग्यावरचे सेमिनार मी पहिल्यांदाच ऐकले. यातून आमच्या मनात असलेले गैरसमज दूर झाले. याबाबत घ्यावयाची काळजी, आहार, विहार याची देखील माहिती मिळाली.
- प्रियंका मुरकुटे, विद्यार्थिनी
सेमिनार अतिशय अप्रतिम झाले. ज्या विषयावर कोणी बोलत नाही. त्या विषयाला ‘मटा’ने हात घातला. काही विद्यार्थिनींना प्रश्न विचारायला संकोच वाटला. सेमिनार संपल्यावर मात्र त्यांनी त्यांचे प्रश्न विचारले. डॉ. देसले-सावंत यांनी अतिशय सोप्या भाषेत मार्गदर्शन केले. ‘मटा’च्या या उपक्रमाने मोठी जागरूकता घडेल.
- प्रा. स्वाती थेटे, विभाग प्रमुख, इलेक्ट्रिकल
मोबाइल अॅप डाउनलोड करा आणि राहा अपडेट
