मराठा विद्या प्रसारक समाजाच्या वतीने आयोजित पाचव्या राष्ट्रीय व दहाव्या राज्यस्तरीय मविप्र मॅरेथॉनमध्ये हरियाणाच्या करणसिंग याने ४२.१९५ किलोमीटर गटात प्रथम क्रमांक मिळविला. त्याला आंतरराष्ट्रीय रोइंगपटू दत्तू भोकनळ याच्या हस्ते एक लाख रुपये व स्मृतिचिन्ह देऊन गौरविण्यात आले.
मराठा विद्या प्रसारक समाजाच्या वतीने आयोजित करण्यात आलेल्या पाचव्या राष्ट्रीय व दहाव्या राज्यस्तरीय मविप्र मॅरेथॉन स्पर्धेचे उद्घाटन आंतरराष्ट्रीय रोईंगपटू ऑलिम्पिक विजेता दत्तू भोकनळ याच्या हस्ते ध्वज फडकावून करण्यात आले. त्यानंतर विविध गटांना क्रमवारीने मॅरेथॉनसाठी सोडण्यात आले. यावेळी ४ हजार ५२६ खेळाडू विविध गटांत सहभागी झाले होते. हवेत रंगीबेरंगी फुगे सोडून ढोल ताशांच्या गजरात व फटाक्यांच्या आतषबाजीत स्पर्धेचे शानदार उद्घाटन झाले.
या स्पर्धेसाठी उत्तरप्रदेश, बिहार, राजस्थान, मध्यप्रदेश, झारखंड, छत्तीसगड, हरियाणा, दिल्ली, तमिळनाडू, कर्नाटक तसेच राज्यातील मुंबई, पुणे, ठाणे, कोल्हापूर, अहमदनगर, नागपूर, सांगली, कराड, सोलापूर, सातारा, चंद्रपूर, रत्नागिरी, अमरावती, सिंधुदूर्ग, औरंगाबाद, धुळे व नाशिक जिल्ह्यातून विविध गटांतील खेळाडू सहभागी झाले.
रावसाहेब थोरात सभागृहात बक्षीस वितरण समारंभ पार पडला. यावेळी व्यासपीठावर संस्थेच्या सरचिटणीस व मविप्र मॅरेथॉनच्या संयोजन समितीच्या अध्यक्षा श्रीमती नीलिमाताई पवार, संस्थेचे अध्यक्ष डॉ. तुषार शेवाळे, संचालक डॉ. विश्राम निकम, नाना महाले, उत्तमबाबा भालेराव, भाऊसाहेब खातळे, दिलीप पाटील, सचिन पिंगळे, अशोक पवार, डॉ. जयंत पवार, दत्तात्रय पाटील, प्रल्हाद गडाख, डॉ प्रशांत देवरे, सेवक संचालक नानासाहेब दाते, गुलाब भामरे, महिंद्रा कंपनीचे अधिकारी कर्नल सी. एन. बॅनर्जी, शिक्षणाधिकारी, क्रीडाधिकारी प्रा. हेमंत पाटील व क्रीडाशिक्षक उपस्थित होते.
नाशिकमध्ये खेळाचे वातावरण चांगले
दत्तू भोकनळ याने यावेळी आपला जीवनप्रवास उलगडला. नाशिकमध्ये अत्यंत चांगले खेळाचे वातावरण तयार होत असून, त्यामध्ये मविप्र संस्थेचा मोठा हातभार आहे. कोणत्याही खेळात यशस्वी होण्यासाठी स्वतःला आपल्या क्षमतांच्या पलीकडे जाऊन मेहनत करण्याची तयारी ठेवावी, असेही तो यावेळी म्हणाला. खडतर परिस्थितीत स्वतःला खंबीर ठेऊन आपण निश्चित केलेल्या ध्येयाचा पाठलाग करा. त्यासाठी योग्य दिशा ठरवून नियमित सराव व आत्मविश्वासाने यश संपादन करा, असा सल्ला त्याने उपस्थितांना दिला.
ज्येष्ठांची एनर्जी
या मॅरेथॉनमध्ये ६० वर्षांवरील ज्येष्ठांनीही भाग घेतला होता. तरुणांना लाजवेल अशा पद्धतीने ज्येष्ठ धावत असताना नाशिककर त्यांना टाळ्या वाजवून चिअर अप करीत होते. काही ज्येष्ठ तर काठी हाती घेऊन सहभागी झाले होते.
आंतरराष्ट्रीय मॅरेथॉन व्हावी
गेल्या दहा वर्षांपासून राज्यस्तरावर व गेल्या पाच वर्षांपासून राष्ट्रीय स्तरावर सुरू असलेली मॅरेथॉन पुढील वर्षापासून आंतरराष्ट्रीय पातळीवर व्हावी, अशी मागणी क्रीडापटू करीत होते. ही स्पर्धा आंतरराष्ट्रीय स्तरावर झाल्यास नाशिककर खेळाडूंना जागतिक स्तरावरील खेळाडू पहाण्याची संधी उपलब्ध होणार आहे.
वाहतुकीचे नियोजन कोलमडले
स्पर्धा मार्गावर धावपटूंना पळण्यासाठी अनंत अडचणींना तोड द्यावे लागत होते. गंगापूररोडवर धावपटू पडून जखमी होताना दिसत होते. पोलिसांनी रहदारीची अडचण लक्षात घेऊन वाहतुकीचे नियोजन केले नसल्याने वाहनधारक धावपटूंबरोबर गाड्या चालवत होते. रहदारीचा त्रासही खेळाडूंना सहन करावा लागत होता. अनेक ठिकाणी खेळाडू अपघात होता होता वाचले.
सात लाखांची पारितोषिके
यावेळी १७ वेगवेगळ्या गटांत विजेत्या खेळाडूंना एकूण ७ लाख २३ हजार रुपये इतक्या रकमेची रोख पारितोषिके मान्यवरांच्या हस्ते देण्यात आली. संस्थेच्या सरचिटणीस श्रीमती नीलिमाताई पवार यांनी स्पर्धेच्या यशस्वी आयोजनाबद्दल आयोजन समितीचे कौतुक करताना संस्थेचे क्रीडा संचालक, पंच, एन. सी. सी. स्वयंसेवक, एन. एस. एस. असे एकूण १५०० पेक्षा जास्त स्वयंसेवक कार्यरत असल्याची माहिती दिली. मॅरेथॉन स्पर्धा अधिक तांत्रिक व शास्त्रशुद्ध पद्धतीने होत आहेत व नावाजलेल्या खेळाडूंचा सहभाग दिवसेंदिवस वाढत आहे, ही संस्थेसाठी भूषणावह बाब असल्याचे त्यांनी यावेळी सांगितले. अध्यक्ष डॉ. तुषार शेवाळे यांनी अध्यक्षीय मनोगतात मविप्र मॅरेथॉन ही राज्य पातळीवरून राष्ट्रीय पातळीवर यशस्वी होत असून, पुढे आंतरराष्ट्रीय पातळीपर्यंत ती पोहचेल असा विश्वास व्यक्त करताना दत्तू भोकनळ याच्यासारखी खडतर परिस्थितीतून यशाला गवसणी घाला, असे आवाहन केले. आभार उपसभापती राघो आहिरे यांनी मानले.
निकाल
४२ किलोमीटर - फुल मॅरेथॉन
प्रथम- करणसिंग, हरियाणा
द्वितीय- किशोर गव्हाणे, महाराष्ट्र
तृतीय- अभिमन्यू कुमार, महाराष्ट्र
२१ किलोमीटर - हाफ मॅरेथॉन
प्रथम- कांतिलाल कुंभार, नाशिक
द्वितीय- पिंटू यादव, नाशिक
तृतीय- सुरेश वाघ, नाशिक
महिला ओपन- १० किलोमीटर
प्रथम- आरती पाटील, नाशिक
द्वितीय- रिशुसिंग, नाशिक
तृतीय- अर्चना कोहकडे, संगमनेर
सीनिअर कॉलेज मुले-१२ किलोमीटर
प्रथम- दिनकर लिलके, नाशिक
द्वितीय- भागीनाथ गायकवाड, नाशिक
तृतीय- नितीन गावित, नाशिक
४५ वर्षांवरील पुरूष
प्रथम- लक्ष्मण शिंदे, परभणी
द्वितीय- भिकू खैरनार, मालेगाव
तृतीय- नंदू उगले, नाशिक
ज्युनिअर कॉलेज मुले - १० किलोमीटर
प्रथम- पवन तारपे, नाशिक
द्वितीय- नीरज यादव, नाशिक
तृतीय- खुरकुटे कृष्णा
मुले - ८वी ते १०वी
प्रथम - मनोहर बेंडकुळे, नाशिक
द्वितीय - रमेश पिंपळके, नाशिक
तृतीय - ओम जाधव, नाशिक
ज्युनिअर कॉलेज मुली - ५ किलोमीटर
प्रथम- आशा पारधी, नाशिक
द्वितीय- नंदा पालवी, नाशिक
तृतीय-दिशा बोरसे, नाशिक
५ वी ते ७ वी मुले - ४ किलोमीटर
प्रथम- अभिजीत सांडखोरे, नाशिक
द्वितीय- इंद्रभान ढोपारे, पाटोदा
तृतीय- पवन पालवे, नाशिक
५ वी ते ७ वी मुली - ३ किलोमीटर
प्रथम- पूनम डांबले, नाशिक
द्वितीय- स्वाती शिंदे, पाटोदा
तृतीय- रोशनी काकरवाल, जातेगाव
सीनिअर कॉलेज मुली- ६ किलोमीटर
प्रथम- शीतल भगत, नाशिक
द्वितीय- पुष्पा राडे, त्र्यंबकेश्वर
तृतीय- प्रियंका ठाकरे, नाशिक
पुरुष ६० वर्षांवरील- ४ किलोमीटर
प्रथम- दिनकर शेळके, औरंगाबाद
द्वितीय- सूर्यकांत भोसले, नाशिक
तृतीय- काशिनाथ पलांडे, नाशिक
३५ वर्षांवरील महिला- ५ किलोमीटर
प्रथम- अश्विनी देवरे, नाशिक
द्वितीय- सुमन हटकर, नाशिक
तृतीय- मीरा गायकवाड, औरंगाबाद
१८ वर्षांखालील मुले- खुला गट - ६ किलोमीटर
प्रथम- महेश पाखने
द्वितीय- रवींद्र गवळी
तृतीय- पवन शिंदे
१८ वर्षांखालील मुली- खुला गट - ६ किलोमीटर
प्रथम- वर्षा चौधरी
द्वितीय- सुशिला चौधरी
तृतीय- वनीता भोबे
पुरुष ७५ वर्षांवरील- ३ किलोमीटर
प्रथम- गेणू गायधनी, नाशिक
द्वितीय- शांतिलाल गिरासे, नाशिक
तृतीय- हरिभाऊ ढोली, नाशिक
मुली ८ वी ते १० वी- ४ किलोमीटर
प्रथम- मोनिका जाधव
द्वितीय- पूजा पारधी
तृतीय- वृषाली निंबेकर
मोबाइल अॅप डाउनलोड करा आणि राहा अपडेट
