महाराष्ट्र सुवर्ण जयंती नगरोत्थान महाअभियानांतर्गत शहरातील नवीन बसस्थानक परिसरात उभारण्यात येत असलेल्या उड्डाणपुलाच्या कामासंदर्भात महापालिकेत महत्त्वाची बैठक झाली. आमदार आसिफ शेख यांच्या प्रमुख उपस्थितीत मनपा आयुक्त संगिता धायगुडे यांनी ही बैठक घेतली. वाढती वाहतूक कोंडी टाळण्यासाठी उड्डाणपुलाचे काम युद्धपातळीवर सुरू करण्याच्या सूचना शेख व धायगुडे यांनी अधिकाऱ्यांना दिल्या.
शहरातील नवीन बसस्थानक परिसरात नेहमीच वाहतूक कोंडी होत असते. राज्य परिवहन महामंडळाच्या बसेससह खासगी वाहतूक, मालवाहतूक याच मार्गावरुन जातात. त्यामुळे या भागातील वाहतूक कोंडीचा प्रश्न कायमस्वरुपी निकाली निघावा यासाठी २१ कोटी रुपये खर्चाच्या उड्डाणपुलाच्या कामास शासनाने मान्यता दिली आहे. या उड्डाणपुलाचे ई-भूमिपूजन मुख्यमंत्री देवेंद्र फडणवीस यांच्या हस्ते झाले. पुलाचे काम युद्धपातळीवर सुरू करण्याचे आदेश मनपा आयुक्त धायगुडे यांनी दिले.
उड्डाणपुलाच्या कामात अडथळे येऊ नये यासाठी या मार्गावरील वाहतूक वळविण्यात येणार असून सर्व्हिस रोडच्या कामाआधी उड्डाणपुलाचे काम पूर्ण करण्याचा निर्णय या बैठकीत घेण्यात आला. त्यामुळे पावसाळ्यापूर्वी या पुलाबाबतच्या महत्त्वाच्या कामांना तडीस नेले जाणार आहे.
या कामांमध्ये अडथळा येऊ नये, वाहतूक कोंडी होऊ नये यासाठी जुना आग्रा रोडवरील वाहतूक वळविण्यात येणार आहे. नवीन बस स्थानकात येणाऱ्या बसेस जुन्या बस स्थानकात थांबणार आहेत. याबाबतच्या सूचना राज्य परिवहन महामंडळाच्या अधिकाऱ्यांना देण्यात आल्या आहेत. सर्व्हिस रोड, उड्डाणुपूल व व‌िजेच्या कामासाठी स्वतंत्र अधिकारी व कर्मचाऱ्यांची टीम तयार करण्याच्या सूचना आमदार आसिफ शेख यांनी दिल्या.
वीजतारा होणार भूमिगत
या मार्गावरील वीजतारा भूमिगत करण्याचे काम तातडीने पूर्ण करण्याबाबतही चर्चा झाली. याबाबतचा प्रस्ताव अधीक्षक अभियंता कार्यालयाकडे मंजुरीसाठी पाठविल्याची माहिती वीजवितरणच्या अधिकाऱ्यांनी
दिली. या बैठकिस राज्य परिवहन महामंहळ, वीज वितरण कंपनी, नगररचना विभागाचे अधिकारी, पालिकेतील
अधिकारी तसेच शहरातील ट्रक चालक-मालक संघटनेचे पदाधिकारी उपस्थित होते.
मुख्य पुलाची लांबी
३०२.५० मी
सलग्न रोड
२१२ मी .
एकूण उड्डाणपूल लांबी
५१४.५० मी
पुलाची रुंदी
१२ मी
एकूण मंजूर प्रस्तावित रक्कम
२१.७२ कोटी रु.
मोबाइल अॅप डाउनलोड करा आणि राहा अपडेट
