सटाणा नगर परिषदेच्या विद्यमान नगराध्यक्ष व नगरसेवकांची वर्षपूर्ती ही शहराच्या विकासपर्वाच्या विकासाची पायाभरणी करणारी ठरली आहे. सटाणा शहराचा पाणीप्रश्न कायमस्वरूपी सोडविण्यासाठी सुमारे ५५ कोटी रुपयांची पुनद पाणीपुरवठा योजनेची नांदी, शहरातील वाहतुकीची समस्या सोडविण्यासाठी २ कोटी रुपये खर्चाची रिंगरोडची होत असलेली निर्मिती व सोबत जॉगिंग ट्रॅकचे भूमिपूजन या कामांतून विकासाची आस दाखविणाऱ्या नगराध्यक्ष सुनील मोरे यांना मोठ्या अग्निदिव्यातून जावे लागणार आहे.
सटाणा नगर परिषदेचे तिसरे थेट लोकनियुक्त नगराध्यक्ष सुनील मोरे यांच्या कार्यकाळास २६ डिसेंबर रोजी एक वर्ष पूर्ण होत आहे. सटाणा शहर विकास आघाडीच्या माध्यमातून शहरविकासाची स्वप्नांची मालिका दाखवून राष्ट्रवादी, काँग्रेस व भाजपाच्या शिलेदारांना पराभूत करून शहराच्या प्रथम नागरिकपदावर विराजमान होणाऱ्या सुनील मोरे यांनी ‘सत्तेशिवाय शहाणपण नाही’ या उक्त‌िनुसार भारतीय जनता पक्षाशी सलगी केली असली, तरीही एक वर्षात विकास बाळसे धरू शकला नाही. वर्षपूर्तीनंतर शहरात विकासकामांची रेलचेल की नुसताच भुलभुलैया असेल, याबाबतचे चित्र लवकचर स्पष्ट होणार आहे.
गत दहा वर्ष राष्ट्रवादी काँग्रेसच्या जोखडात विकासापासून वंचित असलेल्या सटाणावासियांनी सटाणा शहर विकास आघाडीच्या मनमोहक स्वप्नांना व घोषणांना डोक्यावर घेतले. थेट नगराध्यक्ष पदासह सटाणा शहर विकास आघाडीच्या ५ सदस्यांना विजयी केले. राज्यात भाजपाचे सरकार असल्याने शहर विकास आघाडीने आपल्या स्वप्नपूर्तीसाठी भाजपाच्या पाच नगरसेवकांना सोबत घेऊन पालिकेतील सत्तेचे समीकरण जुळविले आहे. उपनगराध्यक्ष, सभापती अशी सत्तेची ऊब देवून मतदार संघातील केंद्रीय राज्यमंत्री डॉ. सुभाष भामरे यांच्या सहकार्याने स्वप्नपूर्तीसाठी वाटचाल सुरू केली आहे.
सटाणावासीयांच्या दृष्टीने अत्यंत महत्त्वपूर्ण व संवदेनशील असलेला पिण्याच्या पाण्याचा प्रश्न, शहरातून जाणाऱ्या राज्य महामार्गाला पर्याय ठरणाऱ्या बायपास व रिंगरोडचा प्रश्न, देवमामलेदार यशवंतराव महाराज स्मारक, बालगोपाळ व वृद्धांसाठी असलेले बालोद्यान, पार्क, ग्रीन जिम आदी प्रश्न आ वासून होतेच. तब्बल दहा वर्ष राष्ट्रवादी काँग्रेसकडे राज्यात व पालिकेत सत्ता असतानादेखील तत्कालीन आमदार संजय चव्हाणांसह अनुयायांना उपरोक्त प्रश्न सोडविण्यात अपयश आले होते. या पार्श्वभूमीवर सटाणा नगरपालिकेत गत वर्षभरापूर्वी जनतेने सत्तांतर घडवून आणले. राष्ट्रवादी काँग्रेस पक्षाच्या कार्यकाळात पालिकेतील पदांच्या संगीतखुर्चीमुळे शहरातील प्रश्नांकडे दुर्लक्ष होत गेले, ते आजही कायम आहेच. विद्यमान नगराध्यक्ष सुनील मोरे यांनी आपल्या नव्या दमाच्या खेळांडूचा पदग्रहण समारंभ २६ डिसेंबर २०१६ रोजी आम जनतेत अत्यंत रुबाबदारपणे केला. यामुळे साहजिकच जनतेच्या अपेक्षा अधिक उंचावल्या.
प्रारंभी स्वच्छ व सुंदर सटाणा संकल्पना राबविण्याचा मानस ठेवत त्यांनी शहरातील सर्वच मोकळे भूखंड, पटांगणे, खासगी मालमत्ताधारकांच्या मोकळ्या भूखंडांवरील गाजरगवताचे निर्मूलन केले. परिणामी ही मैदाने व खुल्या जागा मोकळा श्वास घेऊ लागली. परिणामी, डासांचे निर्मूलन झाले. तणनाशकांची फवारणी करून त्रास वाढू नये याची व्यवस्थादेखील केली. मात्र, पावसाळ्यात पुन्हा गवत वाढले आणि स्थिती जैसे थे झाली.
शहरात सर्वत्र स्वच्छ व सुंदर सटाणा निर्मितीसाठी व जनतेच्या आरोग्यासाठी शहरातील नऊ हजार शौचालयांना डास प्रतिबंधक जाळी बसविण्याचा उपक्रम राबविला. शहरातील मोकळ्या भिंतींवर विविध आकर्षक रचना व सुविचार, काव्यमय पंक्तींद्वारे जनतेला स्वच्छतेकडे प्रवृत्त करण्याचा धाडसी निर्णय घेतला. मात्र, शहराचा वाढता विस्तार व वाढती लोकसंख्या तसेच अपुऱ्या आरोग्य कर्मचाऱ्यांमुळे स्वच्छ व सुंदर सटाणा शहराचे संकल्पित चित्र कागदावरच राहिल्याचे वास्तव शहरात फेरफटका मारल्यावर दिसून येते.
सटाणा शहराचा पिण्याच्या पाण्याचा प्रश्न सोडविण्यासाठी विद्यमान नगराध्यक्ष सुनील मोरे यांनी केंद्रीय राज्यमंत्री डॉ. सुभाष भामरे यांच्या माध्यमातून गती दिली, ही निश्चितपणे वर्षभरातील जमेची बाजू आहे. सटाणा शहराला पुनद धरणातून पिण्याच्या पाण्याचे आरक्षण मंजूर करून घेतानाच पुनद धरणातून थेट पाणीपुरवठा करण्यासाठी पाइपलाइनकरिता ५५ कोटी रुपयांचा निधीदेखील मंजूर केला आहे. सदर मंजुरी अंतिम टप्प्यात आहे. यामुळे ही मोठी ऐतिहासिक कामगिरी करून जनतेच्या जिव्हाळ्याच्या प्रश्नावर मोरे यांनी यश संपादन केले आहे.
निवडणूक कार्यकाळातील आश्वासनपूर्तीच्या दिशेने मोरे यांनी दुसरे पाऊल टाकले आहे. शहरातील मध्यवर्ती असलेल्या पाठक मैदानावर नाना-नानी पार्क, तसेच भाक्षी रोड ते नामपूर रोडला जोडणाऱ्या रिंगरोडचा भूमिपूजन समारंभ आटोपून प्रत्यक्ष कामांना चालना देण्यात आली आहे. दोन कोटी रुपयांच्या या विकासकामांना प्रत्यक्षात नववर्षात प्रारंभ होत आहे. वर्षपूर्तीपूर्वी विद्यमान शहर विकास आघाडी व भाजपच्या संयुक्त टीमने शहरवासीयांच्या गुलाबी स्वप्नांना प्रत्यक्षात साकार करण्यासाठी लाल गालीचे टाकण्यास प्रारंभ केला आहे.
सटाणा नगरपरिषद हद्दीतील दोधेश्वर नाक्यानजीक असलेल्या प्राथमिक, माध्यमिक व उच्च माध्यमिक शाळा-महाविद्यालयांत जाणाऱ्या विद्यार्थी व विद्यार्थिनींसाठी स्कॉयवॉक व्हावा, यासाठी राज्य व केंद्र शासनाकडे पाठपुरावा सुरू केला आहे. तब्बल एक कोटी रुपयांच्या प्रशासकीय मान्यतेच्या अंतिम टप्प्यात असलेल्या या कामासाठीदेखील मंजुरी मिळणार आहे. शहरातील देवमामलेदार यशवंतराव महाराज रथ मार्गावरील विद्युत वाहिनी भूमिगत करण्यासाठी गेल्या अनेक वर्षांपासूनची मागणी होती. यासाठी गतकाळात शासनाने निधीदेखील मंजूर केला होता. मात्र, तत्कालीन सत्ताधारी वर्गाने सदरचा निधी अन्यत्र वापरून गोंधळ केला होता. मात्र, विद्यमान नगराध्यक्ष मोरे यांनी पुनश्च शासनाकडून ८८ लाख रुपये या कामासाठी मंजूर करून घेत विद्युत तारा भूमिगत करण्यासाठी चालना दिली आहे.
नववसाहतींमधील परिस्थिती ‘जैसे थे’
सटाणा शहराचा चेहरामोहरा बदलण्याचे आश्वासन देणाऱ्या विद्यमान नगराध्यक्षांनी सटाणा नगरपरिषदेला कररूपाने सर्वाधिक उत्पन्न देणाऱ्या नववसाहत परिसरांना अच्छे दिन अद्यापही दाखविलेले नाहीत. किंबहुना या वर्षभरात एकही नव्याने रस्ता, गटारी, करण्यात न आल्याने नववसाहतीमध्ये आजही रहिवाशांना खड्डयातून आपला मार्ग काढीत जावे लागत आहे. या परिसरात गटारी, नाले नसल्याने शौचखड्डयांचे पाणी इतरत्र पसरून घाणीचे साम्राज्य निर्माण होत आहे. परिणामी नववसाहत परिसरात आरोग्याच्या तक्रारी मोठ्या प्रमाणात निर्माण होत आहेत. प्रचंड घरपट्टी आकारूनदेखील शहरातील जनतेला सोयी-सुविधा उपलब्ध नसल्याने नववसाहत परिसरात नाराजी व्यक्त केली जात आहे.
एक दिवसाआड पाणी पुरवठा
सटाणा पालिकेच्या वतीने शहरात सुमारे पाच जलकुंभ आहेत. शहरातील चार उद्भवविहिरी आहेत. एक दिवसाआड बारमाही पाणीपुरवठा करण्यात येतो. गिरणा नदीपात्र दुथडी भरून वाहत असतानादेखील शहरवासीयांना दरडोई प्रतिमाणसी १५० लिटर पाणीपुरवठा करण्यास पालिका प्रशासन सक्षम नसल्याने शहरवासियांना एक दिवसाआड पाणी पुरवठा होत असतो. त्यातही गिरणा नदीपात्रातील जॅकवेल व अथवा मोटार नादुरूस्त झाल्यास शहराचा पाणीपुरवठा ठप्प होतो. पर्यायाने दुसरी मोटारदेखील कोणत्याही प्रशासनाला उपलब्ध करता आलेली नाही, हे प्रशासनाचे अपयश आहे.
स्वच्छतेची ऐसीतैसी
सटाणा शहराचा वाढता विस्तार आणि वाढती लोकसंख्या लक्षात घेता पालिकेतील आरोग्य कर्मचारी मर्यादीत आहेत. परिणामी शहरातील स्वच्छता हा विषय डोकेदुखीचा ठरला आहे. खासगी ठेकेदारी पद्धतीवर दिलेली स्वच्छता मोहीमदेखील चर्चेचा विषय आहे. पालिकेतील बहुतांश कर्मचारी स्वच्छता विभागाकडे असताना नात्यागोत्यांमुळे विविध विभागांवर कामे करीत असल्याची चर्चा आहे. परिणामी ‘स्वच्छ, सुंदर सटाणा’ संकल्पनेला गालबोट लागले आहे. गटारीदेखील तुंडुंब भरून वाहत असताना त्या उकरण्यास विलंब होत असतो.
अतिक्रमण विभाग सक्रिय नाही
सटाणा शहरातून जाणारा विंचूर-शहादा-प्रकाशा राज्यमहामार्ग अत्यंत संवेदनशील झाला आहे. या राज्य महामार्गाच्या दुतर्फा शासकीय, निमशासकीय कार्यालये, बँका, पंतसंस्था, पेट्रोल पंप, शाळा, विद्यालये, खासगी व व्यापारी प्रतिष्ठाणे आहेत. राज्य महामार्गावरील अतिक्रमण, फेरीवाले, दुचाकी वाहने काढण्यासाठी पालिकेची स्वतंत्र यंत्रणा नसल्याने याठिकाणी दररोज लहान-मोठ्या स्वरुपाचे अपघात होत असतात. यामुळे पालिका प्रशासनाने याकडे अधिक लक्ष देण्याची अपेक्षा सर्वसामान्य जनतेकडून व्यक्त होत आहे.
वर्षभरातील ठळक वाटचाल
- पालिकेच्या इतिहासात प्रथमच सिटी डेव्हलपमेंट प्लान व डीपीआर प्रकल्प खासगी कंपनीकडून तयार
- ११ वर्षांपासून पालिकेच्या सेवानिवृत्त कर्मचाऱ्यांची थकीत रक्कम १ कोटी १५ लाख रुपयांचे वितरण
- पालिकेच्या इतिहासात पहिल्यांदा ९३.८४ टक्के वसुली
- शहरातील बंद स्थितीतील ४.५ किमी लांबीच्या गटारी वाहत्या केल्या
- तिमाही फवारणी मोहीम शहरात सुरू
- पालिकेचा हेल्पलाइन नंबर सुरू
- पंतप्रधान आवास योजनेत शहराचा समावेश
- महिला व बालकल्याण विभागाअंतर्गत १२० महिलांना स्वयंरोजगाराचे प्रशिक्षण
- पालिकेच्या वतीने पहिल्यांदा आदर्श शिक्षक पुरस्कार वितरण सुरू
- जागतिक महिला दिनानिमित्त महिला मेळावा व आरोग्य शिबिराचे आयोजन
नगराध्यक्ष म्हणतात...
शब्दपूर्ती हेच ध्येय
पालिका निवडणुकीत शहर विकास आघाडीने दिलेल्या प्रत्येक शब्दाची पूर्ती करण्यासाठी झटत आहोत. प्रत्येक आश्वासनाची पूर्ती करणे हेच अंतिम ध्येय आहे. केंद्रीय संरक्षण राज्यमंत्री डॉ. सुभाष भामरे यांच्या मदतीने व सहकार्याने केंद्र व राज्य शासनाच्या माध्यमातून पुढील चार वर्ष ही सटाणा शहरात विकासाची गंगोत्री आणणारी असतील. पालिका सभागृहात कोणताही गट-तट नाही. केवळ शहरविकास हाच ध्यास घेऊन सर्वच नगरसेवक कामकाज करून सहकार्य करीत आहेत, ही समाधानाची बाब असल्यानेच वर्षभरात आपण महत्त्वपूर्ण विकासकांमाचे ठराव करून घेतले आहेत. आता या कामांची अंमलबजावणी करून प्रत्यक्षात विकास करणे हा उद्देश आहे. यामुळेच पालिकेच्या इतिहासात प्रथमच आपण ६५ कोटी रुपयांचा अर्थसंकल्प सादर करून विकासाची चाहुल या अर्थसंकल्पातून प्रतिबिंब‌ित केली आहे.
- सुनील मोरे, नगराध्यक्ष
अधिकारी म्हणतात...
वर्षभरातील पालिका प्रशासनाचे कामकाज अत्यंत सुखद व समाधानकारक आहे. पक्षीय पातळीवर झालेल्या निवडणुका विसरून सर्वच नगरसेवक आपापल्या प्रभागासोबतच शहराचा विकास करण्यासाठी प्रयत्न करीत आहेत. शासनाच्या विविध योजना व नवनवीन उपक्रम राबविण्यासाठी पदाधिकाऱ्यांचा कल असला तरीही प्रशासकीय पातळीवर सातत्याने करावा लागणारा पाठपुरावा, शासनाचे निकष व तांत्रिक अडीअडचणींमुळे विलंब होतो. मात्र, तरीही शहरातील जनतेचे प्रश्न सोडविण्यासाठी प्रशासन व लोकप्रतिनिधी एकत्रित कामकाज करीत असल्याचा अनुभव निश्चितपणे आशादायक आहे. शासनाचे प्रतिनिधी म्हणूनदेखील आपण अत्यंत काळजीपूर्वक व सूक्ष्मपणे पालिका प्रशासनाच्या कारभाराकडे लक्ष ठेवून आहोत.
- हेमलता डगळे, मुख्याधिकारी
विरोधक म्हणतात...
‘शायनिंग सटाणा’चे फुगे
गत वर्षभरापासून केवळ विकासाच्या गप्पा मारणाऱ्या शहरविकास आघाडीने एक वर्षात शहरातील जनतेची फसवणूक केलेली आहे. कोणताही विकास झालेला नाही की ठोस कामे झालेली नाहीत. केवळ वल्गना करून शायनिंग इंडियाच्या धर्तीवर सटाणा शायनिंगचे फुगे उडविण्यात येत आहेत. नाना-नानी पार्क, रिगरोंडचे भूमिपूजन होऊन तीन महिने लोटूनही साधी वीटही रचण्यात आली नाही.
- काकाजी सोनवणे, गटनेते, राष्ट्रवादी काँग्रेस
विरोधक म्हणतात...
काम दाखवा...
विद्यमान प्रशासनाचे शहरात एक रुपयाच्या विकासाचेही काम नाही. काम दाखवा आणि बक्षीस मिळवा हे आपले जाहीर आवाहन असून, गत कार्यकाळातील कामेच यावर्षीदेखील होत आहेत. शहरविकासासाठी सभागृहात आपण एका विचाराने असलो, तरी मनात प्रचंड खंत असून आगामी बैठकीत यावर आपण निश्चितपणे खडे बोल सुनावणार आहोत.
- दिनकर सोनवणे, गटनेते, काँग्रेस
(संकलन- कैलास येवला)
मोबाइल अॅप डाउनलोड करा आणि राहा अपडेट
