म. टा. प्रतिनिधी, नाशिक
उत्तर प्रदेशातील बांदा जिल्ह्यातून चोरी करून मुंबईकडे जाणारा शस्त्रसाठा नेमका किती होता, याची जुळवाजुळव करण्यात पोलिसांना यश मिळालेले नाही. पोलिसांनी चुप्पी साधल्याने या प्रकरणाचे गूढ वाढले असून, मुंबईकडे जाणाऱ्या शस्त्रसाठ्याचे नक्की काय होणार होते हे समोर येऊ शकलेले नाही.
नाशिक ग्रामीण पोलिस दलाने जप्त केलेला आणि प्रत्यक्षात उत्तर प्रदेशातून चोरीस गेलेल्या शस्त्रसाठ्यात तफावत आढळून येते. वाहनचालक नागेश राजेंद्र बनसोडे (वय २३), तसेच सलमान अमानुल्ला खान (१९, रा. शिवडी, मुंबई) बद्रीनुजमान अकबर बादशाह उर्फ सुमित (२७, रा. शिवडी, मुंबई) या तिघांनी मिळून बांदा जिल्ह्यातील सर्वांत मोठे समजले जाणारे पंजाब आर्म्स सेंटर या दुकानावर दरोडा घालून मोठ्या प्रमाणावर शस्त्रास्त्र लंपास केले. उत्तर प्रदेशमध्ये नुकत्याच स्थानिक स्वराज्य संस्थांच्या निवडणुका झाल्या आहेत. निवडणूक काळात लायसन्स असलेली शस्त्रे जमा करण्याचे आदेश पोलिसांनी दिले होते. महाराष्ट्रात अशा प्रकारे आदेश निघाल्यास परवानाधारक शस्त्रे जवळच्या पोलिस स्टेशनमध्ये जमा केली जातात. उत्तर प्रदेशमध्ये मात्र परवानाधारक शस्त्रे बंदुकीची विक्री करणाऱ्या दुकानातच ठेवली जातात. दुकानदार शस्त्रे जमा करणाऱ्या व्यक्तींची, तसेच शस्रास्रांची नोंद करून घेतो. नुकत्याच झालेल्या निवडणुकीदरम्यान या दुकानात २०० रायफल, रिव्हॉल्व्हर, तसेच सहा हजारांहून अधिक काडतुसे जमा करण्यात आली होती. याशिवाय दुकानात विक्रीस ठेवण्यात आलेला शस्त्रसाठादेखील होता. या दुकानातील काही अनियमित कामांमुळे हिशेबाचा गोंधळ उडतो आहे. संशयित आरोपींनी रेकी करीत बुधवारी रात्रीच्या सुमारास दुकानाच्या चौकीदारास बंधक बनवून शस्त्रास्त्रे लुटली. नाशिकमध्ये गुरुवारी सायंकाळी हा शस्त्रसाठा पकडला त्या वेळी फक्त ४१ शस्त्रे आणि ४,१४३ जिवंत काडतुसे जप्त करण्यात आली. शस्त्रांच्या संख्येत मोठी तफावत असून, हाच पोलिसांसाठी कळीचा मुद्दा ठरतो आहे. उर्वरित शस्त्रे कोठे गेली, याचा शोध लागणे आवश्यक असल्याचे सूत्रांनी सांगितले. ग्रामीण पोलिस दलाच्या आडगाव येथील कार्यालयात रविवारीदेखील वरिष्ठ पोलिस अधिकारी तळ ठोकून होते. याशिवाय इतर ठिकाणावरील वरिष्ठ अधिकाऱ्यांनीदेखील हजेरी लावली. मात्र, प्रकरण संवेदनशील असल्याचे सांगत पोलिसांनी चुप्पी साधली आहे.
तीन राज्ये, १९ तासांचा प्रवास!
संशयित आरोपी सराईत गुन्हेगार असून, त्यांनी रेकी करून बांदा जिल्ह्यात दरोडा घातला. मागील महिन्यातच १४ नोव्हेंबर रोजी एका कंपनीवर छापा मारून स्थानिक पोलिसांनी अवैध हत्यारांचा मोठा साठा जप्त केला होता. अवैध हत्यारांच्या तस्करीत हा परिसर सक्रिय असल्याचे दिसते. अशा स्थितीत मुंबईतील तीन गुन्हेगार वाहनाने प्रवास करीत बांदा येथे पोहोचले. तिथे दरोडा घालून त्यांनी चक्क बंदुकांचे दुकान लुटले. तेथून तीन राज्ये ओलांडून एक हजार किलोमीटरचे अंतर कापून ते नाशिकमध्ये पोहोचले. सलग प्रवास केला तरी या प्रवासासाठी २० तास लागतात. एवढ्या मोठ्या कालावधीत तीन राज्यांमधील गुप्तचर यंत्रणा, दहशतवादविरोधी पथक, स्थानिक पोलिस, बॉर्डर चेक पोस्ट अशा कोणालाच भनकही लागली नाही हे विशेष. उत्तर प्रदेश, मध्य प्रदेशसह महाराष्ट्र या तिन्ही राज्यांमध्ये भाजपचे सरकार असून, पोलिस यंत्रणेतील सुस्तीबाबत खुद्द पोलिस यंत्रणांमध्येच दबक्या आवाजात चर्चा सुरू आहे. नाशिकमध्ये पेट्रोलपंपावर ही घटना घडली नसती तर संशयित विनासायास मुंबईत दाखल झाले असते.
आणखी एकास अटक
मुंबईकडे जाणाऱ्या मोठ्या शस्त्रसाठ्याच्या तस्करीत पोलिसांनी रविवारी एका संशयितास मुंबई येथून अटक केली. या गुन्ह्यात संशयित आरोपींची संख्या चार झाली असून, या प्रकरणाची पाळेमुळे शोधून काढण्याचे आव्हान अद्याप कायम आहे. पोलिसांनी रविवारी अटक केलेल्या संशयित आरोपीची ओळख उघड करण्यास नकार दिला. संशयिताला नाशिकला आणून चौकशी केल्यानंतरच पुढील चित्र स्पष्ट होईल, अशी माहिती सूत्रांनी दिली. नागेश राजेंद्र बनसोडे (वय २३), तसेच सलमान अमानुल्ला खान (१९, रा. शिवडी, मुंबई), बद्रीनुजमान अकबर बादशाह उर्फ सुमित (२७, रा. शिवडी मुंबई) या तिघांसमवेत हा संशयित उत्तर प्रदेशातील बांदा जिल्ह्यात गेला होता. तिथे शस्त्रांची लूट केली. पैकी तिघांना गुरुवारी सायंकाळी नाशिक ग्रामीण पोलिस दलाने चांदवड टोलनाक्याजवळ अटक केली. एकूण शस्त्रे आणि जप्त झालेली शस्त्रे यांच्यात तफावत असल्याने या गुन्ह्यात आणखी काही आरोपींचा सहभाग असावा, असा पोलिसांचा कयास होता. याच पार्श्वभूमीवर पोलिसांनी तीन पथके तपासासाठी मुंबईला रवाना केली होती. स्थानिक पोलिसांच्या मदतीने त्यांनी आज एका संशयितास अटक केली. परतीच्या प्रवासात तो अटक केलेल्या आरोपींसमवेत नव्हता. त्यामुळे उर्वरित शस्त्रसाठा त्याच्याकडून हस्तगत होऊ शकतो, अशी शक्यता पोलिसांनी व्यक्त केली. हा आरोपीदेखील सराईत असून, अंडरवर्ल्ड गँगशी संबंधित असल्याची माहिती समजते.
मोबाइल अॅप डाउनलोड करा आणि राहा अपडेट
