महापालिका हद्दीत त्र्यंबकरोडवर सीएसआर अंतर्गत सायकल ट्रॅक करून देण्याच्या जिल्हा उद्योग मित्र समितीच्या प्रस्तावाबाबत पालिकेने अनास्था दाखवली आहे. सद्यस्थितीत या रस्त्यावरील दीड मीटरच्या साइटपट्टीचा वापर हा सायकल ट्रॅक म्हणून केला जात असल्याचे सांगत, या रस्त्यावर सायकल ट्रॅकची गरज नसल्याचे उत्तर जिल्हा उद्योग मित्र समितीला पालिकेने कळवले आहे. शहरात अन्य ठिकाणाहून मागणी आल्यास कळवले जाईल, असे मोघम उत्तर देऊन जिल्हा उद्योग मित्र समितीच्या स्वतंत्र सायकल ट्रॅकच्या प्रस्तावावर पाणी फिरवले आहे.
जुलै महिन्यात जिल्हा उद्योगमित्र समितीच्या बैठकीत महापालिका हद्दीतून जाणाऱ्या त्र्यंबकरोडवर सायकल ट्रॅक करून देण्यावर चर्चा झाली होती. या रस्त्यावर सायकल ट्रॅक करण्याचे नियोजन करून त्यासंदर्भातील आराखडा व निधी खर्चासंदर्भातील प्रस्ताव सादर करण्याच्या सूचना जिल्हाधिकाऱ्यांच्या उपस्थितीत झालेल्या बैठकीत करण्यात आल्या होत्या. सीएसआरअंतर्गत विविध उद्योगांकडून निधी जमा करून हा सायकल ट्रॅक करण्याचे नियोजन करण्यात येणार होते. त्यासंदर्भातील झूमचे पत्र पालिकेला मिळाले असले तरी, या सायकल ट्रॅकबाबत पालिकेने अनास्था दाखवली आहे. सध्या त्र्यंबकरोडला दीड मीटर लागून साइटपट्टी आहे. त्यामुळे महापालिकेने या साइटपट्टीला सायकल ट्रॅक ठरवत तिचा सायकलिस्ट वापर करीत असल्याचा दावा केला आहे. सध्या त्र्यंबकरोडवर सायकल ट्रॅक असल्याचा शोध लावत, सध्या येथे सायकल ट्रॅकची गरज नसल्याचा अहवाल पालिकेने तयार केला आहे. स्वतंत्र सायकल ट्रॅकची गरज नसल्याचे पत्र जिल्हा उद्योग मित्र समितीला कळवले आहे. त्र्यंबकरो़डवर सायकल ट्रॅक अस्तित्वात नसतानाही पालिकेने घेतलेल्या या भूमिकेवरच आता संशय निर्माण झाला असून, आश्चर्य व्यक्त केले जात आहे.
मागणी असेल तर कळवू!
त्र्यंबकरोडवर सायकल ट्रॅक करून देण्याच्या जिल्हा उद्योग मित्र समितीचा प्रस्ताव परतवून लावत शहरात अन्य ठिकाणी सायकल ट्रॅक करण्याची मागणी आल्यास समितीला कळवले जाईल, असे मोघम उत्तर पालिकेने दिले आहे. सध्या पालिकेची आर्थिक स्थिती नाजूक असून कामांसाठी निधी नाही. दुसरीकडे सायकल ट्रॅक सीएआरअंतर्गत विकसित करण्याची तयारी उद्योजकांनी दर्शवली असताना त्याबाबत अनास्था दाखवण्यात आली आहे. त्यामळे पालिकेच्या उद्देशावरच आता शंका उपस्थित केल्या जात आहेत.
मोबाइल अॅप डाउनलोड करा आणि राहा अपडेट
