म. टा. वृत्तसेवा, सिन्नर फाटा
नाशिकरोडमध्ये ईद-ए-मिलाद सण मुस्लिम बांधवांनी मोठ्या उत्साहात साजरा केला. इस्लाम धर्माचे प्रेषित हजरत मोहम्मद पैगंबर यांची जयंती अर्थात, ईद-ए-मिलादनिमित्त शहरातून शनिवारी भव्य मिरवणूक काढण्यात आली. त्यात शहरातील ३५ मोठ्या चित्ररथांसह मुस्लिम बांधवही मोठ्या संख्येने सहभागी झाले होते.
शहरातील चित्ररथ मिरवणुकीत जेलरोड, विहितगाव, चेहेडी, सिन्नर फाटा, सुभाषरोड, देवळालीगाव आदी ठिकाणच्या सार्वजनिक मंडळांचे चित्ररथ सहभागी झाले होते. त्यात सहभागी झालेल्या मुस्लिम बांधवांचे विविध पक्षांच्या कार्यकर्त्यांनी व नागरिकांनी मुख्य चौकांत मिठाई, गुलाबपुष्प देऊन स्वागत करूत बंधुभावाची शिकवण दिली.
गोसावीवाडी येथून शनिवारी सकाळी मौलानांच्या हस्ते मिरवणूक सुरू झाली. डॉ. आंबेडकर पुतळा, शिवाजी पुतळा, बिटको चौक, सत्कार पॉइंट, अनुराधा चौक, विहितगाव व देवळालीगाव अशा मार्गाने आलेल्या मिरवणुकीची सांगता गाडेकर मळ्यातील महापालिकेच्या मैदानावर मौलाना अकबर कादरी व इतर धर्मगुरूंच्या प्रवचनाने झाली. या कार्यक्रमास मौलाना मुफ्ती रहेमान रजा मिसवाही, मौलाना हाफिज मुस्ताक, मौलाना जफर खान, मौलाना अब्दुल अजीज, मौलाना हारुन रशीद आदी उपस्थित होते.
--
सामाजिक मंडळांचा सहभाग
मिरवणुकीदरम्यान अनेक ठिकाणी सामाजिक मंडळांतर्फे चित्ररथांचे स्वागत व अन्नदान करण्यात आले. टिपू सुलतान फ्रेंड सर्कल, हिंद सोशल वेल्फेअर, अजमेरी ग्रुप, सरकार फाऊंडेशन, हजरत सादिका शाह हुसैन ग्रुप, अलहुसेनी वेल्फेअर ट्रस्ट, हनफिया नौजवान कमिटी, आझाद हिंद सेना आदी मंडळांचा मिरवणुकीत समावेश होता.
--
ठिकठिकाणी स्वागत
नाशिकरोड पोलिस ठाण्याच्या प्रवेशद्वारासमोर मिरवणुकीत सहभागी चित्ररथांचे आमदार बाळासाहेब सानप यांच्या हस्ते स्वागत करण्यात आले. शिवसेनेच्या वतीने नगरसेवक सूर्यकांत लवटे यांनी अनुराधा चौकात चित्ररथांचे स्वागत केले. माजी नगरसेवक अस्लम मणियार यांच्यासह निजाम मास्टर, वसीम शेख, इम्तियाज सय्यद, जेलरोडच्या अंजुमन फैजाने हनफिया नुरीयाचे अध्यक्ष हाजी अब्दुल गनी, हाजी गनी चाँद, हाजी उमर पटेल आदींसह शेकडो मुस्लिम बांधव या मिरवणुकीत सहभागी झाले होते.
--
भाजपतर्फे मिठाईवाटप
नाशिकरोड ः येथील मिरवणुकीत सहभागी झालेला चित्ररथांचे भारतीय जनता पक्ष आणि मित्रमेळा परिवारातर्फे स्वागत करण्यात आले. मुस्लिम बांधवांना शुभेच्छा देऊन मिठाईवाटप करण्यात आले. आमदार बाळासाहेब सानप, प्रभाग समितीच्या सभापती सुमन सातभाई, मित्रमेळा परिवाराचे राजेंद्र ताजणे, नगरसेवक बाजीराव भागवत, युवा मोर्चाचे नाशिकरोड मंडल अध्यक्ष शांताराम घंटे यांची प्रमुख उपस्थिती होती. स्थायी समिती सदस्या सीमा ताजणे, नगरसेविका संगीता गायकवाड, मीरा हांडगे, सुनंदा मोरे, नगरसेवक पंडित आवारे, अंबादास पगारे, सुभाष घिया, नय्युम खान, मंदा फड, रोहिणी नायडू आदी उपस्थित होते.
--
पोलिसांचे चोख नियोजन
या मिरवणुकीदरम्यान पोलिस उपायुक्त श्रीकृष्ण कोकाटे यांच्या मार्गदर्शनाखाली नाशिकरोड पोलिस ठाण्याचे वरिष्ठ निरीक्षक पंढरीनाथ ढोकणे, उपनगरचे बाजीराव महाजन, सहाय्यक निरीक्षक (गुन्हे) सुरज बिजली आदींनी चोख बंदोबस्त ठेवला होता. शहरात धार्मिक सणांच्या पार्श्वभूमीवर सामाजिक सलोखा अबाधित राहावा यासाठी स्थानिक पोलिसांसह राज्य राखीव दलाची तुकडीही बंदोबस्तासाठी तैनात करण्यात आली होती.
-----------
देवळाली कॅम्पमध्ये मिरवणूक
--
म. टा. वृत्तसेवा, देवळाली कॅम्प
इस्लाम धर्माचे प्रेषित हजरत मोहम्मद पैगंबर यांचा जन्मदिवस म्हणजेच ईद-ए-मिलादचा सण देवळाली कॅम्पसह भगूर परिसरात उत्साहात साजरा करण्यात आला. शहरात विविध चौकांमध्ये जगभरातील प्रसिद्ध मशिदींच्या प्रतिकृती साकारण्यात आल्या होत्या. शहरातून काढण्यात आलेल्या जुलूस-ए-मोहम्मदी मिरवणुकीत मिलाद पार्टीच्या गाण्यांनी रंगत भरली.
देवळाली कॅम्प शहरात जुन्या बसस्थानक परिसरात सुन्नी इस्लामिक फाउंडेशनतर्फे साकारण्यात आलेल्या मुख्य सजावटीत व शहेनशहा-ए-सरकार ग्रुपतर्फे मक्का मदिना, अजमेर शरीफ व बगदाद शरीफ, चिश्तिया फ्रेंड सर्कलतर्फे अबुधाबी येथील जामा मशीद, अर्क वेल्फेअर अॅण्ड एज्युकेशन ट्रस्टतर्फे मस्जिद-ए-नबी, लब्बीक फ्रेंड सर्कल व सुल्ताने हिंद ग्रुपतर्फे मस्जिद-ए-अबुधाबी, फत्ते स्टार ग्रुपतर्फे मलेशियातील मशीद, केजीएन ग्रुपतर्फे मक्का-मदिना, बज्मे गरीब नवाज बेडर जमततर्फे अबुधाबी येथील मशीद, शेख फ्रेंड सर्कलतर्फे फत्तेपूर लखनऊ येथील ऐतिहासिक जामा मशिदीचा देखावा, तर फैजान-ए-मदिना काबा शरीफ मशिदीची प्रतिकृती साकारण्यात आली होती.
शहरातील मुख्य जामा मशिदीपासून दुपारी ४ वाजेला मिरवणुकीला सुरुवात करण्यात आली. त्यात मौलाना सादिक अख्तर, नगरसेवक सचिन ठाकरे, सुरेश कदम, संजय गोडसे, निसार खान, फारूक खान, अफजल खान, रफिक शेख, रईस शेख, जहाँगीर शेख, वाजीद सय्यद, अजीज शेख, राशीद सय्यद, इब्राहिम शेख, शाहिद सय्यद, झिशान खान आदी सहभागी झाले होते.
--
मिठाई, सरबत बाटप
नगरसेवक भगवान कटारिया यांच्यासह शेख फ्रेंड सर्कल, ब्लू वॉरियर्सतर्फे मिरवणुकीदरम्यान नानकटाई, मिठाई व दूध-सरबताचे वाटप करण्यात आले. शहराच्या विविध भागात दुचाकीवरून रॅली काढण्यात येऊन हजरत मुहम्मद पैगंबर यांच्या नावाचा जयघोष करण्यात आला. टांगा लाइन येथे नियाजचे वाटप करण्यात आले.
--
भगूरला देखावे, मिरवणूक
येथील मौलाना आझादरोडवर मक्का-मदिना येथील आकर्षक रोषणाईचा देखावा सादर करण्यात आला होता. चौकाचौकांत मुस्लिम युवा सोशल ग्रुप, मुस्लिम एज्युकेशन वेल्फेअर सोसायटी, बज्मे गौसिया ग्रुप आदींतर्फे देखावे सादर करण्यात आले. लहान मुले-मुली, युवक यांच्या उपस्थितीत निघालेला जुलूस टाकी चौक, तेली गल्ली, राम मंदिररोड, आठवडेबाजार, मारवाडी गल्ली, शिवाजी चौकात दाखल होताच शिवसेना जिल्हाप्रमुख करंजकर, नगरसेवक भाऊसाहेब गायकवाड, फरीद शेख आदींनी इमाम-ए-खतीफ मौलाना मोहम्मद अफाक रझा यांचे पुष्पहार देऊन स्वागत केले.
--
पोलिसांतर्फे स्वागत
जुलूसमध्ये सहभागी बांधवांचे सहाय्यक पोलिस आयुक्त मोहन ठाकूर, वरिष्ठ निरीक्षक सुभाष डौले यांच्यासह पोलिसांतर्फेही गुलाबपुष्प देऊन स्वागत करण्यात आले. परिसरात मसूर पुलाव व गोड नियाजचे वाटप करण्यात आले. अस्लम मणियार, फिरोझ पटेल, अमजद पटेल, मुन्नाभाई अन्सारी, आरिफ मणियार, यासिर शेख, इम्रान पटेल आदींसह मुस्लिम बांधव या कार्यक्रमांत सहभागी झाले होते.
--
बच्चेकंपनीचा उत्साह
मिरवणुकीसह दिवसभर झालेल्या विविध धार्मिक कार्यक्रमांत बच्चेकंपनीने उत्स्फूर्त सहभाग नोंदवला. ईदनिमित्त नवीन कपडे परिधान करण्यासह धार्मिक टॅटू रंगवून धमाल केली. सेल्फी काढण्यासाठीही चिमुकल्यांचा उत्साह दिसून आला. एक दिवस आधी लहान खास चिमुकल्यांसाठी आजोयित करण्यात आलेल्या तकरीर मुकाबल्यातदेखील बच्चेकंपनीने उत्स्फूर्त सहभाग नोंदवला.
मोबाइल अॅप डाउनलोड करा आणि राहा अपडेट
