सिडको परिसरात अनेक दिवसांपासून स्वच्छतागृहांची कमतरता असतानाच त्रिमूर्ती चौक व सावतानगर येथील स्वच्छतागृहे तोडण्यात आले आहे. त्यामुळे नागरिकांना विशेषतः महिलांना गैरसोय सहन करावी लागत आहे. स्मार्ट सिटीकडे जाणाऱ्या नाशिकचाच एक भाग असलेल्या सिडकोत किमान ही सुविधा तरी महापालिकेने तातडीने द्यावी, अशी मागणी करण्यात येत आहे.
सिडको परिसरात सध्या शिवाजी चौक येथील भाजी मार्केटमध्ये महापालिकेने सुलभ शौचालय उभारले आहे. त्याव्यतिरिक्‍त उत्तमनगर येथे एक स्वच्छतागृह असून, पवननगर येथे एक सुलभ शौचालय आहे. पवननगर ते उंटवाडीपर्यंत म्हणजे जवळपास संपूर्ण सिडकोत एकही स्वच्छतागृह नसल्याचे दिसून येते. यापूर्वी सावतानगर येथे खासगी जागेत एक स्वच्छतागृह होते. परंतु, या जागेवर नव्याने इमारत उभी राहत असल्याने हे स्वच्छतागृह पाडण्यात आले. त्याचप्रमाणे त्रिमूर्ती चौकातील भाजी मार्केटजवळसुद्धा स्वच्छतागृह होते. परंतु, तेदेखील काही दिवसांपूर्वी पाडण्यात आले. त्यामुळे आता या भागात स्वच्छतागृहच राहिले नसल्याची स्थिती आहे. त्यामुळे नागरिकांची गैरसोय होत असून, अनेकांना अक्षरशः खुल्या जागेचा वापर करावा लागत आहे. सिडको प्रशासनाने सिडकोच्या कोणत्याही जागेवर स्वच्छतागृह उभारलेले दिसत नसल्याने सिडकोत स्वच्छतागृहांची समस्या भेडसावत आहे. येथे पुरेशी स्वच्छतागृहे नसल्याने बाहेरगावाहून येणाऱ्यांचीदेखील कुचंबणा होत अाहे. त्यामुळे महापालिका व सिडकोने तातडीने या भागात पुरेशा स्वच्छतागृहांची उभारणी करावी, अशी मागणी हेात आहे.
--
राखीव भूखंडच नाही
नाशिक शहराची स्मार्ट सिटीत गणना झालेली असताना सिडकोतील साधी स्वच्छतागृहांची समस्या अद्याप सुटलेली दिसत नाही. त्यामुळे हे शहर स्मार्ट सिटीत कसे जाणार, असा प्रश्न उपस्थित होत आहे. सिडको प्रशासनाने महापालिकेकडे सर्व योजना हस्तांतर केल्या असल्या, तरी एकही भूखंड स्वच्छतागृहासाठी राखीव नसल्याचे समजते. सिडकोत दाट वस्ती झालेली असल्याने आता कोणत्याही ठिकाणी स्वच्छतागृह उभारताना नागरिकांचा विरोध होण्याची शक्‍यताही वर्तविली जात आहे.
--
भाजीविक्रेत्यांकडून साकडे
सिडकोतील त्रिमूर्ती चौक भागात असलेल्या भाजीविक्रेत्यांसाठी स्वतंत्र स्वच्छतागृह उभारावे, अशी मागणी परिसरातील भाजीविक्रेत्यांनी केली आहे. सिडकोने भाजीविक्रेत्यांसाठी जागा उपलब्ध करून गाळे बांधून दिले असले, तरी त्या ठिकाणी स्वच्छतागृह नसल्याने ते उभारून द्यावे, अशा मागणीचे निवेदन नगरसेवक सुधाकर बडगुजर यांना भाजीविक्रेत्यांनी दिले. यावेळी शीतल जाधव, अलका जाधव, कुसुम चव्हाण, मालती भावसार, कविता मोंढे, सुनीता गायकवाड, अनिता आहेर, प्रतिभा पाटील यांच्यासह अनेक भाजीविक्रेते उपस्थित होते.
मोबाइल अॅप डाउनलोड करा आणि राहा अपडेट
