ज्या केंद्रांवर १५ पेक्षा जास्त नाटके सादर होतील तेथून दोन नाटके अंतिमला जाणार असल्याची सांस्कृतिक मंत्री विनोद तावडे यांची घोषणा राज्य नाट्य स्पर्धेच्या निकालाच्या मूळावर आली आहे. स्पर्धा होऊन दोन दिवस उलटूनही अद्याप केवळ ‘तो’ अध्यादेश जारी न झाल्याने स्पर्धेच्या निकालाचा त्रिशंकू झाला आहे.
गेल्या आठवड्यात मुंबईमध्ये झालेल्या एका सांस्कृतिक कार्यक्रमात सांस्कृतिक मंत्री विनोद तावडे यांनी अंतिम फेरीत दोन नाटके जाणार असल्याची घोषणा केली. त्यामुळे केंद्र्रांनी जल्लोषही केला; मात्र ही घोषणाच आता निकालामध्ये अडसर बनू पहात आहे. तावडे यांच्या घोषणेचा अध्यादेश अद्यापही निघालेला नाही. त्यामुळे केंद्रांवरील स्पर्धांचे निकाल अडवून ठेवण्यात आलेले आहे. राज्यात १९ केंद्रांवर हौशी राज्य नाट्य स्पर्धेची प्राथमिक फेरी झाली असून काही ठिकाणच्या स्पर्धा झाल्या आहेत. मात्र, काही केंद्रांवरील स्पर्धा संपण्यासाठी अद्याप काही दिवस बाकी असल्याने त्यांच्या निकालावर परिणाम होऊ नये म्हणून आधीच्यांचे निकाल थांबविण्यात आल्याची चर्चा आहे. त्यात नाशिकचाही नंबर असून येथील केंद्रावर तब्बल २१ नाटके सादर झाली आहेत. त्यातही अत्यंत चुरस असून एकाहून एक सरस नाटके येथे झालेली असल्याने अंतिमला कोणती दोन नाटके जातात याबद्दल उत्सुकतेचे वातावरण आहे.
आज होणार घोषणा?
नाशिक केंद्रावरील स्पर्धा शनिवारी (दि. २५) संपल्या. मधे रविवार (दि. २६) आल्याने त्यादिवशी निकाल लागला नाही मात्र तिसऱ्या दिवशी, सोमवारी हा निकाल लागणे अपेक्षित असताना तावडे यांच्या घोषणेचा जीआर अद्याप आलेला नसल्याने निकाल रखडला असल्याचे सूत्रांनी सांगितले. जीआर येत नाही तोपर्यंत तरी नाशिकच्या रंगकर्मींना वाटच पहावी लागणार आहे. या पार्श्वभूमीवर मंगळवारी (दि. २८) उशिरापर्यंत निकालाची घोषणा होणार असल्याचेही सूत्रांनी सांगितले.
मोबाइल अॅप डाउनलोड करा आणि राहा अपडेट
