म. टा. प्रतिनिधी, नाशिक
कृषी क्षेत्राला आणि पर्यायाने शेतकऱ्यांना उभारी देण्यासाठी वेगवेगळे प्रयोग करणाऱ्या उद्यमशील युवकांच्या पाठीवर कौतुकाची थाप देत कृषीथॉन या आंतरराष्ट्रीय दर्जाच्या कृषी प्रदर्शनाचा नाशिकमध्ये शुभारंभ करण्यात आला.
सिटी सेंटर मॉल आणि एबीबी सर्कल लगतच्या ठक्कर ठोम येथे कृषीथॉन प्रदर्शनाचा उद्‍घाटन सोहळा थाटामाटात पार पडला. ह्युमन सर्व्ह‌िस फाउंडेशन व मीडिया एक्झ‌िबिटर्स यांच्यातर्फे भरविण्यात आलेल्या या प्रदर्शनाच्या उद्‍घाटनाला विधान परिषदेचे विरोधी पक्षनेते राधाकृष्ण विखे पाटील, विधान परिषदेचे उपसभापती माणिकराव ठाकरे, खासदार हरिश्चंद्र चव्हाण यांच्यासह ‘मविप्र’च्या सरचिटणीस नीलिमा पवार, जिल्हा परिषद अध्यक्षा शीतल सांगळे, उपाध्यक्षा नयना गावित, ‘नाडा’चे विजूनाना पाटील, कृषी सहसचिव दिलीप झेंडे, कृषीथॉनचे आयोजक संजय न्याहारकर, साहिल न्याहारकर आणि अश्विनी न्याहारकर आदी मान्यवर उपस्थित होते.
यावेळी ठाकरे म्हणाले, की यवतमाळमध्ये काही शेतकऱ्यांचा मृत्यू झाला म्हणून किटकनाशकांची दुकानेच बंद करणे योग्य नाही. या किटकनाशकांमध्ये मृत्यूला कारणीभूत ठरणाऱ्या ज्या घटकांचे प्रमाण अधिक आहेत ते नियंत्रणात आणायला हवे. कंपन्यांवर निर्बंध आणावेत व त्यांच्यावर गुन्हे दाखल करायला हवेत, अशी आमची मागणी आहे. सरकारने या गोष्टींमध्ये बारकाईने जायला हवे.
कपाशीला अधिक तर द्राक्षासारख्या पिकांना कमी प्रमाणात औषधे लागतात. दोन्ही प्रकारचे औषधे एकत्रितरित्या विकू नये असे म्हटले तर दोन लायसन देणे सरकारला शक्य आहे का असे चुकीच्या पद्धतीने सरकार निर्णय घेत असेल तर ते योग्य होणार नाही. दुकानदारांवर बंदी आणण्यापेक्षा कंपन्यांवर कारवाई करा. दरम्यान, यवतमाळमध्येही असे कृषीथॉन घ्यावे, अशी अपेक्षा त्यांनी व्यक्त केली.
नवनवीन तंत्रज्ञान, बदलती शेती पद्धती याविषयी या प्रदर्शनात माहिती मिळेल. सरकारने हवामानाधारीत प्रदेशावर कृषी धोरणाची रचना करायला हवी, अशी अपेक्षा विखे यांनी व्यक्त केली. राजकारण्यांनी सर्व व्यवस्था बिघडवली आहे. शेतकऱ्यांच्या प्रश्नांचेही राजकारण झाले आहे. शेतकऱ्यांच्या शेतीमालाचे गणित शेतकऱ्यांनी ठरवायला हवे. अनुदानासाठी सरकारकडे भीक कशाला मागायला हवी, असा सवाल त्यांनी उपस्थित केला. पद्मावती चित्रपट हा काय राष्ट्रीय प्रश्न आहे का? असा सवाल त्यांनी उपस्थित केला. शेतकऱ्यांच्या आत्महत्या होत आहेत त्या रोखण्यासाठी काम करा, असा सल्ला त्यांनी दिला. अन्य मान्यवरांनी यावेळी मनोगत व्यक्त केले. प्रदर्शन सोमवारपर्यंत (दि. २७) सुरू राहणार आहे. संजय न्याहारकर यांनी उपस्थितांचे स्वागत केले. साहिल न्याहारकर यांनी प्रास्ताविक केले.
युवा शेतकरी, संशोधकांचा सन्मान
कृषी क्षेत्रामध्ये प्रयोगशील कार्य करणारे राज्यातील युवा शेतकरी, महिला शेतकरी, युवा संशोधक, युवा कृषी उद्योजक अशा ३४ जणांचा या प्रदर्शनामध्ये सत्कार करण्यात आला. यामध्ये रुपाली पाटील, कल्पना दामोदर, रेखा वहाटूळ, विभावरी जाधव, ज्योत्सना सुरवाडे, राहुल सुपारे, राहुल रौंदळ, विष्णू मुसळे, योगेश पवार, आप्पा करमरकर, ब्रह्मानंद पांगुळे, उद्धव नेरकर, अभिजीत वाडेकर, रोहन उरसळ, समृद्धी परांजपे, सरोजिनी फडतरे, डॉ. दीपक क्षीरसागर, डॉ. मिलिंद जोशी, डॉ. अंकुश चोरमुले, आकाश चौरसिया (मध्य प्रदेश), डॉ. अमित शर्मा (हरियाणा), अनिरुद्ध उमरकर, भागवत बलक, रोकडेश्वर फार्मस कंपनी यांचा सन्मान करण्यात आला.
मोबाइल अॅप डाउनलोड करा आणि राहा अपडेट
