आमदारांचे प्रगतिपुस्तक
--
मतदारसंघ : येवला-लासलगाव
--
‘मॉडेल सिटी’चे स्वप्न कारवाईमुळे अधांतरी
--
पिढ्यान् पिढ्या दुष्काळी गणल्या गेलेल्या येवला तालुक्याला छगन भुजबळ यांच्या रुपाने मिळालेले ‘हेवीवेट’ नेतृत्व ही विकासाचा आशावाद जागविणारी घटना होती. पुढच्या दशकभरात भुजबळ यांनीही वकुबाला जागत येवल्याला ‘मॉडेल सिटी’ म्हणून आकार देताना तालुक्यालाही समान न्याय देण्याचा प्रयत्न केला. या कालावधीत त्यांनी दोन हजार कोटींचा निधी मतदारसंघात आणून येवल्याकडे सर्वांचेच लक्ष वेधले. यामुळे सत्तांतरानंतरही ‘हेवीवेट’ असणारे हे नेतृत्व तालुक्याच्या वाट्याला उपेक्षा येऊ देणार नाही अन् विकासाचा वेग असाच कायम राहील, असा विश्वास येवलेकरांनी बाळगला. ‘ईडी’ची चौकशी मागे लागल्यानंतरही त्यांनी मतदारसंघासाठी वेळोवेळी मुख्यमंत्र्यांचा पाठपुरावा करणे सोडले नव्हते. यानंतर भ्रष्टाचारांच्या आरोपप्रकरणी ते सध्या तुरुंगात असले, तरीही मतदारसंघाच्या विकासकामांचा पाठपुरावा त्यांनी सरकारकडे अखंडित सुरू ठेवला आहे. अर्थात, गेल्या दशकभराच्या तुलनेत विकासाची स्वप्ने बघणारा तालुका वेग मंदावल्याने पुन्हा पिछाडीवर पडत असल्याचे चित्र आहे.
मांजरपाड्याचा मार्ग मोकळा
पुणेगाव-दरसवाडी-डोंगरगाव पोचकालवा आणि मांजरपाडा प्रकल्प हा दुष्काळग्रस्त येवलेकरांच्या अत्यंत जिव्हाळ्याचा विषय आहे. भुजबळांकडे मंत्रिपद असताना या प्रकल्पाने गती घेतल्याने याबाबत तालुक्याच्या आशा पल्लवित झाल्या होत्या. मात्र, सत्तांतरापासून हा प्रकल्प ‘जैसे थे’ स्थितीत आहे. पण, रखडलेली कामे मार्गी लावण्यासाठी उर्ध्व गोदावरी प्रकल्पाच्या तृतीय सुधारित प्रशासकीय मान्यता अहवालास मंत्रिमंडळाने १ नोव्हेंबर २०१७ रोजी मंजुरी दिल्याने या महत्त्वाकांक्षी प्रकल्पाचा मार्ग मोकळा झाला आहे. ४५ टंचाईग्रस्त गावांसाठी नवीन प्रादेशिक पाणीपुरवठा योजना तयार करणेही दृष्टिपथात आले आहे. येवल्यात भुजबळांनी उभारलेले मिनी सचिवालय, क्रीडा संकुल, ग्रामीण रुग्णालय, महात्मा फुले नाट्यगृह आदी वास्तूही पुरेशी यंत्रणा, यंत्रसामग्री आणि मनुष्यबळाचा अभाव आदी कारणांनी समस्यांच्या गर्तेत सापडल्या आहेत.
--
एमआयडीसीत जलसुविधा
महाराष्ट्र औद्योगिक विकास महामंडळाकडून येवला औद्योगिक क्षेत्रातील पाणीपुरवठा योजनेच्या.१४.२२ कोटींच्या कामाचा कार्यारंभ आदेश निर्गमित करण्यात आला आहे. या कामात येवला औद्योगिक क्षेत्र जलशुद्धीकरण केंद्र, विंचूर ते येवला एमआयडीसीपर्यंत २५० मिलिमीटर व्यासाची डीआय जलवाहिनी, विंचूर औद्योगिक क्षेत्र येथे ५०० घनमीटर क्षमतेचा जलकुंभ आणि येवला औद्योगिक क्षेत्र येथे ३०० घनमीटर क्षमतेचा ईएसआर बांधणे या कामांचा सामावेश आहे. चिचोंडी येथे नवीन औद्योगिक क्षेत्र विकसित करण्यासाठी यापूर्वी १०९.३४ हे आर क्षेत्र संपादित करण्यात येऊन या क्षेत्राचे सर्वेक्षण व सीमांकनही पूर्ण झाले आहे. येथील पायाभूत सुविधांच्या कामाकरिता १,८३१ लाख रुपये निव्वळ व २,१०६ (ठोक) इतक्या खर्चाचा प्रस्ताव एमआयडीसी मुख्यालयात मंजुरीच्या प्रक्रियेत आहे. कारागृहातून पत्रव्यवहार आणि तारांकित प्रश्नांच्या माध्यमातून या कामांचा पाठपुरावा भुजबळ यांच्या वतीने सुरू आहे. विंचूर औद्योगिक वसाहत वाइन उद्योगासाठी राखीव आहे. मात्र, भुजबळांमुळे येथील उर्वरित ४० हेक्टर भूखंड अन्न प्रक्रिया उद्योग या प्रकल्पाकरिता वाटप करण्याचा निर्णय महामंडळाने घेतला आहे. २०१७-१८ साठी आमदारांच्या स्थानिक विकासनिधीतून अडीच कोटी रुपयांच्या कामाची शिफारस करण्यात आली आहे.
--
या प्रश्नांकडे दुर्लक्ष
येवला तालुक्याचा वारू विकासाच्या दिशेने दौडत असल्याचे चित्र असताना दरम्याच्या घडामोडींनी या विकासकामांची गती मंदावल्याचे चित्र आहे. परिणामी येवला शहरात उभ्या राहिलेल्या शासकीय इमारतींसोबतच कामाचा डोलारा सांभाळू शकणारी रिक्त पदे भरली जाणेही गरजेचे आहे, हे ग्रामीण रुग्णालयाच्या स्थितीवरून दिसून येते. दळणवळणाच्या माध्यमातून विकासाचा प्रमुख मार्ग असणाऱ्या बहुतांश रस्त्यांची चाळण तालुक्यात झाली आहे. या रस्त्यांची देखभाल व दुरुस्ती गरजेची आहे. शहरात भूमिगत गटार योजनेचे कामही रखडले आहे. यासह विविध विकासकामांसाठी नगराध्यक्षांनी मुख्यमंत्र्यांना साकडे घातले आहे. बसस्थानकाच्या आवारात असंख्य खड्डे पडले आहेत. शिवाय अहमदनगर-मनमाड महामार्गावर येवला शहराच्या हद्दीतील सव्वाशे पथदीप बंद अवस्थेत असल्याने हे शोभेचे दीप ठरताहेत. सोलर दिव्यांचीही अवस्था वेगळी नाही.
--
प्रतिस्पर्धींनी टाळले भाष्य
सरकारला तीन वर्षे पूर्ण होत असल्याच्या पार्श्वभूमीवर ‘महाराष्ट्र टाइम्स’ने प्रत्येक मतदारसंघातील आमदारांच्या गत निवडणुकीतील प्रतिस्पर्ध्यांची मतेही जाणून घेण्याचा प्रयत्न केला. २०१४ च्या विधानसभा निवडणुकीत भुजबळ यांना आव्हान देत तालुक्यातून दुसऱ्या क्रमांकाची मते घेणारे शिवसेनेचे उमेदवार संभाजी पवार यांच्याशी संपर्क साधला असता ते म्हणाले, की ती निवडणूक आम्ही समोरासमोर लढविली होती. तेव्हा मत नोंदविणे शक्य होते. पण, आज आमदार भुजबळ तुरुंगात असल्याने विकासकामांसंदर्भात कोणतीही प्रतिक्रिया देणे संयुक्तिक ठरणार नाही. त्यांनी या विषयावर भाष्य करण्यास नम्र नकार दिला. भुजबळांच्या विरोधात भाजपच्या तिकिटावर निवडणूक लढविणारे त्या निवडणुकीतील तिसऱ्या क्रमांकाची मते मिळविणारे प्रतिस्पर्धी शिवाजी मानकर यांच्याशी वारंवार संपर्क साधूनही त्यांच्याकडून प्रतिसाद मिळाला नाही.
--
मार्गी लावलेली कामे
-कोटमगावनजीक २२.१२ कोटींच्या रेल्वे उड्डाणपुलाचे काम मार्गी
येवल्याचे भूमिपुत्र सेनापती तात्या टोपे यांच्या स्मारकासाठी ९ कोटी रुपये मंजूर
-१०० खाटांच्या उपजिल्हा रुग्णालयासाठी ८.५० कोटींच्या बांधकामास मंजुरी.
-व्यापारी संकुलासाठी ५ कोटी ८१ लाख ३८ हजार व ३ लाख ५६ हजारांचा निधी, दुसऱ्या टप्प्यात ४ कोटी ५४ लाख रुपये मंजूर, १७६ गाळ्यांचे शॉपिंग कॉम्प्लेक्स साकारले.
-ममदापूर संवर्धन राखीव क्षेत्रामध्ये विविध सुविधांसाठी १ कोटी १४ लाख रुपये निधी
-येवल्यात आदिवासी मुलांच्या शासकीय वसतिगृहासाठी ४ कोटी ५३ लाख, तर आदिवासी मुलींच्या वसतिगृहासाठी ४ कोटी ६२ लाखांचा निधी
-वन पर्यटनांतर्गत राजापूर येथील विकासकामांसाठी ३ कोटी ६७ लाख रुपये निधी.
-विखरणी व कोटमगाव येथे १३२ /११ केव्ही विद्युत उपकेंद्रांचे काम पूर्णत्वास
-मुखेड, नगरसूल व नांदूरमध्यमेश्वर येथील विद्युत उपकेंद्रामध्ये बसविले ५ एमव्हीए क्षमतेचे अतिरिक्त रोहित्र
-भारम, राजापूर, खडकमाळेगाव येथील आरोग्य केंद्रांची कामे मार्गी
--
आमदारांचे प्रतिनिधी म्हणतात...
--
विकासासाठी अखंडित पाठपुरावा
माजी उपमुख्यमंत्री व राष्ट्रवादीचे ज्येष्ठ नेते छगन भुजबळ यांनी येवला तालुक्याचा कायापालट सुरुवातीच्या दहा वर्षांत केला. रस्ते, पाणी, वीज या मूलभूत सुविधांसह प्रशासकीय इमारतींचे बांधकाम अशी असंख्य विकासकामे मार्गी लावली. सद्यस्थितीतही त्यांनी तालुक्याच्या विकासाचा ध्यास सोडलेला नाही. तुरुंगातूनही येवला तालुक्याच्या विकासासाठी पत्रव्यवहारासह तारांकित प्रश्न आणि शक्य त्या मार्गे मुख्यमंत्री व सरकारकडे अखंडितपणे पाठपुरावा त्यांनी सुरूच ठेवला आहे. त्यांच्या वतीने येवल्याचे शक्य तितके प्रश्न विधानसभेत उपस्थित करून येवलेकरांच्या विकासाची गती कायम ठेवण्यासाठी आमचा प्रयत्न आहे. याच प्रयत्नातून कोट्यवधी रुपयांच्या विकासनिधीला मंजुरी मिळालेली असून, अनेक विकासकामे मार्गी लागली आहेत.
-जयवंत जाधव, आमदार, नाशिक
(छगन भुजबळ यांच्या वतीने प्रातिनिधिक प्रतिक्रिया.)
---
विरोधक म्हणतात...
आश्वासनांवर बोळवण
पुणेगाव-दरसवाडी-डोंगरगाव पोचकालव्याचे काम मार्गी लागणे हे येवला तालुक्याच्या विकासाच्या दृष्टीने अत्यंत महत्त्वाचे आहे. मात्र, याबाबत केवळ पोकळ आश्वासने दिली जातात. याशिवाय विकासकामांसाठी निधीचे गाजर तालुक्याला दाखविले जाते. रस्त्यासारख्या मूलभूत प्रश्नांसह विविध विकासकामांच्या कसोटीवर येवला तालुक्याला पोरकेपण आल्याची भावना आहे. निधी मंजूर असल्याचे सांगितले जाते. पण, कागदावरच्या मंजुरीपेक्षा प्रत्यक्षात अंमलबजावणी काय, असा आलेख बघितला, तर विकासाच्या मुद्यावर येवला तालुक्याला विधानसभेमध्ये थेट प्रतिनिधीत्वच नसल्याने या तालुक्याला न्याय तरी कसा मिळणार?
-झुंजारराव देशमुख, शिवसेना तालुकाप्रमुख, येवला
--
शब्दांकन : जितेंद्र तरटे
-----------
मतदारसंघ ः निफाड
--
आक्रमक कारकीर्दीत रस्त्यांना मात्र वनवास!
--
जनतेच्या प्रश्नांसाठी धावून जाणारा आक्रमक आमदार अशी ओळख निर्माण केलेल्या अनिल कदम यांना तीच आक्रमकता विकासात मात्र दाखवता आलेली नाही. सत्तेतील तीन तर विरोधात पाच अशा एकूण आठ वर्षांच्या आमदारकीच्या काळात जनतेच्या प्रश्नांवर ते आक्रमक राहिले असले, तरी मतदारसंघातील रस्त्यांचा वनवास त्यांना संपवता आलेला नाही. बंद पडलेल्या निसाका, रानवडची चाके फिरविण्यातही त्यांना अद्याप अपयश आले आहे. रस्त्यांसाठी १७२ कोटींचा निधी मिळविल्याचा दावा त्यांनी केला असला, तरी नैसर्गिक संपन्नता लाभलेल्या निफाड मतदारसंघाला विकासाची जोड देण्यात ते यशस्वी झालेले नाहीत. सत्तेत असूनही सरकारच्या निर्णयाविरोधात आवाज उठवून जनतेतील आपली प्रतिमा कायम ठेवण्यात मात्र त्यांना यश आले आहे.
निफाड हा नैसर्गिक साधन संपत्तीने संपन्न, बागायती, द्राक्ष, कांदा, ऊस अशा प्रकारची नगदी पिके घेणारा तालुका. तालुक्यातील ७० टक्के क्षेत्र बागायती असल्याने त्यातून येणाऱ्या आर्थिक सुबत्तेचा रागरंग असणाऱ्या तालुक्याच्या वायनरी, कांद्याची आंतरराष्ट्रीय बाजारपेठ, टोमॅटोचे विक्रमी उत्पादन, सातासमुद्रापार जाणारी चविष्ट द्राक्ष या भूषणावह बाबी आहेत.
आक्रमक शैलीचा प्रभाव
निफाड तालुक्यातील लासलगाव, विंचूर भागातील ४८ गावे सोडून उर्वरित १०४ गावांचा निफाड मतदारसंघ आहे. मालोजीराव मोगल, मंदाकिनी कदम वगळता तालुक्यातून दुसऱ्यांदा निवडून येण्याचे भाग्य केवळ अनिल कदमांना लाभले आहे. त्यामुळे त्यांच्याकडून जनतेच्या अपेक्षा खूप आहेत. ग्रामपंचायत सदस्य ते आमदार असा राजकीय प्रवास असल्याने तळागाळातील लोकांशी कसा संपर्क ठेवायचा व निवडून येण्यासाठी कसब त्यांनी अवगत केले आहे. अभ्यासू लोकप्रतिनिधी आणि सरकारी अधिकाऱ्यांकडून काम करून घेण्याची एक वेगळी आक्रमक शैली यामुळे ते कायम चर्चेत असतात.
--
कारखान्यांचे भिजत घोंगडे
गेल्या तीन वर्षांपासून निफाड व रानवड सहकारी साखर कारखाने थकीत कर्जामुळे बंद पडले आहेत. उसाचे मोठे क्षेत्र असूनही हक्काचे कारखाने बंद असल्याने तालुक्यातल्या उत्पादकांना बाहेरील कारखान्यांचे उंबरठे झिजवावे लागतात, ही शोकांतिका आणि संतापही आहे. तालुक्याचे आमदार या नात्याने हे कारखाने सुरळीत सुरू व्हावेत, अशी अपेक्षा त्यांच्याकडून जनतेला आहे. ती रास्तही आहे. त्यासाठी अनेकदा शेतकरी, कामगार यांच्याशी बोलून, कर्जबाजारीपणाची वस्तुस्थिती मान्य करून वेगळे प्रस्ताव व विचार मांडले. पण, त्याला तालुक्यातील राजकारण आडवे येते, असा दावा ते करतात. आता मात्र माजी आमदार दिलीप बनकर हे प्रतिस्पर्धी असूनही पिंपळगाव बाजार समितीने कारखाना चालवायला घेण्यासाठी अनिल कदम यांनी सहकार्याची भूमिका दाखविली आहे.
--
पर्यटन क्षेत्रासाठी पुढाकार
निफाड येथे वन विभागाची औरंगाबाद रस्त्यालगत सात एकर जागा आहे. या जागेच्या विकासासाठी पाच कोटी रुपयांची मंजुरी घेतली आहे. या जागेत जॉगिंग ट्रॅक, लहान मुलांसाठी खेळायला बगीचा, मिनी थिएटर अशा प्रकारचे स्ट्रक्चर उभारले जाणार आहे. देश-विदेशांतील स्थलांतरित पक्ष्यांसाठी प्रसिद्ध नांदूरमध्यमेश्वर अभयारण्य व परिसरातील वन विभागाचे २०० एकर क्षेत्र यावर रेस्क्यू सेंटर करण्याचे नियोजन आहे. त्याबाबत प्रस्ताव तयार केला आहे. या भागाचा पर्यटन क्षेत्र म्हणून विकास करण्याचे नियोजन आहे. गोदाकाठ भागात बिबट्यांची मोठी दहशत आहे. त्यावरील उपाययोजनांची निकड भासत आहे.
--
या प्रश्नांकडे दुर्लक्ष
सध्या निफाड तालुक्यातील चारही दिशांचे महत्त्वाचे असलेले रस्ते पूर्णतः खराब झाले असून, खड्ड्यात रस्ते, की रस्त्यात खड्डे अशी तालुक्याची स्थिती आहे. तालुक्याला रस्त्यांसाठी मोठा निधी मिळूनही तालुका खड्डेमय आहे. त्यामुळे आमदारांनाच चौफेर टीका सहन करावी लागत आहे. सर्वांत वाईट अवस्था निफाड-पिंपळगाव रस्त्याची झाली आहे. कुंदेवाडीपासून हा रस्ता अक्षरशः उखडून गेला आहे. रस्त्याबद्दलची टीका जिव्हारी लागल्याने पॅचअप मशिनच्या साहाय्याने पिंपळगाव-निफाड रस्त्याचे खड्डे बुजविले जात आहेत. मात्र, नुसते खड्डे बुजवून पिंपळगाव रस्ता दुरुस्त होऊ शकत नाही. त्या दुरुस्तीच्या पलीकडे त्याची दुरवस्था झाली आहे, हे त्यांनी समजून घ्यायला हवे. सोबतच निसाका आणि रानवड साखर कारखाना बंद असल्याने मतदारसंघाच्या विकासालाही ब्रेक लागला आहे. तालुक्यात शिक्षण, आरोग्य, बेरोजगारीचाही प्रश्न कायम आहे. पिंपळगाव येथे पळविण्याचा प्रयत्नात असलेल्या क्रीडा संकुलला आमदार कदम यांनी निफाडला मिळवून देत न्याय दिला. मात्र, ६ ते ७ वर्षे होऊनही हे क्रीडा संकुल अजून अपूर्णावस्थेत आहे, अशी क्रीडाप्रेमींची तक्रार आहे. ही तक्रार लक्षात घेऊन क्रीडा विभागाकडून संकुलासाठी अजून निधी मिळवण्यासाठी प्रस्ताव सादर केल्याचे कदम यांनी क्रीडाप्रेमींना सांगितले, फक्त हे काम वेगाने पूर्ण व्हावे, अशी अपेक्षा व्यक्त होत आहे.
--
विधिमंडळ कामकाजात सहभाग
विधानसभा अधिवेशनात शेतकऱ्यांच्या समस्यांवर ते नेहमीच आक्रमक राहिले आहेत. कांदा, द्राक्षांच्या प्रश्नासह कर्जमाफी विषयावर त्यांचा आवाज थेट विधानसभेत घुमला आहे. सत्तेत असूनही सरकारच्या निर्णयावर विरोधात तुटून पडण्याची धमक त्यांनी विधानसभेत दाखविली आहे. शेतकरी व कर्जमाफीच्या प्रश्नावर शिवसेनेची भूमिका मांडण्याची जबाबदारी त्यांच्यावरच आहे. शेतकऱ्यांची कर्जमाफी, वीजबिले, भारनियमन, पाटाला पाणी सोडणे अशा अनेक विषयांवर आमदार अनिल कदम यांनी सरकारविरोधात आंदोलने केली, मोर्चे काढले. प्रसंगी निवेदनेही दिली. निफाड तालुक्यात वादळी व अवकाळी पाऊस, गारपीट यामुळे शेतकऱ्यांच्या झालेल्या नुकसानीची पाहणी करण्यासाठी पक्षप्रमुख उद्धव ठाकरेंना त्यांनी द्राक्षबागांमधून फिरविले होते. नुकतीच कर्जमाफी जाहीर केल्यानंतर त्याबद्दल जनतेत जाऊन संवाद साधण्यासाठीही उद्धव ठाकरेंनी दौऱ्याची सुरुवात निफाडमधून केली होती. यावरून पक्षात शेतकरी नेता अशी त्यांची प्रतिमा निर्माण झाली आहे.
--
मार्गी लावलेली कामे
-रस्त्यासाठी १७२ कोटी रुपये मंजूर
-पिंपळगाव ग्रामीण रुग्णालयासाठी २० कोटी
-समाजकल्याण वसतिगृहासाठी ७ कोटी
-निवासी शाळांसाठी ७ कोटी
-ओझर-सायखेडा-पंचाळे रस्त्यासाठी २.९ कोटी
-निफाडच्या रेल्वे उड्डाणपुलसाठी ११ कोटी
-ओझर बसस्थानकासाठी १ कोटी
-महावितरणकडून ८१ कोटी मंजूर
---
आमदार म्हणतात...
--
विकासकामांना धोरणांची खीळ
सत्ताधारी पक्षातील आमदार या नात्याने जनतेच्या माझ्याकडून असणाऱ्या अपेक्षा रास्त आहेत. त्या सोडविण्याचा प्रामाणिक प्रयत्न मी तीन वर्षांपासून करतोय. पण, आमच्या पक्षाला सत्तेत दुय्यम स्थान आहे, ही वस्तुस्थिती सर्वांना माहिती आहे. शिवाय सरकारची काही धोरणे ही सामान्य जनता व शेतकरी यांच्या विरोधात असल्याने सत्तेत असूनही आंदोलन करायची वेळ आमच्यावर येते. तालुक्यातील रस्त्यांची परिस्थिती खराब आहे, हे मला मान्य आहे. या सर्व रस्त्यांच्या दुरुस्तीच्या कामांना मंजुरी मिळालेली असून, निधीही आला आहे. कामाचे खूप नियोजन आहे. पण, सरकारचे धोरण आडवे येत आहे. पण, तरीही कामांचा वेग कमी होऊ देणार नाही.
-अनिल कदम, आमदार, निफाड
----------
विरोधक म्हणतात...
--
जनतेचा भ्रमनिरास
निफाडच्या जनतेने सलग दुसऱ्यांदा माझ्याविरोधात निवडून दिलेल्या आमदार अनिल कदम यांच्याकडून जनतेचा भ्रमनिरास झाला आहे. त्यामुळेच त्यांचे अनेक कार्यकर्ते आपल्याकडे आले आणि काही संपर्कात आहेत. मागच्या पंचवार्षिकमध्ये विद्यमान आमदार कदम यांच्याकडे लोक समस्या घेऊन गेल्यावर ते म्हणायचे, की सरकार आपले नाही, त्यामुळे कामे होत नाहीत. आता मात्र ते सत्ताधारी पक्षाचे आमदार आहेत, तरीही मतदारसंघाची काय परिस्थिती आहे, हे लोकांना माहिती आहे. तालुक्यातल्या सगळ्या रस्त्यांची चाळण झाली आहे. निफाड-पिंपळगाव तर रस्ता म्हणावा की पायवाट इतकी वाईट अवस्था झाली आहे. ओझर, निफाड, सुकेणे, गोदाकाठ अशा सर्व महत्त्वाच्या रस्त्यांची वाट लागली आहे. शेतकऱ्यांचा विजेचा प्रश्न आहे. तीन-तीन दिवस शेतीपपांना वीज नसते. शेतकऱ्यांना पिकांना पाणीही देता येत नाही. तालुक्याचे सत्ताधारी आमदार या नात्याने अधिकाऱ्यांकडे बसून शेतकऱ्यांच्या समस्या सोडविण्याऐवजी ते आंदोलने, मोर्चे काढतात, निवेदने देतात. त्यामुळे जनतेला कोडे पडले आहे. भाजप-शिवसेनेच्या सरकारने नोटाबंदी, जीएसटी, महागाई, शेतकऱ्यांची कर्जमाफी फसवणूक अशा अनेक बाबतींत विश्वासघात केला आहे. निफाड मतदारसंघातही कोणतेही ठोस आणि डोळ्यांना दिसेल असे काम झालेले नाही. त्यामुळे विद्यमान आमदारांना निफाडची जनता वैतागली आहे.
-दिलीप बनकर, माजी आमदार, राष्ट्रवादी काँग्रेस
---
शब्दांकन ः सुनील कुमावत
मोबाइल अॅप डाउनलोड करा आणि राहा अपडेट
