त्रिपुरारी पौर्णिमेनिमित्त शुक्रवारी इंद्रकुंड देवस्थानात सहस्रदीप प्रज्वलित करण्यात आले होते. त्यामुळे हा परिसर झगमगला होता. सनईचे मंजुळ स्वर, दिव्यांचे तेज, विलोभनीय रांगोळी, दरवळणारा अगरबत्तीचा सुवास यामुळे वातावरण भक्तिपूर्ण झाले होते.
त्रिपुरारी पौर्णिमेनिमित्त शिव मंदिरात त्रिपूर वाती लावण्याची परंपरा असून, यादिवशी शंकराने तीन असुरांचा वध केला, अशीही आख्यायिका आहे. त्यामुळे यादिवशी शिव मंदिरात त्रिपूर वाती लावल्या जातात. मंदिरावर दिव्यांची रोषणाई करण्याचीही परंपरा आहे. यावेळी मंदिरासमोर असलेल्या दीपमालेच्या प्रकाशात मंदिर उजळून निघते.
नाशिक शहरात शुक्रवारी विविध ठिकाणी दीपोत्सव साजरा करण्यात आला. मालेगाव स्टॅँड येथे असेल्या इंद्रकुंड परिसरात सकाळपासून दीपोत्सवाची तयारी करण्यात आली होती. परिसर स्वच्छ करण्यात आला. परिसरातील महिलांनी संपूर्ण मंदिराच्या आवारात रांगोळी रेखाटली होती. सायंकाळी सहानंतर दीपोत्सवाला सुरुवात झाली. येथील कार्यक्रमाची सुरुवात पंचवटी पोलिस स्टेशनचे निरीक्षक दिनेश बर्डेकर, बीएपीएल स्वामी नारायण संस्थांनचे संत श्रुती वल्लभ स्वामी व गुरू मंगल स्वामी यांच्या हस्ते आरतीने करण्यात आली. संपूर्ण परिसरात दिवे लावण्यात आले होते. गुरुमित बग्गा, रवी कुलकर्णी, सागर जाधव, देवेंद्र पटेल, सुधाकर नेवे आदींनी या कार्यक्रमाचे आयोजन केले.
दरम्यान, मुरलीधर गल्लीत सिद्धेश्वर महादेव मंदिरात शंकराला अर्धनारी नटेश्वराचा मुखवटा लावून विविध फळे व फुलांची आरास करण्यात आली. धार्मिक विधी व दूध वाटपाचा कार्यक्रम झाला. येथेही पणत्यांची रोषणाई करण्यात आली होती. नाशिककर मोठ्या संख्येने उपस्थित होते.
तुळशीविवाह थाटात
पंचवटी ः नवीन आडगाव नाका येथील युवक मित्रमंडळातर्फे स्वामिनारायणनगरमध्ये शुक्रवारी तुळशीविवाह सोहळा थाटात झाला. तुळशीविवाहाविषयी संत जनार्दन स्वामी आश्रमाचे विश्वस्त भाऊ पाटील यांचे प्रवचन झाले. या सोहळ्यास ब्रह्माकुमारी ईश्वरीय विश्वविद्यालयाच्या राजयोगिनी ब्रह्माकुमारी वासंतीदीदी, जनार्दन स्वामी आश्रमाचे संतोषगिरी महाराज, पंचमुखी हनुमान मंदिराचे भक्तीचरणदास महाराज, लक्ष्मीनारायण मंदिराचे उमेश महाराज आदी उपस्थित होते. कपालेश्वर मंदिरात विष्णुयागाची सांगता झाली. आज, शनिवारी शंकर-पार्वतीच्या रुपात कपालेश्वराची पूजा करण्यात येणार आहे. सायंकाळी शौनकाश्रमात महाप्रसादाचा कार्यक्रम होईल.
मोबाइल अॅप डाउनलोड करा आणि राहा अपडेट
