पंचवटी येथील फुलेनगर भागात असलेल्या मायको दवाखान्यात महिलेची दवाखान्याबाहेर प्रसुती झाल्यानंतर प्रशासनाने दोषीवर कारवाई केली असून पाच परिचारिका व एक वैद्यकीय अधिकारी यांना निलंबित करण्यात आले आहे. दोन सुरक्षारक्षकांनाही बडतर्फ करण्यात आले असल्याची माहिती आरोग्याधिकारी डॉ. विजय डेकाटे यांनी दिली.
सोमवारी झालेल्या घटनेनंतर वद्यकीय अधिकारी आरती चिरमाडे यांच्या मार्गदर्शनाखाली अहवाल तयार करण्यात आला. त्यावर चर्चा होऊन मंगळवारी दोषींवर कारवाई करण्यात आली. चिरमाडे यांनी डॉ. विजय डेकाटे यांना दिलेल्या अहवालात म्हटले आहे की, एक महिला प्रसुतीसाठी सकाळी ११.३० वाजता मायको दवाखान्यात आली. त्यावेळी ड्युटीवर असलेल्या परिचारिका सरला रुपवते यांनी तिची तपासणी केली व जास्त पोट दुखल्यावर ये, असे सांगून महिलेला परत पाठवण्यात आले. त्यानंतर दुपारी २ वाजता ती महिला पुन्हा पोट दुखत असल्याने दवाखान्यात आली. त्यावेळी दवाखान्यात कोणताही कर्मचारी हजर नव्हता, तर या दवाखान्यात असलेले दोन सुरक्षारक्षक गच्चीवर पतंग उडवत होते. यावेळी ड्युटीवर असलेल्या परिचारिका सरला रुपवते व मनिषा शिंदे या आपली ड्युटी संपण्याच्या आधी व नंतर येणाऱ्या परिचारिका श्रीमती ठाकूर यांना पदभार न देता परस्पर निघून गेल्या. परिचारिका ठाकूर यासुध्दा दोन वाजता येण्याच्या ऐवजी सव्वातीनला दवाखान्यात आल्या. तसेच या ठिकाणी कार्यरत असलेले वैद्यकीय अधिकारी डॉ. हिरामण कोकणे हे आपल्या वरिष्ठांना न सांगता कामावर गैरहजर होते. हा सर्व प्रकार घडत असताना आजूबाजूचे नागरिक घटनास्थळी दाखल झाले व दवाखान्याच्या बाहेरच असलेल्या एका रिक्षात दवाखान्यातील आया श्रीमती देसले यांच्या देखरेखीखाली प्रसुती करण्यात आली. झालेला प्रकार गंभीर असल्याने वैद्यकीय अधिकारी डॉ. हिरामण कोकणे, परिचारिका बी. जी. कोठारी, परिचारिका ए. के. देशमुख, सरला रुपवते, मनीषा शिंदे, एम. एम. ठाकूर यांना निलंबित करण्यात आले असून, दोन सुरक्षा रक्षकांना बडतर्फ करण्यात आले आहे.
तक्रारीची दखल नाही
या दवाखान्यात असे प्रकार वारंवार घडत असून, कितीही वेळा तक्रार केली तरीही परिस्थिती पहिल्यासारखीच होते, अशी तक्रार या भागातील नागरिकांनी केली आहे. नागरिकांच्या म्हणण्यानुसार महापालिकेचे कर्मचारी कधीही या ठिकाणी नसतात. पेशंट आल्यावर त्याला खासगी दवाखान्यात जा, असा सल्ला देण्यात येतो. एकाच वेळी सर्व कर्मचारी दवाखान्यात नसणे हा धक्कादायक प्रकार असून, कर्मचारी कुठे गेले होते, याचा तपास करावा असी मागणी नागरिकांनी केली आहे.
मोबाइल अॅप डाउनलोड करा आणि राहा अपडेट