किचनचे बजेट कोलमडले
यंदा दमदार मॉन्सूननंतर परतीच्या पावसाने तडाखा दिल्याने भाजीपाला पिकांची नासाडी झाली. परिणामी दिवाळीच्या पार्श्वभूमीवर सध्या भाज्यांची मागणी जास्त नसली, तरीही आवकेत घट झाल्याने भाज्यांचे दर मात्र गगनाला भिडले आहेत. २० ते ४० रुपये किलोप्रमाणे विक्री होणाऱ्या भाजीपाल्याची ६० ते ७० रुपयांप्रमाणे विक्री सुरू आहे. मेथी, शेपू, पालक यांसारख्या नाशवंत पालेभाज्यांचे दरदेखील कडाडले आहेत. भाजीपाल्याच्या या तडक्यामुळे सर्वसामान्य गृहिणींचे किचनचे बजेटच कोलमडल्याचे दिसून येत आहे. यासंदर्भातील स्थितीवर टाकलेला फोकस...
--
बाजार समिती, पंचवटी
--
आवकेत घट, चढ्या दराचे भांडवल
---
नाशिक कृषी उत्पन्न बाजार समितीत भाजीपाल्याची आवक घटली असून, ऐन दिवाळीत भाजीपाल्याचे दर वाढले होते ते आता काहीसे स्थिर झाले आहेत. मात्र, दिवाळीत वाढलेल्या दराचे भांडवल करीत किरकोळ विक्रेत्यांनी बाजार समितीच्या भावापेक्षा जास्त चढ्या दराने भाजीपाल्याची विक्री सुरू केली आहे. पंचवटीतील नीलगिरीबाग, म्हसरूळ, कोणार्कनगर, पेठरोड, दिंडोरीरोड, गंगाघाट या भागातील किरकोळ विक्रीत कोणतीही भाजी १५ ते २० रुपये पाव किलो या दरात म्हणजे ६० ते १०० रुपये किलो अशी विक्री होत आहे. बाजार समितीतील लिलावाच्या दरात आणि या दरात मोठी तफावत आहे. लिलावात विक्रीस येणाऱ्या भाजीपाल्याची खरेदी दर्जानुसार केली जाते. मात्र, किरकोळ विक्रीवेळी कसाही दर्जा असला, तरी दर कमी होत नाही.
लिलावातील सोमवारचे दर
--
भाजी.......आवक (क्विंटलमध्ये)...........दर (प्रतिकिलो).....किरकोळ
टोमॅटो..................१५५७८................................१२ ते २५.......२० ते ३०
वांगी.....................११२०.................................२५ ते ५५.......४० ते ७०
फ्लॉवर.................१०७०..................................२० ते ३०........३० ते ६०
कोबी....................४६५०..................................२० ते ४०.......४० ते ८०
ढोबळी मिरची........१६२०..................................४० ते ७५......७० ते ९०
दुधी भोपळा............३१५०.................................२० ते ४०....४० ते ७०
कारली...................३६२०..................................१५ ते २५....२५ ते ५०
दोडका...................१०२०..................................२५ ते ४५.....५० ते ७०
गिलके..................३१०.....................................२० ते ३०....४० ते ८०
भेंडी.....................११०......................................३० ते ५०....५० ते ८०
गवार....................५.........................................४० ते ६०....६० ते ९०
डांगर....................१०........................................२५ ते ७५...८० ते ९०
काकडी.................४१५०......................................२० ते ३५...४० ते ६०
---------
पालेभाजी .........आवक (जुडी).............दर (प्रतिजुडी)...किरकोळ
कोथिंबीर...........५०००..........................८० ते १५०.......१०० ते २००
मेथी.................२०००...........................२५ ते ३५......४० ते ७०
शेपू...................१५००...........................२० ते २५......४० ते ६०
कांदापात...........३०००............................२० ते ३०......४० ते ७०
आडगाव
--
जुडीची विभागणी करून विक्री
--
घाऊक बाजारातील दरांप्रमाणेच असंख्य ग्राहक भाजीपाला मागतात, असे परिसरातील किरकोळ विक्रेते सांगतात. त्यामुळे आमच्याकडेदेखील माल पडून राहत असून, तोटा सहन करावा लागत असल्याने आम्ही एका जुडीचे दीड किंवा दोन भाग करून किरकोळ बाजारात विक्री करतो. त्यामुळे काही भाज्या खराब झाल्यास आमचा तोटा कमी होतो अन् बऱ्याच ग्राहकांची मागणीदेखील कमी असल्याने असल्याने त्यांनादेखील भाज्या देता येतात. १० ते १५ रुपये किलोने विक्री होणाऱ्या टोमॅटोची चाळीस ते पन्नास रुपयांनी विक्री सुरू आहे. परतीच्या पावसाने शेतमालाची नासाडी झाली आहे. त्यामुळे आता नवीन माल बाजारात येईपर्यंत भाज्यांचे दर असेच कायम राहणार असल्याचे विक्रेते सांगतात.
--
किरकोळ बाजारातील दर
भाजी- रुपये किलो
--
गवार १०० ते १२०
भेंडी ६० ते ७०
वांगी ५० ते ६०
कारली ५० ते ६०
दोडके ६० ते ७०
कोबी ५० ते ७०
घेवडा ८० ते १००
टोमॅटो ४० ते ५०
फ्लॉवर ५० ते ६०
काकडी ३० ते ४०
----
देवळाली कॅम्प
--
ताटातील भाज्यांत घट!
--
देवळालीच्या भाजीबाजारात गवार, कोथिंबीर, मेथी आदी भाज्यांचे दर दुप्पट झाल्याने स्वयंपाक करायचा कसा, असा पेच गृहिणांना पडला आहे. आधी पावसामुळे अन् आता महागाईमुळे सर्वसामान्यांच्या ताटातील भाज्या घटत आहेत. दरवाढ गगनाला भिडल्याने व्यापाऱ्यांसह ग्राहकवर्गातही असंतोष असून, भाव पुन्हा कमी होण्यासाठी साधारण अडीच महिन्यांनंतर येणाऱ्या नव्या उत्पादनाची प्रतीक्षा नागरिकांना करावी लागणार आहे. देवळाली परिसरात लष्करी भागातील जवान व त्यांचे कुटुंबीय खरेदीसाठी येत असतात. तेदेखील एवढी भाववाढ या दिवसांत कधी पाहिली नसल्याचे सांगतात. शेतकऱ्यांना काही उत्पादनांमागे खर्च वजा जाता हाती शंभर-दोनशे रुपये, तर व्यापारीवर्गाला किलोमागे दोन ते पाच रुपये मिळतात. आगामी काळात कांद्याचे भाव अजून वाढण्याची चिन्हे आहेत.
--
किरकोळ बाजारातील दर
भाजी- रुपये किलो
--
मिरची – ६०
गवार – ८०
भेंडी -६०
वांगी -६०
ढोबळी मिरची- ८०
कांदा -४०
तोंडली-६०
लसूण - ८०
दोडके -५०
कारले -५०
टोमॅटो -३०
गिलके-४०
वाल -६०
बटाटा-१२
लिंबू -५०
गाजर-६०
आले -६०
घेवडा-६०
डांगर -३०
काकडी -३०
फ्लॉवर - २५ रुपये नग
कोबी -२० रुपये नग
भोपळा -२० रुपये नग
--
पालेभाजी – रुपये जुडी
मेथी – २५
शेपू – १५
पालक -२०
कोथिंबीर -५०
कांदापात- २०
तांदूळका -१०
पुदिना जुडी १०
मुळा २०
बीट २०
----
कळवण
--
ग्राहक, व्यावसायिकही हवालदिल
--
तालुक्यात भाजीपाला उत्पादन मोठ्या प्रमाणात होत असते. मात्र, तरीही सध्या ६० रुपये किलोंच्या दराखाली कुठलीही भाजी मिळत नसल्याची स्थिती आहे. उत्पादनावर झालेला परिणाम व कळवण तालुक्यात अपेक्षित मार्केट नसल्यामुळे ग्राहकांप्रमाणेच बाहेरून माल भरणारे छोटे व्यावसायिकही हवालदिल झाले आहेत. भाजीपाला उत्पादन व खर्च याचा ताळमेळ स्थानिक पातळीवर बसत नसल्याने बाहेरच्या मार्केटमध्ये विक्रीसाठी माल पाठवावा लागतो. येथे चार महिने मिरची मार्केट जोमात चालते. सर्वाधिक दर हिरव्या वांग्यांना प्रति १० किलो १ हजार रुपये, अर्थात १००रुपये किलो उपलब्ध होतो, तो सध्या १२०,१३० रुपये किलो आहे.
--
खरेदी अन् विक्रीची स्थिती
--
कोबी ः शेतकरीवर्गाकडून २५ रुपयांना मिळत असून, कळवण भाजी बाजारात ३०, ३५ रुपये किलोने विक्री होत आहे.
फ्लॉवर ः ५५ रुपये खरेदी, ७०, ८० रुपये किलोने विक्री.
वांगी ः १३०० रुपयांत क्रेट, २५, ३० रुपये पावकिलोने विक्री.
कांदा ः भाजीबाजारात उपलब्धच होत नाही.
बटाटे ः ९०० रुपये क्विंटल खरेदी, १५ रुपये किलोने विक्री.
भेंडी ः ३० रुपये किलोने उपलब्ध, ४० रुपये किलोने विक्री.
गवार ः खरेदी ८० रुपये किलो, विक्री १२० रुपये
गिलके ः खरेदी ३५, ४० रुपये किलो, ६०, ७० रुपये किलोने विक्री.
कारले ः खरेदी ३५, ४० रुपये किलो, ६०, ७० रुपयांना विक्री.
काकडी ः खरेदी १५, २० रुपये किलो, ३० रुपयांना विक्री.
टोमॅटो ः खरेदी ३० रुपये किलो, ४० रुपये किलोने विक्री.
----–---------
मनमाड
--
...तर तुम्हाला काय देणार?
--
दिवाळीपासूनच भाज्यांच्या किमती वाढल्याने सर्वसामान्यांना त्याचा मोठा फटका बसत आहे. मनमाड शहर व चांदवड, नांदगावमध्ये भाज्यांचे भाव कडाडल्याचे दिसत असून, मंगळवारी भाज्यांचे दर दुपटीने वाढल्याने सामान्य नागरिकांत नाराजीचा सूर दिसून आला. मनमाड बाजारात एरवी ५ ते ५ रुपयांना मिळणारी कोथिंबीर जुडी १५ ते २० रुपयांनी विकली जात होती. पालेभाज्यांमध्ये शेपू, पालक, मेथीचे भाव वाढल्याचे चित्र असून, १० रुपयांना मिळणारी जुडी २० ते २२ रुपयांना मिळत असल्याने सर्वसामान्यांच्या खिशाला फटका बसत असल्याचे चित्र आहे. फ्लॉवर ५० रुपये किलो, शिमला मिरची ४० रुपये किलोने विक्री होत आहे. आम्हालाच मालासाठी जास्त पैसे मोजावे लागत आहेत. आधीच्या कमी भावात देणे परवडत नाही, तर तुम्हाला काय देणार, असा सवाल भाजीविक्रेत्यांकडून ग्राहकांना केला जात आहे.
---
सटाणा
--
किलोच्या भावात पावकिलो!
--
शहरातील भाजीमंडईत भाजीपाल्याचे दर आकाशाला गवसणी घालू लागल्याने सर्वसामान्य महिला व गृहिणींमध्ये कमालीची नाराजी दिसून येत आहे. किलोच्या दराचे भाव पावकिलोकरिता मोजावे लागत असल्याने तीव्र संताप व्यक्त होत आहे.
शहरातील बस स्थानकामागे भरणाया दैनंदिंन भाजी मंडईत भाजीपाल्यांचे सद्यस्थितीत आकाशाला भिडल्याने विक्रेते व ग्राहकांमध्ये संभ्रम दिसून येत आहे. भाजी मंडईत वांगी ४० रुपये पाव, तर १६० रुपये किलो दराने विक्री होत आहेत. गिलके, दोडके, भेंडी ३० रुपये पाव, तर १२० रुपये प्रतिकिलो दराने विक्री होत आहे. टोमॅटो १५ रुपये पाव, तर ६० रुपये किलो दराने मिळत आहेत.मेथीची जुडी २० रुपये, तर कोथिंबिरीच्या बोटांवर मोजण्याइतक्या काड्यांची जुडी २५ रुपयांना विकली जात आहे. गेल्या पंधरवड्यात हाच भाजीपाला ४० ते ५० रुपये किलो दराने मिळत होता. आता अचानक झालेल्या वाढीमुळे सर्वसामान्य गृहिणी तर कमालीच्या धास्तावल्या आहेत. भाजीपाल्याच्या दरवाढीमुळे महिलांकडून आता कडधान्ये, डाळी, मठा, मुगाला पसंती दिली जात आहे.
--
दिवाळीत घरी भरपूर पाहुणे आल्याने भाजीपाला जास्त लागत आहे. त्यातच भाजीपाल्याच्या किमती दुपटीने वाढल्याने आर्थिक फटका बसत आहे. पालेभाज्यांचे भावदेखील वाढले असल्याने किचनचे बजेटच कोलमडले असून, आता कोणत्या भाज्या घरी न्याव्यात, असा प्रश्न पडला आहे.
-रोहिणी विधाते, गृहिणी, मनमाड
--
यंदा परतीच्या पावसाने शेतकऱ्यांना चांगलेच जेरीस आणले. त्यामुळे भाजीपाल्यात दरवाढ होणे अपेक्षित होते. त्यानुसार दरवाढ झाली असून, आगामी दोन-अडीच महिन्यांनंतर भाजीपाल्याचे दर उतरतील, अशी अपेक्षा आहे. मात्र, तोपर्यंत दर चढेच राहण्याची शक्यता आहे.
-दीपक शिरसाठ, भाजीपाला विक्रेते, देवळाली
--
दिवसेंदिवस होणाऱ्या दरवाढीमुळे सर्वसामान्य ग्राहकांच्या खिशालाच कात्री लागत असून, साधा भाजीपालादेखील प्रचंड महाग झाला आहे. इतर ठिकाणांहून आवक वाढवावी किंवा काय करता येईल यासंदर्भात प्रशासकीय पातळीवरून कोणतीही हालचाल होत नसल्याने आश्चर्य वाटते.
-मंगेश मुसळे, ग्राहक, देवळाली
--
कळवण तालुक्यात भाजीपाला मार्केट प्रभावीपणे नाही. येथील किरकोळ भाजीपाला विक्रेत्याला तुटपुंज्या स्वरूपात माल उपलब्ध होतो. आगामी दोन-तीन महिने अशीच स्थिती राहण्याची चिन्हे आहेत. उत्पादनवाढीसाठी प्रयत्न होतील तेव्हाच बाजारभाव स्थिर व पूर्ववत होऊ शकतील.
-जब्बार शेख, भाजीपाला विक्रेते, कळवण
--
(संकलन ः रामनाथ माळोदे, अभिजित राऊत, प्रशांत धिवंदे, दीपक महाजन, संदीप देशपांडे, कैलास येवला)
मोबाइल अॅप डाउनलोड करा आणि राहा अपडेट
