म. टा. खास प्रतिनिधी, नाशिक
सुखमय जीवनाची मंगलकामना घेऊन आलेल्या दीपावलीने सध्या सर्वत्र चैतन्य संचारले असून, शहरात मंगळवारी धनत्रयोदशी उत्साहात साजरी करण्यात आली. धन्वंतरी देवतेचे पूजनही करण्यात आले.
धनत्रयोदशीला सोने खरेदी केल्यास धनसमृद्ध होते, असे मानले जात असल्याने सोने-चांदी खरेदीलाही अनेकांकडून पसंती देण्यात आली. अश्विन वद्य त्रयोदशी अर्थात, धनत्रयोदशीनिमित्त वस्त्रालंकाराची खरेदी, तसेच उपवास करण्यात आला. घरातले द्रव्य व अलंकार पेटीतून काढून पूजन करण्याकडे अनेकांचा कल दिसून आला. सायंकाळी तिळाच्या तेलाचे दिवे लावत त्याच्या वातीचे टोक दक्षिणेला ठेवून यमदीपदान करण्यात आले. घराघरांत धने व पत्री खडीसाखर देवासमोर ठेवण्यात आली. हिशेबाच्या नव्या वह्यांचा वापर या दिवसापासून सुरू करण्याची परंपरा यंदाही व्यापारी बांधवांनी जोपासली.
घरोघरी कुबेर, विष्णू, लक्ष्मी, योगिनी, गणेश, नाग आणि द्रव्यनिधी यांची पूजा करून नैवेद्य दाखविण्यात आला. नागरिकांकडून यथाशक्ती दानही करण्यात आले. धनत्रयोदशीला अनेकांनी सायंकाळी दिवा तेलाने भरून त्याची पूजा केली आणि तो दाराजवळ, धान्याच्या राशीजवळ ठेवला.
भागवत पुराणात विष्णू भगवानांच्या चोवीस अवतारांत धन्वंन्तरी भगवानाचा समावेश करण्यात आला आहे. मंगळवारी धन्वंतरी देवतेचे पूजनही करण्यात आले. धन्वंतरीपूजनप्रसंगी सर्वांना दीर्घायुष्य आणि आरोग्य लाभावे, अशी कामना करण्यात आली. साळीच्या लाह्या, बत्तासे, धने, गुळ असा प्रसाद वाटण्यात आला. काहींनी कडुनिंबाच्या पानांचे बारीक तुकडे आणि साखर प्रसाद म्हणून वाटली.
‘नाशिकच्या भूमीत साकारावे मंदिर’
सुशीला चिकित्सालयाला २५ वर्षे पूर्ण झाल्यानिमित्त चांदीचे धन्वंतरीचे नाणेही मान्यवरांच्या हस्ते प्रकाशित करण्यात आले. भगवान धन्वंतरी यांचे मंदिर नाशिकच्या भूमीत व्हावे आणि ते सर्व आरोग्यरक्षकांचे श्रद्धास्थान व्हावे, अशी इच्छा डॉ. माधवनाथ महाराज यांनी व्यक्त केले. या पूजनाच्या वेळी डॉ. राजेंद्र खडे, नवनाथचे बाबा देशमुख, प्रकाश पाटील, वैभव कुळकर्णी, नंदू पवार, फेरोज मणियार, विविध वैद्यगण, आयुर्वेद औषधनिर्माते आणि विक्रेते उपस्थित होते.
मोबाइल अॅप डाउनलोड करा आणि राहा अपडेट