अंबड लिंकरोडवर असलेल्या अनधिकृत भंगार बाजाराचे अतिक्रमण काढताना रोजच नवीन किस्से समोर येत आहेत. खाडी भागात असलेल्या आझादनगर येथे एका भंगार व्यावसायिकाने तब्बल साठ ट्रक स्क्रॅप चपला साठविल्या होत्या. आता या चपला येथून उचलण्याचे आव्हान महापालिकेपुढे आहे.
या चपला येथून हलविण्यासाठी अधिकाऱ्यांच्या म्हणण्यानुसार दोन लाख रुपये खर्च येणार आहे. परंतु, संबंधित भंगार व्यावसायिकाला नाममात्र दंड होणार आहे. आझादनगर येथे एका भंगार व्यावसायिकाने तब्बल साठ ट्रक स्क्रॅप चपला साठवून ठेवल्या होत्या. महापालिकेच्या अतिक्रमण विभागाने दोन जेसीबी लावून या सर्व चपला खत प्रकल्पावर टाकल्या आहेत. पावसाळ्याचे दिवस असल्याने भंगार व्यावसायिकाने चपलांचा साठा केला होता. पावसाळ्यानंतर वीटभट्टी चालकांकडून भट्टीत जाळण्यासाठी या चपला खरेदी केल्या जातात. कोळशाचे भाव परवडत नसल्याने बहुतांश वीटभट्टीचालक चपलांचा वापर विटा भाजण्यासाठी करतात, असे या जाणकारांचे म्हणणे आहे.
हटविण्यासाठी दोन लाख खर्च, दंड नाममात्र!
या चपला उचलण्यासाठीचा खर्च महापालिकेच्या तिजोरीतून होणार आहे. तथापि, ज्याने चपला साठविल्या त्या व्यावसायिकाला नाममात्र दंड होणार असल्याचे अधिकाऱ्यांनी सांगितले. महापालिकेकडून या व्यावसायिकांच्या फायद्याचा विचार केला जात असल्याचे नागरिकांचे म्हणणे आहे. शिवाय, अतिक्रमण काढताना एका कोळसा डेपोचालकाला पहिल्याच दिवशी सगळा कोळसा क्लब हाऊसवर टाकण्यास सांगितले जाते, तर दुसऱ्या कोळसा डेपोचालकास कोळसा उचलण्यास तीन दिवस मुदत दिली जाते, असा दुजाभाव का, असाही प्रश्न विचारला जात आहे.
मोबाइल अॅप डाउनलोड करा आणि राहा अपडेट
