गेल्या अनेक महिन्यांपासून पडायला झालेले देवळालीगावातील बाबू गेणूरोडवरील जुने धोकादायक घर शनिवारी मध्यरात्रीच्या सुमारास कोसळले. या घराचा काही भाग शेजारील घरावर कोसळल्याने या घराचेही नुकसान झाले आहे. सुदैवाने या दुर्घटनेत कोणतीही जीवित हानी झाली नसली, तरी यामुळे देवळालीगाव व परिसरातील धोकादायक घरांचा प्रश्न एेरणीवर आला आहे.
देवळालीगावात धोकादायक व मोडकळीस आलेल्या जुन्या घरांची संख्या मोठी आहे. अशी घरे केव्हाही कोसळण्याची शक्यता आहे. मात्र, अशी धोकादायक घरे मोठ्या प्रमाणात असूनही महापालिका प्रशासनाचे अशा घरांकडे होत असलेले दुर्लक्ष नागरिकांच्या जिवावर बेतण्याची शक्यता निर्माण झाली आहे. या धोकादायक जुन्या घरांमुळे आजूबाजूच्या रहिवाशांच्या जिवाला धोका निर्माण झालेला असूनही महापालिका प्रशासन मात्र या जुन्या घरांच्या प्रश्नाकडे डोळेझाक करीत असल्याचा आरोप नागरिकांकडून केला जात आहे.
महापालिकेच्या अशा दुर्लक्षाच्या पार्श्वभूमीवरच देवळालीगावातील बाबू गेणूरोड ते भागवत गल्ली, अहिल्यामातारोड यादरम्यान असलेले निवृत्ती सहाणे यांच्या मालकीचे जुने घर शनिवारी मध्यरात्रीच्या सुमारास कोसळले. हे जुने घर शेजारच्याच घरावर कोसळल्याने चंदू वराडे यांच्या मालकीच्या जुन्या घराचेही मोठे नुकसान झाले. सुदैवाने या दुर्घटनेत कोणीही जखमी झाले नाही. ही दुर्घटना रात्रीच्या ऐवजी दिवसा घडली असती, तर मात्र या घराजवळील रस्त्याने जाणाऱ्या प्रवाशांच्या जिवाला धोका निर्माण झाला असता.
पालिकेला दिली होती माहिती
शनिवारी मध्यरात्री कोसळलेल्या या जुन्या व धोकादायक घराबाबत स्थानिक नागरिकांनी महापालिकेच्या विभागीय अधिकाऱ्यांना महिनाभरापूर्वीच लेखी अर्जाद्वारे माहिती दिली होती. या धोकादायक व मोडकळीस आलेल्या घराच्या प्रश्नाकडे महापालिका प्रशासनाने तरीही दुर्लक्ष केल्याने उपाययोजना होण्यापूर्वीच हे जुने घर कोसळले. अशी अनेक धोकादायक घरे देवळालीगाव व परिसरात आहेत. मात्र, महापालिका प्रशासन या धोकादायक घरांच्या प्रश्नावर मूग गिळून आहे. परिणामी देवळालीगावातील नागरिक धोकादायक इमारतींमुळे धास्तावले आहेत. या दुर्घटनेची माहिती स्थानिक नागरिकांनी महापालिकेच्या संबंधित अधिकाऱ्यांना देऊनही सुटीचे कारण पुढे करून महापालिकेचे कोणीही जबाबदार अधिकारी या घटनेची चौकशी करण्यासाठी आले नाहीत. त्यामुळे स्थानिक नागरिकांतून संताप व्यक्त करण्यात येत आहे.
पावसाने वाढला धोका
सध्या परतीचा पाऊस कोसळत असल्याने धोकादायक व जुनी घरे कोसळण्याचा धोका आणखी वाढला आहे. देवळालीगावातील अशा अनेक जुन्या व धोकादायक घरांत कोणीही वास्तव्याला नाहीत. संबंधित घरांचे मालकही इतरत्र वास्तव्याला आहेत. त्यामुळे अशा धोकादायक घरांपासून शेजारच्या कुटुंबांतील नागरिकांच्या जीवितास जास्त धोका निर्माण झाला आहे. महापालिका प्रशासनाने या प्रश्नाची दखल घेऊन गावातील धोकादायक घरांच्या मालकांना कायदेशीर नोटिसा देऊन या धोकादायक घरांप्रश्नी उपाययोजना करण्याची मागणी नागरिकांनी केली आहे.
--
देवळालीगावात मोडकळीस आलेल्या धोकादायक घरांची संख्या मोठी आहे. अशी अनेक घरे कोणत्याही क्षणी कोसळण्याची शक्यता आहे. महापालिका प्रशासन या प्रश्नाची दखल घेत नाही.
-प्रकाश गोहाड, स्थानिक रहिवासी
मोबाइल अॅप डाउनलोड करा आणि राहा अपडेट
