नाशिक ः शहर व ग्रामीण भागात सुरू झालेल्या अनियमित वीज भारनियमनाविरोधात जनतेतील वाढता रोष पाहून राज्यातील सत्ताधारी पक्ष असलेल्या शिवसेनेसह काँग्रेस आणि राष्ट्रवादीदेखील रस्त्यावर उतरले आहेत. शनिवारी या तिन्ही पक्षांतर्फे महावितरण कंपनीविरोधात आंदोलने करण्यात आली. शिवसेनेने जनआंदोलन छेडण्यासह महावितरणला टाळे ठोकण्याचा इशारा दिला असून, शहर काँग्रेसतर्फे कॅन्डल मार्च काढण्यात आला, तर राष्ट्रवादीतर्फे महावितरणच्या कार्यालयासमोर घोषणाबाजी करण्यात आली. त्यामुळे आगामी दिवसांत हा प्रश्न हातघाईवर येण्याची चिन्हे आहेत.
-----
...तर महावितरणला टाळे!
म. टा. खास प्रतिनिधी, नाशिक
महावितरण कंपनीच्या नाकर्तेपणामुळे सुरू असलेले शहरी व ग्रामीण भागातील भारनियमन रद्द न केल्यास जनआंदोलन छेडण्यात इशारा शिवसेनेतर्फे देण्यात आला. तातडीने भारनियमन रद्द न झाल्यास महावितरणाच्या कार्यालयांना टाळे ठोकण्यात येईल व अभियंत्यांना कोंडून ठेवण्यात येईल, असा इशारा शिवसेनेच्या शिष्टमंडळाने शनिवारी महावितरणच्या अधिकाऱ्यांना दिला.
दिवाळीच्या तोंडावर शहरामध्ये नागरिकांसह व्यापारी व लघु उद्योजकसुद्धा भारनियमनामुळे अडचणीत आले असून, उत्पादन व बाजारपेठ यांना मोठ्याप्रमाणात फटका बसत आहे. सोबतच ग्रामीण भागात शेतकऱ्यालाही मोठा फटका सहन करावा लागत आहे. दिवाळीच्या तोंडावर व शेतीचा चांगला हंगाम असतानाच महावितरण कंपनीच्या वतीन दोन दिवसांपासून भारनियमन सुरू करण्यात आले आहे. त्यामुळे सत्तेत असलेली शिवसेनाही या भारनियमनाच्या विरोधात आक्रमक झाली आहे. शिवसेनेच्या शिष्टमंडळाने महावितरणच्या मुख्य अभियंत्यांची भेट घेऊन भारनियमन तातडीने रद्द करण्याची मागणी केली. जिल्हाप्रमुख विजय करंजकर, महानगरप्रमुख अजय बोरस्ते, नगरसेवक सूर्यकांत लवटे, डी. जी. सूर्यवंशी, संतोष गायकवाड, प्रशांत दिवे यांनी महावितरणच्या अधिकाऱ्यांना भारनियमन रद्द न केल्यास कार्यालयांना कुलूप ठोकण्याचा इशारा दिला, तसेच आवश्यकता भासल्यास अधिकाऱ्यांनाही कार्यालयमांमध्ये कोंडू असा सज्जड दम भरला.
महावितरणाने वर्षभरची वीजनिर्मितीची गरज व आपत्कालीन गरज लक्षात घेऊन विशेषतः ऑक्टोबर महिन्यात होणारी कृषी ग्राहकांची मागणीतील वाढ व ऑक्टोबर हीट लक्षात घेऊन पुरेसे व योग्य नियोजन करणे आवश्यक होते. मात्र, नियोजनशून्य कारभारामुळे अपेक्षित वाढ महावितरणाला ओळखता आली नाही. परिणामी संपूर्ण राज्यात भारनियमन करावे लागत आहे. त्याचा फटका सर्वसामान्य नागरिकांसह शेतकरी, व्यापाऱ्यांनाही बसत आहे. करारानुसार महाजेनको व इतर कुठलीही कंपनी वीज पुरविण्यास असमर्थ ठरल्यास त्यांच्याबरोबरचे करार तातडीने रद्द करावेत, वीजपुरवठ्याच्या खुल्या व स्पर्धात्मक निविदा काढून वीज विकत घेऊन ग्राहकांची मागणी पुरवावी. मात्र, सणासुदीच्या तोंडावर भारनियमन करण्यात येऊ नये, अशी मागणी यावेळी करण्यात आली.
--
कोळसा भेट
निफाड ः अवाजवी भारनियमनामुळे त्रस्त झालेल्या निफाड तालुक्यातील नागरिकांनी शनिवारी दुपारी आमदार अनिल कदम यांच्या नेतृत्वाखाली वीज वितरण कंपनीच्या नाशिकरोड कार्यालयावर धड़क दिली. निफाड़ तालुका शिवसेना पदाधिकारी व आमदार कदम यांनी दुपारी दोन ते चार वाजेपर्यंत वीज कंपनीचे अधीक्षक अभियंता खंदारे, कार्यकारी अभियंता डी. के. आहेर, नाशिकचे कार्यकारी अभियंता ठाकरे, चांदवडचे अभियंता वाडे यांना घेराव घालत कोळसा भेट देऊन आंदोलन केले. निफाड़ तालुक्यातील भारनियमन सोमवारपर्यंत सुरळीत न झाल्यास अचानक मारझोड आंदोलन करण्याचा निर्वाणीचा इशारा आमदार कदम यांनी यावेळी दिला.
------
काँग्रेसचा कॅन्डल मार्च
म. टा. खास प्रतिनिधी, नाशिक
अवाजवी भारनियमनाविरोधात शहर काँग्रेसतर्फे कॅन्डल मार्च काढत अनोखे आंदोलन करण्यात आले. काँग्रेसच्या शहर कार्यालयापासून ते भद्रकालीतील महावितरण कार्यालयापर्यंत कॅन्डल मार्च काढून भाजप सरकारचा तीव्र निषेध करण्यात आला.
महावितरणने तात्काळ भारनियमन रद्द करावे अन्यथा तीव्र आंदोलन करण्याचा इशारा पक्षाच्या वतीने देण्यात आला. महावितरणच्या वतीने अचानकपणे शहर व ग्रामीण भागात भारनियमन सुरू करण्यात आले आहे. एेन दिवाळीच्या तोंडावर सुरू झालेल्या या भारनियमनामुळे सर्वसामान्यांचे हाल होत आहेत. त्यामुळे या भारनियमनाविरोधात काँग्रेसचे शहराध्यक्ष शरद आहेर यांच्या नेतृत्वाखाली शनिवारी कॅन्डल मार्च काढून अनोखे आंदोलन झाले. कॅन्डल मार्च महात्मा गांधी रोडमार्गे मेनरोड, दहीपूल, गाडगेबाबा पुतळा परिसरातून भद्रकालीतील महावितरण कार्यालयावर पोहोचला, त्यावेळी मोदी सरकारविरोधात जोरदार घोषणाबाजी करण्यात आली. याप्रसंगी कार्यकर्त्यांनी अधिकाऱ्यांना मेणबत्या भेट देत निषेध नोंदविला. शहरातील भारनियमन त्वरित बंद करण्यात यावे, अशा मागणीचे निवेदन शहर अभियंत्यांना देण्यात आले. आंदोलनात डॉ. हेमलता पाटील, वत्सलाताई खैरे, राहुल दिवे, आशा तडवी, हनिफ बशीर, वसंत ठाकूर, आर. आर. पाटील, लक्ष्मण जायभावे, समीर कांबळे, रईस शेख, बबलू खैरे, उद्धव पवार, कैलास कडलग मुन्ना ठाकूर आदी सहभागी झाले होते.
--
विकास अन् प्रकाश गायब
काँग्रेसने काढलेल्या कॅन्डल मार्च आंदोलनात पक्षाच्या वतीने लावण्यात आलेल्या पोस्टर्सवरील स्लोगन सर्वांचे लक्ष वेधून घेत होते. विकासासोबत प्रकाशही गायब असे पोस्टर्सही यावेळी झळकविण्यात आले. फडणवीस सरकारचा जाहीर निषेध, हेच का अच्छे दिन? अशा स्लोगनद्वारे सरकारवर टीका करण्यात आली. काही भांडवलदारांच्या भल्यासाठी भारनियमन केले जात असल्याचा आरोप यावेळी करण्यात आला.
----
राष्ट्रवादीची घोषणाबाजी
म. टा. वृत्तसेवा, नाशिकरोड
शहरात सध्या सुरू असलेले भारनियमन त्वरित रद्द करण्याची मागणी करीत नाशिकरोड राष्ट्रवादी काँग्रेसतर्फे येथील महावितरण कंपनीच्या कार्यालयासमोर घोषणाबाजी करीत आंदोलन करण्यात आले.
कार्यकारी अभियंता धनंजय आहेर यांना भारनियमन रद्द करण्याबाबतचे निवेदन देण्यात आले. नाशिकरोड विभाग अध्यक्ष मनोहर कोरडे, निवृत्ती अरिंगळे, प्रशांत वाघ, अशोक पाटील, राहुल तुपे, स्वप्निल सोनवणे, राजेंद्र पाळदे, गोरक्षनाथ सरोदे, बाळासाहेब जाधव, रेखा नायडू, मिलिंद पगारे, तानाजी लोखंडे, ताहीर शेख, बशीर शेख, प्रकाश साडे, अनिता भामरे, भाऊसाहेब अरिंगळे आदी उपस्थित होते.
निवेदनाचा आशय असा ः एेन दिवाळीच्या तोंडावर कोणतीही पूर्वसूचना न देता अघोषित भारनियमन सुरू केल्याने नागरिकांमध्ये तीव्र नाराजी आहे. व्यापार-उद्योगासही फटका बसणार आहे. पाणीपुरवठा शुद्धीकरणाला अडथळा येत असल्याने अशुद्ध पाणीपुरवठा होत आहे. शहरात चार तास, तर ग्रामीण भागात सहा तास भारनियमन होत आहे. ऑक्टोबर हीटने जनता त्रस्त असतानाच भारनियमन सुरू झाले आहे. शेतकऱ्यांनाही विविध अडचणींना तोंड द्यावे लागत आहे. त्यामुळे भारनियमन त्वरित रद्द करण्यात यावे.
मोबाइल अॅप डाउनलोड करा आणि राहा अपडेट
