अखिल भारतीय आखाडा परिषदेचे प्रवक्ता महंत मोहनदास बेपत्ता होऊन ११ दिवस उलटले. मात्र, अद्याप त्यांच्याबाबत माहिती घेण्यास सरकारला अपयश येत असल्याचे पाहून साधू- महंतांनी तीव्र नाराजी व्यक्त केली आहे. आखाडा परिषदेने जाहीर केलेल्या यादीतील भोंदू बाबांच्या समर्थकांवर संशय व्यक्त केला जात आहे. आखाडा परिषदेने दुसरी यादीही जाहीर करणार असल्याचे सांगितले होते. कदाचित आपले नाव जाहीर होईल म्हणून अशा संभाव्य संशयित भोंदूंचा हा दहशत निर्माण करण्याचा प्रयत्न असावा, अशी चर्चा साधूंमध्ये होत आहे.
साधूंचे आखाडे भारतभर आहेत आणि साधू नेहमीच रेल्वेने प्रवास करीत असतात. आता हा रेल्वेप्रवासच धोक्याचा झाल्याने साधूंमध्ये नाराजी व्यक्त होत आहे. आखाडा परिषद जिल्हाधिकाऱ्यांना निवेदन देणार असून, त्यावर साधू- महंतांमध्ये चर्चा होत आहे. रेल्वेच्या आरक्षित बोगीतून एखादा प्रवासी अचानक नाहीसा होतोच कसा, ही रेल्वे प्रवासाच्या सुरक्षिततेबाबत प्रश्नचिन्ह निर्माण करणारी घटना आहे. हरिद्वार ते भोपाळ या प्रवासादरम्यान किती स्थानके आहेत आणि तेथे सीसीटीव्ही असेल तर त्याची तपासणी करावी. थांबा नसलेल्या ठिकाणी रेल्वे थांबवण्यात आली असेल तर साखळी ओढल्याची माहिती रेल्वे प्रशासनाने घेतली पाहिजे. देशभरात साधू-संतांमध्ये खळबळ उडविणारी घटना असताना याबाबत सरकार यंत्रणा निश्चल असल्याचे पाहून साधूंचा पारा चढला आहे.
दरम्यान, साधूंशी चर्चा केली असता, काही साधूंना यादी जाहीर झाल्यानंतर रेल्वे आणि अन्य सार्वजनिक ठिकाणी वादावादीस सामोरे जावे लागण्याच्या घटना निदर्शनास आलेल्या आहेत. यामध्ये भोंदू बाबांचे समर्थक असल्याचेही लक्षात आले. राम रहीम प्रकरणात साधू बदनाम होत असल्याने आखाडा परिषदेने भोंदू बाबांची यादीच जाहीर केली होती. त्र्यंबकेश्वर येथे साधूंचे दहा आखाडे आहेत. या दहा आखाड्यांतील साधूंपैकी महंत मोहनदास यांच्या बेपत्ता होण्याचा विषय केंद्रस्थानी आहे.
महंत मोहनदास बेपत्ता होण्याच्या घटनेत निश्चितच भोंदू बाबांच्या समर्थकांचा हात असल्याचे स्पष्ट होत आहे. याबाबत सरकारने तातडीने चौकशी करण्याची आवश्यकता आहे. सरकारने रेल्वेसुरक्षा यंत्रणेकडून सखोल माहिती घेऊन याबाबत छडा लावला पाहिजे, असे डॉ. बिंदूजी महाराज यांनी सांगितले.
मोबाइल अॅप डाउनलोड करा आणि राहा अपडेट
