माणसांच्या दैनंदिन जीवनातील साध्यासुध्या घटनांमध्ये साहित्यलेखनाचे विषय दडलेले असतात. माझ्यातील कांदबरी लेखक अशाच घटनांमधून जन्माला आला. शालेय वयात लिहिण्याची गोडी निर्माण झाल्यास व चांगले शिक्षक, मित्र व संस्कार मिळत गेल्यास आपल्यातील लेखक आपल्याला सापडतो, असे प्रतिपादन साहित्यिक, लेखक डॉ. राजेंद्र मलोसे यांनी केले.
येथील मसगा महाविद्यालयात वाड्मय मंडळाचे उद‌्घाटन मलोसे यांच्या हस्ते करण्यात आले. त्यावेळी ते बोलत होते. डॉ. मलोसे यांनी साहित्यनिर्मिती प्रक्रियेविषयी विद्यार्थ्यांशी मुक्तपणे संवाद साधला. आपण कांदबरी लेखनाकडे कसे वळालो याविषयी त्यांनी विद्यार्थ्यांसमोर अनुभव कथन केले.
प्राचार्य डॉ. वाय. टी. पवार हे अध्यक्षस्थानी होते. तर उपप्राचार्य डॉ. सी. एम. निकम, पी. ए. आहिरे, डॉ. अनिता नेरे, मंडळाचे अध्यक्षा डॉ. विद्या सुर्वे आदी मान्यवर उपस्थित होते. कार्यक्रमाच्या प्रारंभी राहुल मोरे व कामेश गायकवाड यांनी स्वागतगीत सादर केले. राज त्रिभुवन यांनी सूत्रसंचलन केले. महाविद्यालयाचे आर. एच. शेलार, जयवंत कट्यारे, जे. वाय. इंगळे उपस्थित होते. प्रा. सादिया परवीन यांनी उपस्थितांचे आभार मानले.
आताच घ्या साहित्याचा आनंद
विद्या सुर्वे म्हणल्या, विद्यार्थ्यांनी महाविद्यालयीन जीवनातच साहित्यातील सर्व प्रकारांचा रसस्वाद घेतला पाहिजे. यासाठी वाड्मयीन मंडळ स्थापन करण्यात आले आहे. तर अध्यक्षीय भाषणात प्राचार्य पवार यांनी शाळा महाविद्यालयात लेखन, वाचनाचे छंद जोपासले तर आयुष्य सुंदर होते, असे सांगितले.
मोबाइल अॅप डाउनलोड करा आणि राहा अपडेट
