म. टा. प्रतिनिधी, नाशिक
नवरात्रोत्सव अवघ्या सात दिवसांवर येऊन ठेपला असून, नवरात्रीचे प्रमुख आकर्षण ठरणाऱ्या रास दांडिया, गरब्याचा आनंद लुटण्यासाठी तरुणाई वर्कशॉप्सच्या माध्यमातून ठेका धरत सज्ज होताना दिसत आहे. या उत्सवाच्या पार्श्वभूमीवर देवीच्या मूर्ती, मंदिरे, मंदिरांचे आवार आदींचे रुपडे पालटत आहे. बहुतांश देवी मंदिरांतील रंगरंगोटीची कामे पूर्णत्वास आली आहेत.
गणेशोत्सवानंतर काही दिवसांतच येणाऱ्या नवरात्रोत्सवाकडे अवघ्या तरुण पिढीचे लक्ष लागते. वर्षभरातील नऊ दिवस गरबा, दांडिया खेळत देवीची आराधना करताना वातावरणात चैतन्य निर्माण झालेले असते. यंदाही हा उत्सव जल्लोषात साजरा करण्याची आतुरता शहरात दिसून येत आहे.
ढोलिडा ढोल धिमो, कुकडा तारी बोली, पंखिडा तू उडी जाये… अशा पारंपरिक गीतांबरोबरच बॉलिवूडच्या रिमिक्स गीतांसह इंडो-वेस्टर्न थीमवर थिरकण्यासाठी तरुणाई सज्ज होत आहे. शहरात वेगवेगळ्या ठिकाणी दहा, पंधरा दिवसीय वर्कशॉपला प्रारंभ झाला असून, गरब्याच्या पारंपरिक स्टेप्सबरोबरच आधुनिक स्टेप्स उत्साहात भर टाकत आहेत. याशिवाय खरेदीचा जोरही वाढला आहे.
शहरातील मोठमोठ्या मंडळांकडून दांडिया उत्सव आयोजित केला जात असतो. अशा नावाजलेल्या ठिकाणीच जाऊन गरबा, दांडिया खेळण्याचा अनेकांचा प्रयत्न असतो. त्यामुळे रीतसर प्रशिक्षण घेऊन या ठिकाणी जाण्याकडे गेल्या काही वर्षांत कल वाढला आहे. चौकाचौकांमध्ये पोस्टर्सद्वारे गरबा, दांडिया वर्कशॉपची जाहिरातबाजी करण्यात येत असून, तरुणाईला प्रशिक्षणासाठी आकर्षित केले जात आहे. असे क्लासेस तरुणाईबरोबरच प्रौढांनाही आकर्षित करत असून, तेथे जाऊन शिकण्यावर भर दिला जात आहे. अनेक क्लासेस वेगवेगळ्या स्पर्धांसाठीही प्रशिक्षकांना तयार करत असल्याने एकएका स्टेप्सवर लक्षपूर्वक मार्गदर्शन केले जात आहे.
--
पारंपरिक पोशाखांची चलती
नवरात्रोत्सवात गरबा खेळण्यासाठी त्याला साजेशी वेशभूषा केली जाते. यासाठी घागरा चोली, धोती अशा पारंपरिक कपड्यांना मागणी मिळत आहे. बाजारपेठाही अशा वेगवेगळ्या प्रकारच्या पोशाखांनी सजल्या असून, गुजरात, जयपूर या ठिकाणांहून ते विक्रीस आणले जात आहेत. शिवाय, गेल्या एक-दोन वर्षांपासून इंडो वेस्टर्न थीमलाही मोठी पसंती मिळत असून, जिन्स, टॉपबरोबर बांधणीची ओढणी व ऑक्साइडचे दागिने अशा मिक्स मॅच फॅशनला पसंती दिली जात आहे.
--
दागिन्यांना वाढती मागणी
नवरात्रोत्सवात गरबा खेळण्यास जाताना वेशभूषेला साजेसे दागिने घालण्याची गरज लक्षात घेत तरुणींचा सिल्व्हर, ऑक्साइडचे दागिने खरेदीकडे कल वाढला आहे. टिका, घुमर, कमरपट्टा, पायल, बाजूबंध, साज, कवड्यांनी तयार केलेले दागिने असे विविध प्रकारचे दागिने खरेदी करण्यावर किंवा ब्यूटिपार्लरमधून भाडेतत्त्वावर मिळविण्याचा त्यांचा प्रयत्न सुरू आहे.
--
गरबा शिकण्यासाठी येणाऱ्यांची संख्या चांगली असल्याने उत्साह मोठा आहे. लहानांपासून मोठ्यांपर्यंत अनेकांनी उत्साहाने सहभाग घेतला आहे.
-प्रतीक हिंगमिरे, कोरिओग्राफर
--
मूर्ती, मंदिरे रंगरंगोटीस वेग
शहर परिसरातील देवी मंदिरांतील मूर्ती, मंदिरे, तसेच मंदिरांच्या आवाराची रंगरंगोटी पूर्णत्वास आली आहे. नाशिकचे ग्रामदैवत कालिका देवी, सांडव्यावरची देवी, नाशिकरोडची दुर्गा देवी, तसेच भगूर येथील रेणुकामाता आदी मंदिरांतील अशी कामे जवळपास पूर्ण झाली आहेत. विविध मूर्तिकारांकडून देवीच्या मूर्तींवर अखेरचा हात फिरविला जात असून, अनेक ठिकाणी विविध रुपांतील देवीच्या मूर्तींचे स्टॉल्सदेखील लागले आहेत. त्याचप्रमाणे घट बसविण्यास आवश्यक असलेल्या टोपल्या तयार करण्याच्या कामानेही वेग घेतला आहे. भगूर येथील रेणुकामाता देवी मंदिरासमोरील बारवाची शिवशाही फाउंडेशन व शिवसेनेतर्फे स्वच्छता करण्यात आली. बारवेतून सुमारे दोन टन कचरा काढण्यात आला. या मोहिमेत चंद्रकांत कासार, वैभव पाळदे, धर्मेंद्र मल्ल, सुरेश आव्हाड, ऑल्विन स्वामी, युवराज कासार, पप्पू काशिद, सिराज शेख, पावन कासार, रोहित कासार आदींनी सहभाग घेतला.
मोबाइल अॅप डाउनलोड करा आणि राहा अपडेट
