राज्यात पर्यटन वाढीसाठी प्रत्येक जिल्ह्यात प्रशिक्षित २० गाइड्स असणार आहे. त्यामुळे पर्यटनाला चालना मिळेल, पर्यटकांना त्या-त्या जिल्ह्याची माहिती या गाइडमार्फत उपलब्ध होईल व त्यातून पर्यटकांना दिलासा मिळेल. तसेच महामार्गावरील १० ठिकाणी राज्यात वे साइड अॅमेनिटीज पार्क उभे केले जाणार असून त्यात मॉल व करमणुकीपासून इतर साधणे असणार आहे. त्यामुळे प्रवासात विरुंगळा मिळणार आहे.
नाशिक परिसरातील पर्यटनाचे ब्रँडिंग व्हावे, यासाठी महाराष्ट्र पर्यटन विकास महामंडळ व ट्रॅव्हल एजंट्स असोसिएशनने हॉटेल एक्स्प्रेस इन येथे आयोजित तीन दिवशीय ट्रॅव्हल मार्टच्या कार्यक्रमात स्टॉलचे उद्‍घाटन करताना ते बोलत होते. यावेळी ते म्हणाले, की व्हिजिट महाराष्ट्र हा उपक्रम राज्य सरकारने हाती घेतला असून त्यामाध्यमातून पर्यटन वाढण्यासाठी विविध उपक्रम हाती घेतले जात आहे. पर्यटन वाढीसाठी राज्यातील स्थानिक स्वराज संस्थेचा सहभागही महत्त्वाचा आहे. त्यामुळे महापालिका, नगरपालिका सह इतर संस्थांची मदत घेवून पर्यटन कसे वाढवता येईल याबाबत काम सुरू आहे.
इगतपुरीला वेलनेस हब
जगभरातून वेलनेस टुरिझमला चांगला प्रतिसाद मिळत आहे. जिल्ह्यातील पर्यटन विकासासाठी इगतपुरीच्या ‘वेलनेस हब’ म्हणून विकास करण्यात येईल, असे प्रतिपादन जयकुमार रावल यांनी केले. जिल्ह्यात निसर्ग, कृषी, पर्यटन, ऐतिहासिक गड-किल्ले, पक्षी अभयारण्य, पावसाळी पर्यटन आणि वाइनरीज असे पर्यटनासाठी आवश्यक विविध घटक उपलब्ध आहेत. मुंबईशी असणारी समिपताही पर्यटनासाठी पूरक आहे. आदरातिथ्याच्या चांगल्या सुविधा नाशिकमध्ये आहेत. या सर्व बाबींचा लाभ घेत नाशिकमधील पर्यटनाला चालना देण्यासाठी सर्व सहकार्य करण्यात येईल. जपान येथील गव्हर्नर निसाका यांची लवकरच नाशिक भेट आयोजित करण्यात येईल, असेही त्यांनी सांगितले.
अतिथी देवो भव
‘अतिथी देवो भव’ ही संस्कृती रुजविण्यास प्राधान्य देण्याबरोबरच पर्यटनस्थळ परिसरातील सुविधांचा विकास करण्याचा प्रयत्न पर्यटन महामंडळामार्फत होत आहे. क्रूझ पर्यटनासारख्या नव्या संकल्पना अंमलात आणल्या जात आहेत. देशाबाहेरील पर्यटकांना आकर्षित करण्यासह देशांतर्गत पर्यटकही राज्यात यावेत, यासाठी विविध तीर्थस्थळांचे सर्कीट निर्माण करण्याचा प्रयत्न करण्यात येत आहे. हे करीत असतांना पर्यटनस्थळांचे मार्केटिंग होणे गरजेचे आहे. नाशिक ट्रॅव्हल मार्ट त्यादृष्टीने महत्त्वाचे पाऊल ठरेल, असा विश्वास त्यांनी व्यक्त केला.
महाराष्ट्राला द्यावी पसंती
भारतात जगातील पर्यटनस्थळांपेक्षा अधिक चांगली स्थळे असल्याचे नमूद करून जयकुमार रावल यांनी महाराष्ट्रातही सुंदर समुद्र किनारा, ४५० गड-किल्ले, अभयारण्ये, युनेस्कोने वारसा घोषित केलेली पाच पर्यटनस्थळे, पश्चिम घाटावरील जैवविविधता, तीर्थस्थळे मोठ्या प्रमाणात आहेत. पर्यटकांनी या स्थळांना भेटी दिल्यानंतर त्यांना अधिक आनंद लुटता यावा यासाठी विविध सुविधा निर्माण करण्याची गरज आहे. पर्यटन क्षेत्रात काम करणाऱ्या संस्थांनी त्यादृष्टीने प्रयत्न करावेत, सरकार त्यांना सर्व सहकार्य करेल, अशी ग्वाही त्यांनी दिली. टूर ऑपरेटर्सने राज्याला पसंती द्यावी, असे आवाहन त्यांनी केले.
मोबाइल अॅप डाउनलोड करा आणि राहा अपडेट
