म. टा. खास प्रतिनिधी, नाशिक
आपल्या लाडक्या गणरायाला निरोप देण्यासाठी भक्तांची धावपळ सुरू झाली असून, गणेश विसर्जनाचे नियोजन महापालिकेकडून पूर्ण झाले आहे. विसर्जन मिरवणुकीच्या मार्गावरील अतिक्रमणे सोमवारी काढण्यात आली असून, सीसीटीव्ही कॅमेरेही बसवण्यात आले आहेत. आयुक्त अभिषेक कृष्णा यांनी गणेश विसर्जन मिरवणूक मार्गाचा आढावा घेण्यासह नदीकाठावर जाऊन प्रत्यक्ष कृत्रिम व नैसर्गिक विसर्जनस्थळांची पाहणी केली. सोबतच आवश्यक त्या सुविधा उपलब्ध करून देण्याच्या सूचना प्रशासनाला केल्या. मनपातर्फे विसर्जनासाठी २६ नैसर्गिक ठिकाणे, तर २८ ठिकाणी कृत्रिम तलाव तयार करण्यात आले आहेत. पर्यावरणपू्रक गणेशोत्सवासाठी मूर्ती दान करण्याचे आवाहन पालिकेने केले आहे.
बाप्पाला निरोप देण्यासाठी भक्तही सज्ज झाले आहेत. विसर्जनाची तयारी पालिकेनेही केली असून, आयुक्त अभिषेक कृष्णा यांनी अधिकाऱ्यांची बैठक घेऊन मिरवणूक तयारीचा आढावा घेतला. नदीचे प्रदूषण टाळावे यासाठी महापालिकेने सहा विभागांत नैसर्गिक विसर्जनाची २६ तर २८ कृत्रिम ठिकाणे निश्चित केली आहेत. सोबतच गणेशमूर्ती दान करणाऱ्यांसाठी स्वतंत्र संकलन केंद्रे उभारण्यात आली आहेत. गणेश विसर्जन मिरवणुकीत आवश्यक त्या सुविधा उपलब्ध करून देण्याचे आदेश दिले आहेत.
आयुक्त कृष्णा यांनी मिरवणूक मार्गाचीही पाहणी केली. तसेच गंगापूर धबधबा येथे गणेश विसर्जनाच्या पूर्व तयारीची पाहणी केली व आरोग्य विभाग, बांधकाम विभागातील संबंधित अधिकाऱ्यांना योग्य त्या सूचना केल्या. याप्रसंगी शिवसेना गटनेते विलास शिंदे, नगरसेवक संतोष गायकवाड, राधाताई बेंडकुळे, शहर अभियंता यू. बी. पवार, अग्निशमन अधिकारी अनिल महाजन, आरोग्य अधिकारी सुनील बुकाने, गंगापूर पोलिस स्टेशनचे पोलिस निरीक्षक महेश देवीकर तसेच गंगापूर गावातील नागरिक मोठ्या संख्येने उपस्थित होते. त्यानंतर आयुक्तांनी कृत्रिम तलावांचीही पाहणी केली व आवश्यक त्या सूचना दिल्या. नाशिकरोड, सिडको, सातपूर, पंचवटी येथून मिरवणुका या मार्गावर येतात. नागरिकांनी गणेशमूर्तींचे विसर्जन अधिकृत ठिकाणीच करावे, तसेच शक्य झाल्यास गणेशमूर्तींचे दान करावे, असे आवाहन महापालिकेने केले आहे.
बारा वाजता सुरू होणार मिरवणूक
महापालिकेचा गणपती मानाचा असतो. त्यामुळे गणेश मंडळांच्या रांगेत मनपाच्या गणपतीला पहिले स्थान असते. यंदा पालिकेने रात्री गणेश विसर्जन मिरवणुकीला उश‌िर होत असल्याने मिरवणूक लवकर सुरू करण्याचा निर्णय घेतला आहे. दरवर्षी दोन वाजेनंतर सुरू होणारी मिरवणूक यंदा १२ वाजताच सुरू होणार आहे. पालकमंत्री गिरीश महाजन आणि महापौर रंजना भानसी यांच्या उपस्थितीत मिरवणुकीला सुरुवात होणार आहे. त्यामुळे मिरवणूक लवकर आटोपण्याची शक्यता आहे.
महाजनांची उपस्थिती
गणेश विसर्जन मिरवणुकीच्या वेळी नाशिकचे पालकमंत्री गिरीश महाजन स्वतः उपस्थित राहणार आहेत. दुपारी १२ वाजता वाकडी बारव येथे मानाच्या पालिकेच्या गणपतीची आरती महाजन यांच्या हस्ते होणार असून, त्यानंतर मिरवणुकीला प्रारंभ होणार आहे. गणेश मिरवणुकीदरम्यान कोणतीही गडबड होऊ नये यासाठी महाजन स्वतः उपस्थित राहणार आहेत.
नाशिकरोडला दहा ठिकाणी तयारी
नाशिकरोड ः जेलरोडला गोदाघाट, चेहडीला दारणा घाट, वालदेवी नदीची देवळालीगाव तसेच विहीतगाव घाटावर गणेश मूर्ती विसर्जन केले जाते. महापालिकेच्या आरोग्य विभागाने रविवारी स्वच्छता मोहीम राबवली. वडनेर पंपिंग येथेही स्वच्छता करण्यात आली.ज्या भाविकांना नदीकाठावर जाणे शक्य होणार त्यांच्यासाठी महापालिकेने कृत्रिम तलाव तयार केले आहेत. नारायणबापू चौक, शिखरेवाडी मैदान, महापालिका शाळा क्रमांक १२५, जेतवननगरची मनपा नर्सरी, चेहेडी पंपिगचे मनपा क्रीडांगण येथे हे कृत्रिम तलाव करण्यात आले आहेत. गोदाघाटासह यासर्व दहा ठिकाणी मंगळवारी निर्माल्य कलश ठेवले जाणार आहेत.
मूर्ती दान करण्याचे आवाहन
नाशिक ः गोदावरीचे प्रदूषण रोखण्यास सार्वजनिक व घरगुती गणेशोत्सवासाठी प्लॅस्टर ऑफ पॅरिसच्या गणेशमूर्तींचे गोदावरीत विसर्जन न करता त्या दान कराव्यात, असे आवाहन विद्यार्थी कृती समितीच्या वतीने करण्यात आले आहे.
प्लॅस्टर ऑफ पॅरिसच्या गणेशमूर्ती, त्यावर केलेले रासायनिक रंगकाम व इतर सौंदर्यप्रसाधनांमुळे गोदावरीचे मोठ्या प्रमाणावर प्रदूषण होते. गोदावरीचे प्रदूषण थांबविण्यासाठी विद्यार्थी कृती समितीमार्फत गेल्या ६ वर्षांपासून ‘देव द्या, देवपण घ्या’ हा उपक्रम राबविला जात असून यंदाचे सातवे वर्ष आहे. गतवर्षी हजारो मूर्ती नाशिककरांनी या उपक्रमांतर्गत विद्यार्थी कृती समितीकडे सुपूर्द केल्या होत्या. समितीकडे आलेल्या गणेशमूर्ती मंगलमय व पवित्र वातावरणात नाशिक महानगरपालिकेच्या सहकार्याने कृत्रिम तलावात विधिवत विसर्जित केल्या जातात. यंदा चोपडा लॉन्स जवळील गोदापार्क येथे सकाळी ११ ते ४ या वेळेत देव द्या देवपण घ्या उपक्रमाचे कार्यकर्ते मूर्ती स्वीकारण्यासाठी उपस्थित राहणार आहेत.
नाशिककरांनी मोठ्या संख्येने या उपक्रमात सहभागी होऊन गोदावरीचे प्रदूषण थांबविण्यासाठी हातभार लावावा असे आवाहन विशाल गांगुर्डे, जयंत सोनवणे, रोहित कळमकर, सागर बावीस्कर, सिद्धांत आमले, प्रशांत खडालकर, राहुल मकवाना, अभिजित पाटील, कोमल कुरकुरे, विजय विश्वकर्मा, संकेत वानखेडे, युवराज कुरकुरे, निखील देशमुख, प्रितीश कारे, राकेश ठुबे, आकाश भामरे, ललित पिंगळे आदींनी केले आहे. अधिक माहितीसाठी ९४२१५६३५५५ या भ्रमणध्वनी क्रमांकावर संपर्क साधावा.
पंचवटी परिसरात
विसर्जनाची तयारी
पंचवटी ः शहर परिसरातील गणेशमूर्तींचे विसर्जन गोदाकाठावर रामकुंड परिसरात होत असल्याने या परिसरात गणेश मूर्ती जय्यत तयारी करण्यात आली आहे. पंचवटीतील बारा ठिकाणी गणेशमूर्ती दान घेण्यासाठी मंडपाची उभारणी करण्यात आली आहे. ठिकठिकाणी निर्माल्य संकलनासाठी कलश ठेवण्यात येणार आहे. संकलित झालेल्या आलेल्या गणेशमूर्ती आणि निर्माल्य वाहून नेण्यासाठी ३२ वाहनांची व्यवस्था करण्यात आली आहे.
पंचवटीतील रामकुंड, लक्ष्मणकुंड, म्हसोबा पटांगण, गौरी पटांगण, तपोवन, नांदूर, मानूर, कोणार्क नगर, औदुंबर लान्स, दत्तचौक, आरटीओ, म्हसरुळ सीता सरोवर या ठिकाणी मूर्ती संकलन करण्यात येणार आहे. संकलित झालेल्या मूर्ती या जागेवरून लगेच उचलण्याची व्यवस्था करण्यात आली आहे. त्यासाठी सकाळी दहा ते रात्री दहा यावेळेत महापालिकेच्या आरोग्य विभागाचे १५० आणि बांधकाम विभागाचे १०० असे २५० कर्मचारी सेवेत सहभागी होणार आहेत. मूर्ती संकलनासाठी १६ आणि निर्माल्य वाहून नेण्यासाठी १६ अशा ३२ वाहनांची व्यवस्था करण्यात आली आहे.
मालेगाव स्टॅण्ड येथे पंचवटी शांतता समितीतर्फे मुख्य मिरवणुकीत येणाऱ्या सार्वजनिक गणेशोत्सव मंडळाचे स्वागत करण्यात येणार आहे. मालेगाव स्टॅण्ड, रामकुंड, म्हसोबा पटांगण, तपोवन, नांदूर, मानूर येथे पोलिस बंदोबस्तात सहाय्यक पोलिस आयुक्त विजयकुमार चव्हाण, पंचवटी पोलिस निरीक्षक दिनेश बर्डेकर, आडगाव पोलिस निरीक्षक सुनीलकुमार पूजारी, म्हसरुळ पोलिस निरीक्षक सुभाषचंद्र देशमुख यांच्या मार्गदर्शनाखाली बंदोबस्त ठेवण्यात येणार आहे.
मोबाइल अॅप डाउनलोड करा आणि राहा अपडेट
